រដ្ឋមន្ត្រីការបរទេសអាមេរិក ប្រកាសពីគម្រោងតម្លៃ ២៥ លានដុល្លារលើកម្ពស់សន្ដិសុខស្បៀង និងកំណើនវិស័យកសិកម្មកម្ពុជា

លោក Antony J. Blinken រដ្ឋមន្ត្រីការបរទេសអាមេរិក បាន​ជឿជាក់ថា គម្រោងកម្ពុជាហាវែស III ដែលមានទំហំទឹកប្រាក់​២៥លានដុល្លារអាមេរិក ដែលទើបប្រកាសឡើងនេះ វាពិតជាមានសារៈសំខាន់ដែលយើង​ត្រូវពង្រឹងនូវសន្តិសុខស្បៀងពិភពលោក និង​ដោះស្រាយឬសគល់នៃភាពអត់ឃ្លាន កង្វះអាហារូបត្ថម្ភ និង​ភាពក្រីក្រ។

គម្រោង កម្ពុជាហាវែស III នឹងធ្វើការជាមួយដៃគូកម្ពុជាក្នុងវិស័យកសិកម្ម អ្នកផ្តល់បច្ចេកវិទ្យា ស្ថាប័នហិរញ្ញវត្ថុ និង​ភាគីពាក់ព័ន្ធវិស័យឯកជនដទៃទៀត ដើម្បីអភិវឌ្ឍនូវកម្លាំងការងារជំនាញ បង្កើតការងារ និង​ចាប់យកឱកាសទីផ្សារសម្រាប់កសិករ ។

បន្ថែមពីនេះ គម្រោង កម្ពុជាហាវែស III នឹងកសាងបន្ថែមលើការវិនិយោគដែលទីភ្នាក់ងារជំនួយអាមេរិកUSAID បានធ្វើ​អស់រយៈពេលជាងមួយទសវត្សរ៍មកហើយ តាមរយៈការលើកកម្ពស់ឱកាសសេដ្ឋកិច្ច​ប្រកប​ដោយចីរភាព ណែនាំនូវបច្ចេកវិទ្យាកសិកម្មវៃឆ្លាតបែបធន់នឹងអាកាសធាតុ និង​លើកកម្ពស់ជីវភាពរស់នៅរបស់ប្រជាជនកម្ពុជា ជាពិសេសស្ត្រី យុវជន និង​ប្រជាជនងាយរងគ្រោះ ។

សូមបញ្ជាក់ថា ក្នុងរយៈពេល៥ឆ្នាំ នៃកម្ពុជាហាវែស III ទីភ្នាក់ងារជំនួយអាមេរិក USAID រំពឹងថានឹងរកបានចំនួន ៣៩ លានដុល្លារ ក្នុងការវិនិយោគវិស័យឯកជនថ្មី, បង្កើតការងារថ្មីជាង ៣ ពាន់កន្លែង, ជួយដល់បណ្តារធុរកិច្ចនិងអ្នកផលិតក្នុងវិស័យកសិកម្មកម្ពុជា ឲ្យទទួលបានហិរញ្ញប្បទាន ១៥ លានដុល្លារ និងរកបាន​ ១០០ លានដុល្លារ ពីការលក់ផងដែរ៕