យោងតាមទិន្នន័យពីការិយាល័យជាតិ ស្ថិតិវៀតណាម បានបង្ហាញថា ប្រទេសវៀតណាម ទទួលបានភ្ញៀវអន្តរជាតិ ចំនួន៨,៨លាននាក់ នៅក្នុងឆមាសទី១ ដើមឆ្នាំ២០២៤ នេះ ដោយក្នុងនោះភ្ញៀវកូរ៉េខាងត្បូង មានចំនួនច្រើនជាងគេបំផុត បន្ទាប់មកគឺភ្ញៀវទេសចរចិន។ ទិនន័យដដែលបង្ហាញថា ភ្ញៀវកូរ៉េខាងត្បូង ដែលមកលេងប្រទេសវៀតណាម មានចំនួនច្រើនជាងគេបំផុតរហូតដល់ទៅជាង២,២លាននាក់ បន្ទាប់មក គឺភ្ញៀវចិន ដែលមានចំនួន១,៨លាននាក់ ភ្ញៀវតៃវ៉ាន់៦៣ម៉ឺននាក់ ភ្ញៀវអាម៉េរិក៤១ម៉ឺន៥ពាន់នាក់ ហើយភ្ញៀវជប៉ុនមានចំនួន៣៣ម៉ឺន៥ពាន់នាក់។
ទន្ទឹមនេះ ភ្ញៀវទេសចរទៅពីម៉ាឡេស៊ី មានចំនួន២៥ម៉ឺន៣ពាន់នាក់ ភ្ញៀវអូស្ត្រាលី២៤ម៉ឺន៣ពាន់នាក់ ភ្ញៀវឥណ្ឌា២៣ម៉ឺន៩នាក់ ភ្ញៀវកម្ពុជា២៣ម៉ឺន១ពាន់នាក់ និងភ្ញៀវថៃ២២ម៉ឺន៦ពាន់នាក់។
សូមបញ្ជាក់ថា ប្រទេសវៀតណាម បានដាក់គោលដៅទាក់ទាញភ្ញៀវទេសចរបរទេសឱ្យបាន១៨លាននាក់នៅក្នុងឆ្នាំ២០២៤ នេះ។
ដោយឡែក ប្រទេសថៃ ដែលជាប់ភូមិផងរបងជាមួយកម្ពុជាដែរជាមួយនឹងចំនួនប្រជាជនសរុបជាង៧០លាននាក់ទទួលបានភ្ញៀវទេសចរចំនួន១៧លាននាក់ក្នុងឆមាសទី១ ដើមឆ្នាំ២០២៤ នេះ ដោយក្នុងនោះភ្ញៀវចិនមានចំនួន៣,៥លាននាក់។
សូមបញ្ជាក់ថា ប្រទេសថៃ នៅពេលនេះបានដាក់គោលដៅទាក់ទាញភ្ញៀវទេសចរបរទេសឱ្យបានរហូតដល់ទៅ៣៦,៧លាននាក់នៅក្នុងឆ្នាំ២០២៤ នេះដែលខ្ពស់ជាងគោលដៅចាស់ដោយសារទទួលបានលទ្ធផលល្អប្រសើរខ្លាំងនៅក្នុងឆមាសទី១ ដើមឆ្នាំនេះ៕
ដោយ: តែម សុខុម
