ការបន្ថែមក្រុមហ៊ុនចិនចូលក្នុងបញ្ជីខ្មៅ ដែលមិនត្រូវបានជូនដំណឹងពីមុនមកនោះ ត្រូវបានគេមើលឃើញថា គឺជាកិច្ចខិតខំប្រឹងប្រែងចុងក្រោយមួយរបស់ប្រធានាធិបតីអាមេរិក លោក ដូណាល់ ត្រាំ ដើម្បីរឹតបន្ដឹងទៅលើប្រទេសចិន ដែលវាត្រូវបានគេចាត់ទុកថា គឺជាកេរដំណែលរបស់លោកត្រាំក្នុងពេលលោកកាន់តំណែងប្រធានាធិបតីអាមេរិក។ ការគ្រោងដាក់បញ្ចូលក្រុមហ៊ុនចិនបន្ថែមចូលក្នុងបញ្ជីខ្មៅនេះ គឺវាបានកើតឡើងនៅមុនពេលដែលប្រធានាធិបតីជាប់ឆ្នោត លោក ចូ បៃដិន នឹងត្រូវចូលកាន់តំណែងនៅថ្ងៃទី ២០ ខែមករាខាងមុខនេះ។
អត្ថបទទាក់ទង!
ជាសរុប សហរដ្ឋអាមេរិករំពឹងថា នឹងបញ្ចូលបន្ថែមក្រុមហ៊ុនប្រហែល ៨០ ចូលទៅក្នុងបញ្ជីពាណិជ្ជកម្មខ្មៅរបស់អាមេរិក ដែលគេហៅថា Entity List ហើយមានស្ទើរតែទាំងអស់នៃក្រុមហ៊ុនទាំងនោះ គឺជាក្រុមហ៊ុនចិន។
ក្រោមការរៀបចំដោយក្រសួងពាណិជ្ជកម្មអាមេរិក ត្រូវបានគេរំពឹងថា នឹងដាក់ឈ្មោះ ចិនមួយចំនួន ដែលទីក្រុងវ៉ាស៊ិនតោន និយាយថា មានទំនាក់ទំនងជាមួយនឹងយោធាចិន ដែលក្នុងនោះ ខ្លះកំពុងជួយសាងសង់ និងធ្វើចលនាយោធានៅលើកោះសិប្បនិម្មិត នៅសមុទ្រចិនខាងត្បូង ក៏ដូចជាមួយចំនួនទៀត ពាក់ព័ន្ធនឹងការរំលោភសិទ្ធិមនុស្ស។ នេះបើតាមការអះអាងរបស់ប្រភពព័ត៌មានដែលបានប្រាប់ Reuters។
រដ្ឋបាលលោកត្រាំ តែងតែប្រើបញ្ចីពាណិជ្ជកម្មខ្មៅនេះ ដោយគិតមកទល់ឥឡូវនេះ បានដាក់បញ្ចូលជាង ២៧៥ ក្រុមហ៊ុន និងអ្នកពាក់ព័ន្ធដែលមានមូលដ្ឋាននៅក្នុងប្រទេសចិន ចូលបញ្ជីនេះរួចហើយ ដើម្បីវាយប្រហារដល់ឧស្សាហកម្មស្នូលរបស់ចិន។
ក្រុមហ៊ុនទាំងនោះ រួមបញ្ចូលទាំង ក្រុមហ៊ុនយក្សក្នុងឧស្សាហកម្មទូរគមនាគមន៍របស់ចិន គឺ Huawei Technologies Co និងក្រុមហ៊ុនជាប់ពាក់ព័ន្ធប្រមាណ ១៥០ទៀត, ខណៈដែលក្រុមហ៊ុន ZTE Corp ក៏មានជាប់ទាក់ទងនៅក្នុងបញ្ជីខ្មៅរបស់អាមេរិកនេះដែរ រួមទាំងក្រុមហ៊ុនមួយចំនួនទៀត។ អ្វីដែលគួរឲ្យចាប់អារម្មណ៍ គឺថ្មីៗក្រុមហ៊ុន SMIC ដែលជាក្រុមហ៊ុនចិនផលិតឧបករណ៍អេឡិចត្រូនិកអន្តរជាតិដ៏ធំមួយ ក៏បានស្ថិតនៅក្នុងផ្ទាំងស៊ីបបញ្ជីខ្មៅរបស់អាមេរិកដែរ។
កាលពីខែមុននេះ ក្រសួងការពារជាតិរបស់អាមេរិក ក៏បានដាក់បន្ថែមក្រុមហ៊ុនចិនមួយចំនួន ចូលបញ្ជីខ្មៅដែរ ដោយបានចោទប្រកាន់ថា មានជាប់ទាក់ទងនឹងយោធោចិន ដែលបានហាមឃាត់វិនិយោគអាមេរិកមិនឲ្យទិញភាគហ៊ុនពីក្រុមហ៊ុនចិនទាំងនោះ កាលពីឆ្នាំមុននេះ។
ក្រុមហ៊ុន SMIC បានបញ្ជាក់ម្ដងហើយម្ដងទៀតថា ខ្លួនមិនបានជាប់ពាក់ព័ន្ធនឹងយោធោចិននោះទេ។ ទោះជាបែបនេះក្ដី ក្រសួងពាណិជ្ជកម្មអាមេរិក នៅតែរំពឹងថា នឹងដាក់បញ្ចូលក្រុមហ៊ុន SMIC និងក្រុមហ៊ុនពាក់ព័ន្ធ ចូលទៅក្នុងបញ្ជីខ្មៅនេះ ឲ្យខាងតែបាន។
ចំណងទំនាក់ទំនងរវាងទីក្រុងវ៉ាស៊ិនតោន និងទីក្រុងប៉េកាំង បានក្លាយជាប្រឈមមុខតតាំងគ្នាកាន់តែខ្លាំងឡើងៗ នៅប៉ុន្មានឆ្នាំកន្លងមកនេះ នៅពេលដែលប្រទេសមហាអំណាចសេដ្ឋកិច្ចពិពភលោកទាំងពីរនេះ បានតតាំងគ្នាចំពោះការគ្រប់គ្រងរបស់ទីក្រុងប៉េកាំង ក្នុងការគ្រប់គ្រងការផ្ទុះរាលដាលនៃមេរោគកូវីដ-១៩។ បន្ថែមពីនេះ ក៏មានការប្រឆាំងតបតគ្នារវាងការដាក់ចេញនូវច្បាប់សន្ដិសុខជាតិនៅទីក្រុងហុងកុង និងការកើនឡើងភាពតានតឹងនៅឯសមុទ្រចិនខាងត្បូងជាដើម៕
None
