នាពេលកន្លងមក រុស្ស៊ី និងសហរដ្ឋអាមេរិក ដែលជាមហាអំណាចនុយក្លេអ៊ែរដ៏ធំបំផុតរបស់ពិភពលោកនោះ បានចរចាជាហូរហែរនូវសន្ធិសញ្ញាជាយុទ្ធសាស្ត្រសំខាន់ៗនានា ក្នុងការកាត់បន្ថយថាមពលអាវុធនុយក្លេអ៊ែរ ចាប់តាំងពីរដ្ឋការ លោក រ៉ូណាល់ រេហ្គេន (Ronald Reagan) អតីតប្រធានាធិបតីអាមេរិក ឡើងកាន់អំណាចក្នុងឆ្នាំ ១៩៨១ មកម៉េះ។
ប៉ុន្តែការឈ្លានពានរបស់រុស្ស៊ីលើអ៊ុយក្រែនបានបង្កឱ្យមានការរំខានយ៉ាងធ្ងន់ធ្ងរបំផុតទៅលើទំនាក់ទំនងរវាងរុស្ស៊ី និងលោកខាងលិច បើគិតចាប់តាំងពីវិបត្តិមីស៊ីលគុយបាឆ្នាំ ១៩៦២ មក ដែលនៅពេលនោះមនុស្សម្នាបានប្រមានថា ពិភពលោកកំពុងស្ថិតនៅមាត់ជ្រោះនៃសង្គ្រាមនុយក្លេអ៊ែររវាងអាមេរិក និងរុស្សី។
គួររំលឹកថា លោក មេដវេដេវ ដែលបានធ្វើជាប្រធានាធិបតីរុស្សីចន្លោះពីឆ្នាំ ២០០៨ ដល់ ឆ្នាំ ២០១២ បានចុះហត្ថលេខាលើសន្ធិសញ្ញាកាត់បន្ថយអាវុធនុយក្លេអ៊ែរយុទ្ធសាស្ត្រ (New START0) មួយជាមួយអតីតប្រធានាធិបតីអាមេរិក លោក បារ៉ាក អូបាម៉ា (Barack Obama) ក្នុងឆ្នាំ ២០១០ កន្លងទៅនៅទីក្រុងប្រាក នៃសាធារណៈរដ្ឋក្រិច ដែលសន្ធិសញ្ញានេះត្រូវបានធ្វើឡើងនៅខែកុម្ភៈ ឆ្នាំ ២០២១ ហើយត្រូវបានបន្តសម្រាប់រយៈពេល ៥ ឆ្នាំរហូតដល់ឆ្នាំ ២០២៦ ខាងមុខ ។
លោក មេដវេដេវ ដែលជាអតីតប្រធានាធិបតីរុស្ស៊ី តែបច្ចុប្បន្នមានតួនាទីជាអនុប្រធានក្រុមប្រឹក្សាសន្តិសុខជាតិរុស្ស៊ីនោះ បាននិយាយនៅក្នុងកិច្ចពិភាក្សាមួយតាមតេលេក្រាមថា រុស្ស៊ីគ្មានទំនាក់ទំនងអ្វីសោះឡើយជាមួយសហរដ្ឋអាមេរិកនៅពេលនេះ ហើយលោកសង្កត់ធ្ងន់ថា រុស្សីមិនមានរឿងអ្វីចាំបាច់ក្នុងការចរចាការរំសាយអាវុធនុយក្លេអ៊ែរជាមួយអាមេរិកនោះដែរ ដោយថា វាជារឿងមិនត្រឹមត្រូវសោះឡើយ សម្រាប់រុស្សី ហើយវាគួរតែទុកឲ្យអាមេរិកជារត់មករករុស្ស៊ីវិញទើបជាការប្រសើរ។
អត្ថបទគួរអាន
គួរជម្រាបបន្តិចថា បើយោងតាមវិទ្យាស្ថានសហព័ន្ធវិទ្យាសាស្ត្រអាមេរិកបានឱ្យដឹងថា ប្រទេសរុស្ស៊ី និងសហរដ្ឋអាមេរិកបានគ្រប់គ្រងប្រហែល ៩០% នៃក្បាលគ្រាប់នុយក្លេអ៊ែររបស់ពិភពលោក ជាមួយនឹងក្បាលគ្រាប់ប្រហែល ៤០០០ គ្រាប់នៅក្នុងឃ្លាំងយោធារបស់ពួកគេ។
យ៉ាងណាមិញ លោក មេដវេដេវ អតីតប្រធានាធិបតីរុស្ស៊ី បានផ្តល់យោបល់ថា បើរុស្សីចង់កែប្រែទំនាក់ទំនងឲ្យកាន់តែប្រសើរឡើងជាមួយលោកខាងលិចនោះ ទីក្រុងមូស្គូគួរតែបង្ហាញពីជំហរតឹងរ៉ឹងជាងនេះជាមួយសហរដ្ឋអាមេរិក។
ចំពេលដែលទំនាក់ទំនងរវាងសហរដ្ឋអាមេរិក និងរុស្សីកំពុងតែប្រេះឆាកាន់តែខ្លាំងទៅៗ សង្គ្រាមនៅអ៊ុយក្រែនបានឈានចូលដល់ដំណាក់កាលដ៏អាក្រក់បំផុតមួយក្នុងប៉ុន្មានសប្តាហ៍ថ្មីៗនេះ ដោយកងទ័ពរុស្ស៊ីបានប្រមូលផ្តុំកងកម្លាំងកាំភ្លើងធំរបស់ខ្លួនទៅលើផ្នែកដែលគ្រប់គ្រងដោយអ៊ុយក្រែននៃទីក្រុង Donbas ដែលទីក្រុងម៉ូស្គូបានប្រគល់តំបន់ដែលដណ្តើមបានទាំងនោះឲ្យពួកបំបែកខ្លួនវិញ។
អភិបាលក្រុងលូហាន (Luhansk) លោក ស៊ើហ៊ី ហ្កៃដៃ (Serhiy Gaidai) បាននិយាយថា កងកម្លាំងរុស្ស៊ីបានគ្រប់គ្រងភាគច្រើននៃទីក្រុងសៀវរីរ៉ូដូណេក (Sievierodonetsk) នៅក្រៅពីរោងចក្រគីមីអាហ្សូត (Azot) ជាកន្លែងដែលជនស៊ីវិលរាប់រយនាក់បានជ្រកកោនជាច្រើនសប្តាហ៍។
មួយវិញទៀត យោធាអ៊ុយក្រែនបានគូសបញ្ជាក់ថា នៅទីក្រុងអូដេសា (Odesa) ដែលជាកំពង់ផែសមុទ្រខ្មៅដ៏ធំបំផុតរបស់អ៊ុយក្រែន ដែលត្រូវបានហ៊ុមព័ទ្ធដោយកងទ័ពជើងទឹករុស្ស៊ីកាលពីថ្ងៃចន្ទសប្ដាហ៍នេះ ដោយរុស្សីបានវាយប្រហារដោយមីស៊ីលដែលបានបំផ្លាញឃ្លាំងស្តុកស្បៀងអាហាររបស់អ៊ុយក្រែនផងដែរ។
ទោះជាបែបនេះក្តី ក្តីបារម្ភេបស់ពិភពលោកបានផ្តោតលើការរកដំណោះស្រាយ គឺក្នុងការស្តារការនាំចេញគ្រាន់ធញ្ញជាតិរបស់អ៊ុយក្រែនឡើងវិញ ដែលឥឡូវនេះត្រូវបានបិទផ្លូវដោយរុស្ស៊ី។ ហើយអ៊ុយក្រែនគឺជាប្រភពនាំមុខគេមួយរបស់ពិភពលោកនៃគ្រាប់ធញ្ញជាតិ និងប្រេងចម្អិនអាហារ ដែលនាំឱ្យមានការភ័យខ្លាចនៃកង្វះខាតអាហារជាសកលក្នុងរយៈពេលវែងសម្រាប់ពិភពលោកផងដែរ៕
អត្ថបទ៖ ហ៊ុន គន្ធថៃ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
