លោកស្រី Jennifer Granholm រដ្ឋមន្រ្តីក្រសួងថាមពលអាមេរិក បានព្រមានតំណាងរាស្រ្តគណបក្សសាធារណរដ្ឋ តាមរយៈលិខិតមួយថា ការកំណត់ដែនអំណាចរបស់ប្រធានាធិបតី ក្នុងការផ្អាកការលក់ប្រេងបម្រុង ក្រោមលេសសន្តិសុខជាតិនោះ នឹងធ្វើឱ្យចុះខ្សោយនូវសន្តិសុខថាមពល ដែលជាវិស័យដ៏សំខាន់មួយនេះ។
រដ្ឋមន្ត្រីក្រសួងថាមពលរបស់អាមេរិករូបនេះ បានអះអាងថា ច្បាប់ហាមឃាត់ការបញ្ចេញលក់ប្រេងបម្រុងនេះ នឹងធ្វើឱ្យមានកង្វះខាតការផ្គត់ផ្គង់ប្រេងកាន់តែច្រើនក្នុងពេលមានវិបត្តិ ហើយតម្លៃប្រេងសាំង ក៏កាន់តែកើនឡើងខ្ពស់ដែលប៉ះពាល់ទៅដល់អ្នកប្រើប្រាស់នៅអាមេរិក។
គួរឱ្យដឹងដែរថា លិខិតនេះធ្វើឡើង គឺតំណាងឱ្យការខិតខំប្រឹងប្រែងរបស់រដ្ឋបាលលោក ចូ បៃឌិន ក្នុងការការពារនូវវិធានការរបស់ខ្លួន និងបន្ធូរបន្ថយការបារម្ភអំពីប្រេងបម្រុង។
គួររំឭកថា កាលពីឆ្នាំ២០២២ ប្រេងប្រមាណ ១៨០លានបារ៉ែលត្រូវបានដកចេញពីស្តុកបម្រុងយុទ្ធសាស្រ្តរបស់អាមេរិក ដោយរដ្ឋបាលលោក ចូ បៃឌិន ដើម្បីបង្អាក់ការកើនឡើងតម្លៃប្រេង ដោយសារតែអង្គការ OPEC កាត់បន្ថយការផលិតប្រេង និងនៅបន្ទាប់ពីអាមេរិកបានហាមឃាត់លើការនាំចូលប្រេងរបស់រុស្ស៊ី ក្រោយការឈ្លានពានទៅលើអ៊ុយក្រែន។ យ៉ាងណាមិញ ការបញ្ចេញលក់នេះ បានធ្វើឱ្យប្រេងបម្រុងធ្លាក់ចុះនៅត្រឹមប្រហែល ៣៨០លានបារ៉ែល ដែលជាកម្រិតទាបបំផុត គិតចាប់តាំងពីឆ្នាំ១៩៨៤មក ដែលបង្កើនក្តីបារម្ភពីសន្តិសុខថាមពលជាតិរបស់អាមេរិក។
អត្ថបទគួរអាន
ដើម្បីទប់ស្កាត់ហានិភ័យនេះ ច្បាប់មួយដែលត្រូវបានសភាអាមេរិកបោះឆ្នោតសម្រេចកាលពីពេលថ្មីៗនេះ ដឹកនាំដោយលោកស្រី ខាធី មេកម៉ូរីា រូតជឺ (Cathy McMorris Rodger)ប្រធានគណៈកម្មាធិការថាមពល និងពាណិជ្ជកម្មរបស់សភាអាមេរិកមកពីគណបក្សសាធារណរដ្ឋ នឹងទៅកំណត់សិទ្ធិអំណាចរបស់ប្រធានាធិបតីក្នុងការបញ្ចេញប្រេងបម្រុងយុទ្ធសាស្រ្ត ប៉ុន្តែអាចបញ្ចេញលក់បានតែក្នុងករណីមានការរំខានការផ្គត់ផ្គង់ថាមពលធ្ងន់ធ្ងរតែប៉ុណ្ណោះ។
លោកស្រីរូតជឺ បានលើកឡើងថា ច្បាប់នេះគឺនឹងមិនជះឥទ្ធិពលដល់សិទ្ធិអំណាចរបស់ក្រសួងថាមពលអាមេរិកនោះទេ។ បន្ថែមពីនេះ លោកស្រីបានចោទថា ក្រសួងនេះមិនបានគ្រប់គ្រងឱ្យបានល្អនូវប្រេងបម្រុងនេះដោយគ្មានផែនការជាក់លាក់ក្នុងការបំពេញវាឡើងវិញឡើយ។ កន្លងមក តំណាងរាស្រ្តមកពីគណបក្សសាធារណរដ្ឋរូបនេះ បានចោទប្រកាន់លោកបៃឌិនថា បានប្រើប្រាស់ប្រេងបម្រុងនេះ ទៅបិទបាំងនូវគោលនយោបាយបរាជ័យរបស់លោក ហើយបានបណ្តាលឱ្យតម្លៃថាមពលឡើងថ្លៃ និងអតិផរណាកើនឡើង។
សូមជម្រាបថា បើតាមការប៉ាន់ស្មានរបស់ក្រសួងហិរញ្ញវត្ថុអាមេរិក ការបញ្ចេញប្រេងពីស្តុកបម្រុងនេះ គឺបានបន្ទាបតម្លៃប្រេងលើទីផ្សាររហូតដល់ ៤០%។ គិតចាប់តាំងពីឆ្នាំ២០១៧មក ប្រេងភាគច្រើន ដែលយកចេញពីប្រេងបម្រុងទុក គឺត្រូវបានលក់ទៅឱ្យក្រុមហ៊ុនអាមេរិកតែប៉ុណ្ណោះ ចំណែកការលក់ទៅប្រទេសចិននោះ គឺមានតិចជាង ៣%៕
អត្ថបទ ៖ នៅ សំភី
