គោលនយោបាយតម្រូវឱ្យធ្វើការតែ៤ថ្ងៃក្នុងមួយសប្ដាហ៍របស់ឥណ្ឌូនេស៊ី បង្កឱ្យផ្ទុះប្រតិកម្មចម្រុះ
កាលពីពេលថ្មីៗនេះ ប្រទេសឥណ្ឌូណេស៊ី ដែលជាបងធំក្នុងតំបន់អាស៊ាន បានដាក់ចេញគោលនយោបាយគួរឱ្យភ្ញាក់ផ្អើល ដែលតម្រូវឱ្យធ្វើការតែ៤ថ្ងៃ ក្នុងមួយសប្ដា…
អ្នកនាំពាក្យក្រសួងការបរទេសបាននិយាយកាលពីថ្ងៃព្រហស្បតិ៍ ថា ក្រុមហ៊ុនរថយន្តអគ្គិសនី ថេស្លា របស់លោក អេឡិន ម៉ាស់ គឺជាក្រុមហ៊ុនតែមួយគត់ដែលទទួលបានការចាប់អារម្មណ៍ពីរដ្ឋាភិបាលសហព័ន្ធក្នុងការទិញរថយន្តអគ្គិសនីមួយចំនួនសម្រាប់ក្រសួងការបរទេសរបស់អាម៉េរិក កាលពីខែឧសភា ឆ្នាំ២០២៤ នៅពេលលោក ចូ បៃដិន ធ្វើជាប្រធានាធិបតី។
ប៉ុន្តែពេលនេះរដ្ឋបាលក្រោមការដឹកនាំរបស់លោក ត្រាំ ដែលជាមេរបស់លោក ម៉ាស់ នោះបានផ្អាកផែនការទិញរថយន្តអគ្គិសនីនេះវិញ ក្រោយពីមានការលេចលឺនូវព័ត៌មានអំពីការចំណាយដ៏ច្រើនសន្ធឹកសន្ធាប់រហូតដល់៤០០លានដុល្លារ។
ផែនការទិញរថយន្តអគ្គិសនីនេះត្រូវបានគេមើលឃើញថា ជាកិច្ចព្រមព្រៀងដ៏ធំបំផុតរបស់ក្រុមហ៊ុន Tesla សម្រាប់ឆ្នាំនេះ ហើយវាក៏បានបង្ហាញពីរបៀបដែលលោក ម៉ាស់ រកបានប្រាក់ចំណូលតាមការបង់ពន្ធផងដែរ មុនពេលផែនការនេះត្រូវបានផ្អាកទៅវិញ ខណៈក្រុមហ៊ុនរបស់លោកទទួលបានមូលនិធិរាប់រយលានដុល្លារក្នុងមួយឆ្នាំៗក្នុងកិច្ចសន្យាសហព័ន្ធ។
ជាក់ស្ដែងក្រុមហ៊ុន SpaceX របស់លោក ម៉ាស់ បានទទួលប្រាក់ជិត២០ពាន់លានដុល្លារនៅក្នុងមូលនិធិសហព័ន្ធចាប់តាំងពីឆ្នាំ២០០៨ ដើម្បីដឹកជញ្ជូនអវកាសយានិក និងបាញ់បង្ហោះផ្កាយរណបទៅកាន់លំហអវកាស។ ដោយឡែកក្រុមហ៊ុន Tesla ក៏បានទទួលប្រាក់ចំនួនជិត៤២លានដុល្លាររួចហើយពីរដ្ឋាភិបាលសហរដ្ឋអាម៉េរិករួមទាំងការទូទាត់សម្រាប់ថ្លៃរថយន្តដែលផ្តល់ទៅឱ្យស្ថានទូតអាម៉េរិកមួយចំនួនផងដែរ។
អ្នកនាំពាក្យក្រសួងការបរទេសអាម៉េរិក បានអះអាងថា ពេលនេះ គ្មានកិច្ចសន្យាណាមួយដែលរដ្ឋាភិបាលបានធ្វើជាមួយនឹងក្រុមហ៊ុនថេស្លា ឬក៏ក្រុមហ៊ុនណាមួយដើម្បីផលិតរថយន្តសម្រាប់ក្រសួងការបរទេសអាម៉េរិកនោះទេ។ ប៉ុន្តែអ្នកនាំពាក្យរូបនេះបានអះអាងថា ក្រសួងបរទេសអាម៉េរិកទំនងជាបញ្ចូលក្រុមហ៊ុនផលិតរថយន្តអាល្លឺម៉ង់ BMW ក្នុងបញ្ជីនៃការទិញរថយន្តជំនួសឱ្យក្រុមហ៊ុនថេស្លា៕
អត្ថបទ៖ សុខ មង្គល
