លោក ប៊ុយ ហួង ម៉ៃ ប្រធានគ្រប់គ្រងសួនឧស្សាហកម្មនៅក្នុងខេត្តបាក់និញ ភាគខាងជើងប្រទេសវៀតណាម ដែលជាបណ្ដុំរោងក្រជាច្រើនរួមទាំងក្រុមហ៊ុន Samsung ផងនោះ បានឲ្យដឹងថា រដ្ឋាភិបាលវៀតណាមកំពុងលើកទឹកចិត្តឲ្យក្រុមហ៊ុនស្វែងរកវ៉ាក់សាំងកូវីដ-១៩ សម្រាប់យកមកចាក់ជូនកម្មករនិយោជិតរបស់ខ្លួន ខណៈដែលថ្មីៗនេះ នាយករដ្ឋមន្ត្រីវៀតណាម លោក ផាម មិញជីង ក៏បានស្នើដល់អាជ្ញាធរមូលដ្ឋាន ស្វែងរកការផ្គត់ផ្គង់វ៉ាក់សាំងផងដែរ។
អាជ្ញាធខេត្តបាក់និញ បានបញ្ជាឲ្យរោងចក្រត្រូវតែរៀបចំកន្លែងសម្រាកសម្រាប់កម្មកររបស់ខ្លួន ហើយក៏បន្ដឲ្យមានការដាក់ចេញនូវនីតិវិធីផ្សេងៗទៀត ដើម្បីធានាថាជួយឲ្យរោងចក្រនៅបន្ដប្រតិបត្តិការ នៅអំឡុងពេលមានការរឹតបន្ដឹងអំឡុងពេលគ្រប់គ្រងកូវីដ-១៩នេះ។
អត្ថបទទាក់ទង!
នៅខេត្តខ្លះទៀតក្នុងប្រទេសវៀតណាម ដែលជាកន្លែងរោងចក្រផ្គត់ផ្គង់ផលិតផលសម្រាប់ Apple និងSamsung ក៏កំពុងត្រូវបានអាជ្ញាធរជួយសម្របសម្រួលឲ្យបើកដំណើរការឡើងវិញផងដែរ បន្ទាប់ពីពួកគេ បានបិទនៅអំឡុងការរាតត្បាតកូវីដ-១៩។ សម្រាប់ខេត្ត ដែលមានឧស្សាហកម្មរោងចក្រច្រើនដូចជាខេត្ត បាក់និញ និងបាក់កៀង រដ្ឋាភិបាលវៀតណាមក៏បានផ្ដល់វ៉ាក់សាំងប្រមាណ២០ម៉ឺនដូស ដើម្បីចាក់ជូនកម្មករ នៅក្នុងរយៈពេល១សប្ដាហ៍ផងដែរ ក៏ប៉ុន្ដែ ចំនួននេះ គឺនៅមានតិចតួចនៅឡើយ។
មកទល់ពេលនេះ វៀតណាមមានប្រជាជនប្រមាណជាង១លាននាក់ប៉ុណ្ណោះ ដែលបានចាក់វ៉ាក់សាំងដូសទី១ ឬស្មើនឹងប្រហែលតែ១%ប៉ុណ្ណោះ នៃចំនួនប្រជាជនសរុប ខណៈដែលអ្នកដែលបានចាក់គ្រប់ចំនួន២ដូសវិញមានតែជិត៣ម៉ឺននាក់ប៉ុណ្ណោះ។
ចាប់តាំងពីចុងខែមេសាមក វៀតណាម ចាប់ផ្ដើមផ្ទុះការរាលដាលឆ្លងកូវីដ-១៩ចូលក្នុងសហគមន៍ជាថ្មី ហើយគិតមកទល់ពេលនេះ ប្រទេសក្បែរខាងកម្ពុជាមួយនេះ មានអ្នកឆ្លងសរុបជាង៧ពាន់ករណី និងមានអ្នកស្លាប់ ៤៧នាក់។
សូមបញ្ជាក់ថា ក្រោយពីមានការផ្ទុះរាលដាលឆ្លងកូវីដ-១៩រលកថ្មីមក វៀតណាមក៏បានផ្អាក និងរឹតបន្ដឹងជើងហោះហើរអន្តរជាតិតាមអាកាសយានដ្ឋានរបស់ខ្លួនជាច្រើនផងដែរ៕
None
