ក្រុមសេដ្ឋវិទូ មកពី ក្រុមហ៊ុនសិង្ហបុរី Nomura Holdings បានពន្យល់ឲ្យដឹងថា ដោយសារតែការបង្វែរទិសដៅពាណិជ្ជកម្ម នៅលើសកលលោក ប្រទេសវៀតណាម ទទួលបានការកម្ម៉ង់ទិញទៅលើ មុខទំនិញដែលជាប់ពន្ធ ស្មើនឹង ៨ភាគរយនៃ ផលិតផលក្នុងស្រុកសរុបទៅហើយ គិតត្រឹមត្រីមាសទី ១ ឆ្នាំ ២០១៩នេះ។
រីឯ តៃវ៉ាន់ ក្លាយជាអ្នកឈ្នះទី ២ នៅក្នុងសង្គ្រាមពាណិជ្ជកម្មនេះ ដោយទទួលបានប្រហែល ២ភាគរយ នៃផលិតផលក្នុងស្រុកសរុប របស់ខ្លួនផងដែរ។
ទាំងអាមេរិក និងចិន សុទ្ធតែបានកម្ម៉ង់ទិញ ទំនិញច្រើនជាងពាក់កណ្តាល នៃទំនិញជាប់ពន្ធដោយសារជម្លោះទាំង ១,៩ពាន់មុខ ដូច្នោះហើយ ទើបមានការបង្វែរទិសពាណិជ្ជកម្ម ដែលកំណត់អ្នកឈ្នះ និងអ្នកចាញ់ នៅក្នុងសង្វាក់ផ្គត់ផ្គង់ផលិតកម្មពិភពលោកនេះ។
អត្ថបទទាក់ទង!
លោក ផាម ហុង ហៃ អគ្គនាយកនៃក្រុមហ៊ុន HSBC វៀតណាម ក៏បានឲ្យដឹងដែរថា អំឡុងពេលនេះ សង្វាក់ផលិតកម្មសកលលោក កំពុងតែផ្លាស់ប្តូរ មកកាន់តំបន់អាស៊ីអាគ្នេយ៍ ជាពិសេសគឺ វៀតណាម ក៏ដោយសារតែ សម្ពាធពីសង្គ្រាមពាណិជ្ជកម្ម និងការកើនឡើងថ្លៃផលិតកម្ម ដែលប៉ះពាល់ដល់ទីផ្សារ។
លោកបន្តថា វៀតណាម គឺមានហេដ្ឋារចនាសម្ព័ន្ធ និងបណ្តាញផលិតកម្ម ក្នុងដៃស្រាប់ តែមានការងារជាច្រើនទៀត ដែលត្រូវធ្វើ ដើម្បីចាប់យកការផ្លាស់ប្តូរដ៏ធំសម្បើមនេះ។
តួយ៉ាង អាជីវកម្មជាច្រើន ដែលចង់ចូលមកវៀតណាម ត្រូវចោទជាសំណួរជាច្រើន ចំពោះចំនួនកម្មករក្នុងស្រុក ដែលនៅទំនេរ ជាពិសេសគឺ កម្មករជំនាញ ហើយត្រូវពិចារណាថា គួរសាងសង់អគារថ្មី ឬចាប់ដៃគូជាមួយ ក្រុមហ៊ុនក្នុងស្រុកដែលមានស្រាប់។
របាយការណ៍ពីក្រុមហ៊ុន HSBC ដដែល បានបញ្ជាក់ឲ្យដឹងថា ក្រុមហ៊ុនផលិតកង់ឡាន Guizhou គ្រោងនឹងបន្ថែមទុនវិនិយោគប្រមាណ ៥០០ លានដុល្លារអាមេរិក បង្កើតរោងចក្រផលិតកង់ឡាន នៅក្នុងប្រទេសវៀតណាម ហើយក្រុមហ៊ុន Samsung ក៏កំពុងតែប្តូរ ផលិតកម្មគ្រឿងអេឡិចត្រូនិក មកកាន់ វៀតណាម ផងដែរ និងតម្លើងទូរស័ព្ទ ស្ទើរតែពាក់កណ្តាលនៃផលិតកម្មសរុបទៅហើយ នៅក្នុងប្រទេសនេះ។
បើយើងក្រឡេកទៅមើល ការវិនិយោគដោយផ្ទាល់ពីបរទេសរបស់ ប្រទេសវៀតណាម វិញ គិតត្រឹម ៥ខែដំបូង ដើមឆ្នាំ ២០១៩នេះ បានកើនឡើងដល់ ១៦ពាន់លានដុល្លារអាមេរិក កើនឡើង ៧០ភាគរយ ធៀបនឹងរយៈពេលដូចគ្នា កាលពីឆ្នាំមុន។ នេះបើយោងតាម ក្រសួងផែនការ និងវិនិយោគវៀតណាម។
នៅក្នុងនោះ វិស័យឧស្សាហកម្មផលិត ស្មើនឹង ៧២ភាគរយនៃ ការវិនិយោគដោយផ្ទាល់ពីបរទេស ដែលបានចុះបញ្ជីរួចរាល់ ខណៈដែល វិស័យអចលនទ្រព្យស្មើនឹង ៨ភាគរយ។
លើសពីនេះទៅទៀត ក្នុងរយៈពេល ៥ខែដំបូង ឆ្នាំ ២០១៩ ការនាំចេញពី វៀតណាម ទៅកាន់សហរដ្ឋអាមេរិក មានជាង ២២ពាន់លានដុល្លារអាមេរិក ដែលមានការកើនឡើង ២៨ភាគរយ ធៀបនឹងរយៈពេលដូចគ្នាកាលពីឆ្នាំមុន រីឯ ការនាំចេញទៅចិន មានជាង ១៣ពាន់លានដុល្លារអាមេរិក ដែលថយចុះប្រមាណ ២ភាគរយតែប៉ុណ្ណោះ។ នេះបើយោងតាម ការិយាល័យស្ថិតិទូទៅវៀតណាម។
ប្រទេសវៀតណាម បានក្លាយជាប្រទេសនាំចេញធំ លំដាប់ទី ១២ របស់សហរដ្ឋអាមេរិក ដែលលេចធ្លោជាងគេក្នុងតំបន់ ដោយបាន វ៉ាដាច់ ប្រទេសអ៊ីតាលី បារំាង អង់គ្លេស និងឥណ្ឌាជាដើម បើទោះបីជា បណ្តាប្រទេសជាច្រើន កំពុងរងគ្រោះដោយសារតែ សង្គ្រាមពាណិជ្ជកម្ម ក៏ដោយ។
យោងតាមរបាយការណ៍ពី ក្រុមហ៊ុនមូលបត្រ MB Securities បានបង្ហាញឲ្យដឹងថា ប្រទេសវៀតណាម ទទួលឥទ្ធិពលអវិជ្ជមានតិចជាងគេ ក្នុងចំណោមបណ្តាប្រទេសក្នុងតំបន់អាស៊ាន ដោយសារតែ ការផ្គត់ផ្គង់វត្ថុធាតុដើមរបស់វៀតណាម សម្រាប់ប្រទេសចិន នាំចេញទៅអាមេរិក ដែលទទួលរងការដាក់គំនាបពន្ធពី អាមេរិកនោះ គឺមានត្រឹមតែ ២ភាគរយប៉ុណ្ណោះ នៃការនាំចេញសរុបរបស់វៀតណាម។
ក្នុងឆ្នាំ ២០១៨ ប្រទេសវៀតណាម នាំចេញទំនិញតម្លៃជាង ៩០ពាន់លានដុល្លារអាមេរិក ទៅកាន់ប្រទេសអាមេរិក និង ចិន ដែលស្មើនឹង ៣៧ភាគរយនៃការនាំចេញសរុបរបស់វៀតណាម។
ដោយឡែក ក្រសួងឧស្សាហកម្ម និងពាណិជ្ជកម្មវៀតណាម បានប្រកាសថា នឹងតាមដានមើល បញ្ហាសង្គ្រាមពាណិជ្ជកម្មនេះ ឲ្យបានដិតដល់ជានិច្ច ដើម្បីរៀបចំផែនការឲ្យបានច្បាស់លាស់ និងគោលនយោបាយឲ្យបានត្រឹមត្រូវ ក្នុងការគាំទ្រដល់ អាជីវកម្មនាំចេញ។
ក្រសួង បានលើកទឹកចិត្តឲ្យ សហគ្រាសទាំងឡាយ ជំរុញការនាំចេញ ដែលមានអត្ថប្រយោជន៍ ហើយក្នុងពេលជាមួយគ្នានេះដែរ ក្រសួងនឹងគ្រប់គ្រងការនាំចេញ និងនាំចូលពីព្រំដែន ឲ្យបានតឹងរ៉ឹង ចៀសវាងការក្លែងបន្លំប្រភពដើមនៃទំនិញ។
ទោះបីជាយ៉ាងណាក៏ដោយ សង្គ្រាមពាណិជ្ជកម្មនេះ បានបើកឱកាសឲ្យ វៀតណាម ក្លាយជា ប្រទេសនាំចេញ ជំនួសចិន បានមួយផ្នែកធំ ហើយបានបើកចំហរទីផ្សារ និងចុះកិច្ចព្រមព្រៀងពាណិជ្ជកម្មសេរី ថែមទៀតផង ដែលធ្វើឲ្យ វៀតណាម ក្លាយជាគោលដៅដ៏ល្អ សម្រាប់ក្រុមហ៊ុនឧស្សាហកម្មផលិត និងនាំចេញ។
បើសិនជា វៀតណាម អាចចាប់យកឱកាសពី សង្គ្រាមពាណិជ្ជកម្ម បានល្អ វៀតណាមអាចនឹងក្លាយទៅជា រោងចក្រនៃពិភពលោក ដោយសារតែផលប៉ះពាល់ពីសង្គ្រាម គឺមានរយៈពេលខ្លី រីឯផលប្រយោជន៍ពី ក្រុមហ៊ុនឧស្សាហកម្មផលិត ដែលបានចូលមកវៀតណាមវិញ គឺមានរយៈពេលវែង៕
None
