មុនធ្វើដំណើរឆ្ពោះទៅទីក្រុងកៀវ រដ្ឋមន្ត្រីការបរទេសអាមេរិក លោក ប្លីងខេន ប្រាប់អ្នកសារព័ត៌មាន នៅក្បែរព្រំដែនអ៊ុយក្រែន-ប៉ូឡូញថា៖ តាមរយៈទស្សនកិច្ចនេះ អាមេរិកមានឱកាសមួយ ដើម្បីបង្ហាញដោយផ្ទាល់នូវការគាំទ្រដ៏រឹងមាំរបស់អាមេរិក សម្រាប់រដ្ឋាភិបាល និងប្រជាជនអ៊ុយក្រែន។ នេះជាពេលដ៏សំខាន់ដើម្បីទៅកាន់ទីនោះ ដើម្បីពិភាក្សាទល់មុខគ្នាយ៉ាងលម្អិតតែម្តងជាមួយរដ្ឋាភិបាលក្រុងកៀវ។
ក្នុងជំនួបនៅថ្ងៃចន្ទទី២៥មេសា មន្ត្រីជាន់ខ្ពស់ក្រុងវ៉ាស៊ីនតោនទាំពីររូបនេះ បានប្រាប់ប្រធានាធិបតីអ៊ុយក្រែន លោក Volodomyr Zelenskyy និងទីប្រឹក្សារបស់លោកថា សហរដ្ឋអាមេរិកនឹងផ្តល់ហិរញ្ញប្បទានយោធាចំនួនជាង ៣០០លានដុល្លារ និង បានអនុម័តយល់ព្រមលក់អាវុធដែលមានតម្លៃប្រមាណ ១៦៥លានដុល្លារដល់អ៊ុយក្រែនផងដែរ។
ជាមួយគ្នានោះដែរ ប្រមុខការពារជាតិអាមេរិក លោក ឡយ អូស្ទីន(Lloyd Austin)ក៏បាននិយាយដែរថា ប្រធានាធិបតី Zelenskyy បានសម្តែងការដឹងគុណយ៉ាងជ្រាលជ្រៅចំពោះអ្វីដែលអាមេរិក បានផ្តល់ឱ្យអ៊ុយក្រែន។ លោកបន្តថា រដ្ឋាភិបាល និងប្រជាជនអ៊ុយក្រែន មានផ្នត់គំនិតចង់ឈ្នះសង្គ្រាមមួយនេះ ហើយអាមេរិកវិញមានគំនិត ចង់ជួយឲ្យពួកគេបានឈ្នះ។
គួរជម្រាបថា ដំណើរទស្សនកិច្ចរបស់លោក ប្លីងខេន(Blinken) និង រដ្ឋមន្ត្រីការពារជាតិ អាមេរិក លោក ឡយ អូស្ទីន(Lloyd Austin) គឺជាដំណើរទស្សនកិច្ចកម្រិតខ្ពស់បំផុត និងជាលើកដំបូងបំផុតរបស់អាមេរិកទៅកាន់អ៊ុយក្រែន ចាប់តាំងពីរុស្ស៊ីបានបើកការឈ្លានពានកាលពីចុងខែកុម្ភៈមក។
អត្ថបទគួរអាន
ក្រៅតែពីផ្តល់ហរិញ្ញប្បទានសម្រាប់វិស័យយោធាដែលអាមេរិក ប្រកាសផ្តល់ឲ្យអ៊ុយក្រែន មន្ត្រីជាន់ខ្ពស់ក្រុងវ៉ាស៊ីនតោនទាំងពីររូបក៏បានប្រកាសពី ជំនួយដែលប្រមូលមកពីសម្ព័ន្ធមិត្តប្រមាណ ១៥ប្រទេស ផ្សេងទៀតសម្រាប់ផ្តល់ឲ្យអ៊ុយក្រែនផងដែរ។ ក្នុងនោះ ហិរញ្ញប្បទានយោធាបរទេសសរុបមានចំនួន ជាង៧០០លានដុល្លារ ហើយប្រហែលជាង ៣០០លានដុល្លារគឺសម្រាប់បម្រុងទុក។ ថវិកានៅសេសសល់នឹងត្រូវបែងចែក សងទៅឲ្យចំណោមសមាជិកណាតូ និង ប្រទេសផ្សេងទៀតដែលបានផ្តល់សព្វាវុធឱ្យអ៊ុយក្រែន នូវការផ្គត់ផ្គង់យោធាសំខាន់ៗកន្លងមក ចាប់តាំងពីសង្គ្រាមជាមួយរុស្ស៊ីបានផ្ទុះឡើង។
សូមបញ្ជាក់ថា បើគេបូកទាំងជំនួយដែលអាមេរិកទើបប្រកាសផ្តល់ឲ្យអ៊ុយក្រែនចុងក្រោយនេះ ជំនួយយោធាអាមេរិកដល់អ៊ុយក្រែន សរុបបានកើនដល់ ៣ពាន់៧រយលានដុល្លារអាមេរិកហើយ គិតត្រឹមពេល២ខែនៃសង្គ្រាមកើតឡើងនៅអ៊ុយក្រែន។
បើតាមគម្រោង លោកអាន់តូនី ប្លឺងខេន នឹងត្រឡប់ទៅប្រទេសប៉ូឡូញជាទីដែលលោកនឹងឡើងយន្តហោះ បន្តដំណើរត្រឡប់ទៅទីក្រុងវ៉ាស៊ីនតោនវិញ ខណៈដែលលោក ឡយ អូស្ទីន នឹងធ្វើដំណើរទៅកាន់ទីក្រុង រេមស្តេន(Ramstein) ប្រទេសអាឡឺម៉ង់ សម្រាប់កិច្ចប្រជុំ របស់រដ្ឋមន្ត្រីការពារជាតិអង្គការណាតូនៅថ្ងៃអង្គារទី២៦មេសាស្អែកនេះ៕
None
