នៅដើមសប្ដាហ៍នេះ លោក គ្រីស្តូហ្វើ ក្រេឌី (Christopher Grady) ជាអនុប្រធាននៃអគ្គសេនាធិការចម្រុះអាមេរិកបាននិយាយក្នុងសន្និសីទខ្លីមួយថា សំណើសុំថវិការបស់រដ្ឋបាលលោកចូ បៃឌិន នៅតែស្របតាមវិធីសាស្ត្រជាយុទ្ធសាស្ត្ររបស់អាមេរិក និងផ្តោសំខាន់ចំពោះប្រទេសចិន ដែលជាបញ្ហាប្រឈមបំផុតក៏ដូចជាបញ្ហាដ៏ស្រួចស្រាល់ និងការគំរាមកំហែងរបស់ប្រទេសរុស្ស៊ីផងដែរ ដោយបញ្ហាទាំងនេះ គឺជាអ្វីដែលអាមេរិកផ្ដោតការយកចិត្តទុកដាក់ខ្លាំងបំផុត។
កញ្ចប់ថវិកាដែលលោក បៃដិន ស្នើសុំចំនួន ជិត៦ ទ្រីលាននោះ រួមមានសំណើសម្រាប់ចំណាយសន្តិសុខជាតិចំនួន ៨១៣ ពាន់លានដុល្លារសម្រាប់ឆ្នាំសារពើពន្ធ ២០២៣ ជាមួយគ្នានោះទឹកប្រាក់ ៧៧៣ ពាន់លានដុល្លារនឹងយកទៅចំណាយសម្រាប់មន្ទីរបញ្ចកោណ ដែលទំហំទឹកប្រាក់នេះ គឺមានលើសពីកញ្ចប់ថវិកាដែលសភាអាមេរិកអនុម័តនៅក្នុងឆ្នាំ២០២២ចំនួន ៣០ពាន់លានដុល្លារអាមេរិក។
ក្នុងចំណោមកញ្ចប់ថវិកាសម្រាប់មន្ទីរបញ្ចកោណនេះគឺប្រហែល ១ភាគ៣ នឹងទុកសម្រាប់ការវិនិយោគ រួមទាំងសម្រាប់ការស្រាវជ្រាវ និងការផ្គត់ផ្គង់សព្វាវុធផងដែរ។
ចំណែកថវិកាចំនួន ១៣៥ ពាន់លានដុល្លារទៀតនឹងទុកសម្រាប់វិនិយោគលើការត្រៀមលក្ខណៈយោធា ហើយកម្មវិធីនុយក្លេអ៊ែរ របស់អាមេរិក ដែលជាយុទ្ធសាស្ត្រមុខ៣នៃការរួមគ្នារវាងកាំជ្រួចផ្លោងអន្តរទ្វីបបាញ់ចេញពីដី យន្តហោះទម្លាក់គ្រាប់បែក និងនាវាមុជទឹកបំពាក់អាវុធនុយក្លេអ៊ែរ នឹងទទួលបានថវិកាបន្ថែមជាង ៣៤ ពាន់លានដុល្លារ។
អត្ថបទគួរអាន
ថវិកាដែលលោកចូ បៃដិនស្នើឡើងនោះ ក៏នឹងរួមបញ្ចូលផងដែរនូវសំណើសុំចំនួនជាង ៦០ ពាន់លានដុល្លារសម្រាប់ក្រសួងការបរទេស និងជំនួយសហរដ្ឋអាមេរិកសម្រាប់ការអភិវឌ្ឍន៍អន្តរជាតិហៅថា USAID។ អាទិភាពរបស់កញ្ចប់ថវិកានេះគឺចំនួន ១,៦ ពាន់លានដុល្លារសម្រាប់គាំទ្រដល់សង្គ្រាមនៅអ៊ុយក្រែន និង ៤ ពាន់លានដុល្លារទៀតសម្រាប់ពង្រឹងសម្ព័ន្ធភាពនិងភាពជាអ្នកដឹកនាំរបស់សហរដ្ឋអាមេរិក«ប្រកួតប្រជែងប្រកបដោយប្រសិទ្ធភាពជាមួយចិន និងរុស្ស៊ី»។
ជាមួយគ្នានេះ ដើម្បីទប់ទល់នឹងឥទ្ធិពលសេដ្ឋកិច្ចរបស់ចិនដែលចេះតែកើនឡើងឥតឈប់ឈរនៅក្នុងតំបន់ឥណ្ឌូប៉ាស៊ីហ្វិកនេះ សហរដ្ឋអាមេរិកក៏បានលៃលកថវិកាទុកចំនួនជិត ២ពាន់លានដុល្លារដើម្បី «អនុវត្តយុទ្ធសាស្ត្រឥណ្ឌូប៉ាស៊ីហ្វិកដើម្បីគាំទ្រតំបន់ឥណ្ឌូប៉ាស៊ីហ្វិកឱ្យមានលក្ខណៈសេរី បើកចំហ តភ្ជាប់ សុវត្ថិភាព និងយូរអង្វែង» ផងដែរ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
