សម្តេចតេជោ ហ៊ុន សែន បានបញ្ជាក់ថា មានកត្តាសំខាន់ចំនួន ៤ ដែលជំរុញឲ្យ កម្ពុជា ចូលជាសមាជិកអាស៊ាន ហើយកត្តាមួយក្នុងចំណោមនោះ គឺទាក់ទងនឹង សមាហរណកម្មអាស៊ាន ដែលបានផ្តល់ប្រយោជន៍ជាច្រើនដល់ប្រទេសកម្ពុជា។
ក្រោយការចូលរួមជាមួយអាស៊ាន កម្ពុជាទទួលបានដៃគូពាណិជ្ជកម្មបន្ថែមទៀត ហើយក្នុងនោះ កម្ពុជាក៏មានក្របខ័ណ្ឌកិច្ចព្រមព្រៀងពាណិជ្ជកម្មសេរីអាស៊ាន តែយ៉ាងណា កម្ពុជា មិនបានប្រើប្រាស់វាឲ្យអស់សក្តានុពលនោះទេ ពោលគឺរវល់តែសម្លឹងមើលទីផ្សារឆ្ងាយៗ។
សម្តេចតេជោ បន្ថែមថា អាស៊ានក៏ជាច្រកទ្វារចេញនៃការទូតរបស់កម្ពុជា ដោយសារអាស៊ាន មានដៃគូច្រើន ដូច្នេះហើយនៅពេលដែលកម្ពុជាចូលអាស៊ាន គឺមានដៃគូស្រាប់នៅទីនោះ។ ជាក់ស្តែង កម្ពុជា មិនមែនមានតែ កិច្ចព្រមព្រៀងពាណិជ្ជកម្មសេរីអាស៊ាននោះទេ គឺបូកបន្ថែមនូវ កិច្ចព្រមព្រៀងពាណិជ្ជកម្មសេរីអាស៊ានបូកចិន, ជប៉ុន, កូរ៉េ, អាមេរិក និងបណ្តាមហាអំណាចសេដ្ឋកិច្ចជាច្រើនទៀត។
អត្ថបទទាក់ទង!
លើសពីនេះទៅទៀត វិស័យសេដ្ឋកិច្ចសង្គមរបស់កម្ពុជា ក៏មានការរីកចម្រើន អាស៊ាន មានគោលការណ៍កាត់បន្ថយគម្លាតរវាង បណ្តាប្រទេសជាសមាជិកអាស៊ាន ដែលមានការអភិវឌ្ឍ និងប្រទេសអាស៊ាន ដែលមានការអភិវឌ្ឍន៍តិច ដែលធ្វើឲ្យ ការបណ្តុះបណ្តាលធនធានមនុស្សរបស់អាស៊ានមានភាពល្អប្រសើរ។
គួរបញ្ជាក់បន្ថែមថា កត្តាសំខាន់មួយទៀតដែលនាំឲ្យកម្ពុជាសម្រេចចិត្តចូលអាស៊ាននោះគឺ គោលការណ៍មិនជ្រៀតជ្រែកចូលកិច្ចការផ្ទៃក្នុងនៃប្រទេសជាសមាជិក ដែលវាស្របតាមនឹង គោលនយោបាយទាំងក្នុង និងក្រៅប្រទេសរបស់កម្ពុជា។
លើសពីនេះទៅទៀត សម្តេចតេជោ ក៏បញ្ជាក់យ៉ាងច្បាស់ពីស្មារតីសហគមន៍ សំដៅដល់របៀបធ្វើការរបស់អាស៊ាន គឺធ្វើតាមរបៀបកុងសុងស៊ីស ឬហៅថា ឯកច្ឆន្ទ ដែលធ្វើដូច្នេះ គ្មានការបែងចែករវាង ប្រទេសតូច ឬធំ មាន ឬក្រ នោះឡើយ ឬហៅថា អាស៊ានមានសាមគ្គីភាព មិនមានបងតូចបងធំដូចនៅអឺរ៉ុបនោះទេ។
ជាចុងក្រោយ សម្តេចតេជោ ហ៊ុន សែន ក៏បានផ្តាំដល់អ្នកបន្តវេនពីសម្តេចឲ្យប្រកាន់ខ្ជាប់និងបន្តធ្វើការងាររបៀបកុងសុងស៊ីស សម្រាប់អាស៊ានជៀសវាងការបែកបាក់សហគមន៍៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
