ទោះយ៉ាងណា ការស៊ើបអង្កេតនេះ ក៏អាចប៉ះទង្គិចដល់ក្រុមអ្នកអភិវឌ្ឍន៍គម្រោងថាមពលស្អាតនៅអាមេរិក ដែលពឹងផ្អែកលើការនាំចូលបន្ទះសូឡាមានតម្លៃថោកពីប្រទេសអាស៊ីគ្នេយ៍ ដើម្បីទប់ការចំណាយរបស់ពួកគេផងដែរ។ នេះបើតាមការរាយការណ៍ដោយរ៉យទ័រ។
បើទោះបីជា ការស៊ើបអង្កេតមានលទ្ធផលបែបណាក៏ដោយ ប៉ុន្ដែ ការសម្រេចចិត្តរបស់ក្រសួងពាណិជ្ជកម្មអាមេរិក ក្នុងការបើកឲ្យមានការស៊ើបអង្កេតលើក្រុមហ៊ុនផលិតបន្ទះសូឡាពីប្រទេសអាស៊ីអាគ្នេយ៍ចំនួន៤ រួមមានថៃ ម៉ាឡេស៊ី វៀតណាម និងកម្ពុជានេះ វាគឺជាជ័យជម្នះរួចទៅហើយសម្រាប់ក្រុមហ៊ុនផលិតបន្ទះសូឡា Auxin Solar ដែលជាក្រុមហ៊ុនផលិតបន្ទះសូឡាដែលមានអាយុកាលវែងជាងគេបំផុតនៅអាមេរិក។ ដ្បិតថាក្រុមហ៊ុនដែលមានមូលដ្ឋាននៅទីក្រុងសានចូស (San Jose) នៅរដ្ឋកាលីហ្វ័រញ៉ាមួយនេះ ទើបតែបានស្នើសុំអាជ្ញាធរអាមេរិកឲ្យបើកការស៊ើបអង្កេតលើការនាំចូលបន្ទះសូឡានេះ ដោយសម្អាងលើហេតុផលថា ក្រុមហ៊ុនផលិតសូឡារបស់ចិនមួយចំនួនបានមកបើកអាជីវកម្មបន្ទះសូឡា នៅតាមប្រទេសទាំងអាស៊ីអាគ្នេយ៍ ដើម្បីនាំចេញបន្ទះសូឡាទៅអាមេរិក ដោយរួចផុតពីការបង់ពន្ធរបស់សហរដ្ឋអាមេរិក ព្រោះថាអាមេរិកបានដាក់ពន្ធលើបន្ទះសូឡាពីចិនមករយៈពេលជិតមួយទសវត្សរ៍មកហើយ។
អត្ថបទគួរអាន
ញត្តិដែលត្រូវបានស្នើឡើងដោយក្រុមហ៊ុនAuxin នេះ គឺជាកិច្ចខិតខំប្រឹងប្រែងចុងក្រោយបង្អស់របស់ក្រុមហ៊ុនផលិតបន្ទះសូឡារបស់សហរដ្ឋអាមេរិកមួយនេះ ដើម្បីទប់ស្កាត់លំហូរបន្ទះសូឡាអាស៊ី ដែលមានតំលៃថោកមកពីប្រទេសតំបន់អាស៊ី ដោយបានអះអាងថា វាបានធ្វើឱ្យផលិតផលរបស់ពួកគេមិនអាចប្រកួតប្រជែងនៅលើទីផ្សារបាន។
អ្នកជំនាញនៅក្នុងឧស្សាហកម្មនេះបានមើលឃើញថា ការស៊ើបអង្កេតពីករណីនាំចូលបន្ទះសូឡាពីអាស៊ីអាគ្នេយ៍ទៅអាមេរិកនេះ វាននឹងបន្ទច់បង្អាក់ដល់ការអភិវឌ្ឍគម្រោងថាមពលស្អាត ហើយថែមទាំងប៉ះពាល់ដល់វឌ្ឍនភាពរបស់សហរដ្ឋអាមេរិកក្នុងការដោះស្រាយការប្រែប្រួលអាកាសធាតុផងដែរ។
ប្រធានាធិបតីអាមេរិកលោក Joe Biden បានកំណត់គោលដៅរបស់ខ្លួនក្នុងការកាត់បន្ថយការប្រើអគ្គិសនីផលិតចេញពីប្រេងឥន្ធនៈនៅត្រឹមឆ្នាំ២០៣៥ ហើយវាជាគោលដៅមួយដែលអាចជំរុញឱ្យមានការផ្គត់ផ្គង់បន្ទះសូឡាមានរហូតដល់ទៅ៤០% នៃតម្រូវការអគ្គិសនីរបស់អាមេរិកពោលគឺកើនឡើងពីអត្រា ៣% ដែលមាននាពេលបច្ចុប្បន្ននេះ។
អាមេរិកបាននាំចូលបន្ទះសូឡាពីប្រទេសម៉ាឡេស៊ី ថៃ វៀតណាម និងកម្ពុជា ប្រហែល ៨០%នៃបន្ទះសូឡាដែលរំពឹងថានឹងត្រូវបានដំឡើងនៅក្នុងសហរដ្ឋអាមេរិកនៅឆ្នាំនេះ។ នេះបើយោងតាមក្រុមឧស្សាហកម្មថាមពលស្អាតរបស់អាមេរិក។
នាយិកាប្រតិបត្តិសមាគមពាណិជ្ជកម្មអាមេរិកលោកស្រី ហ៊ីធឺ ហ្ស៊ីឆល់ (Heather Zichal) បាននិយាយក្នុងសន្និសីទព័ត៌មានថា ការសម្រេចចិត្តនេះនឹងរាំងស្ទះដល់ការអភិវឌ្ឍវិស័យឧស្សាហកម្មថាមពលព្រះអាទិត្យរបស់សហរដ្ឋអាមេរិក។ និយាយឱ្យត្រង់ទៅគឺថា ចំណាត់ការរបស់ក្រសួងពាណិជ្ជកម្មអាមេរិកក្នុងការផ្តួចផ្តើមឱ្យមានការស៊ើបអង្កេតនេះឡើង គឺជាគ្រោះមហន្តរាយមួយសម្រាប់ឧស្សាហកម្មបន្ទះសូឡារបស់អាមេរិកផ្ទាល់តែម្ដង ព្រោះថា អាមេរិកគឺពឹងផ្អែកខ្លាំងលើការនាំចូលបន្ទះសូឡាដែលមានតម្លៃថោកពីប្រទេសនៅអាស៊ីគ្នេយ៍ទាំងនេះ ដើម្បីបំពេញតម្រូវការប្រើប្រាស់របស់ខ្លួននាពេលបច្ចុប្បន្ន និងអនាគត៕
អត្ថបទ៖ សុខ ជា
None
