តាមរយៈផែនការនេះ សម្រាប់អ្នកដំណើរចូលប្រទេសវៀតណាម ដែលបានចាក់វ៉ាក់សាំងរួច ឬ អ្នកបានជាសះស្បើយពីជំងឺកូវីដ-១៩ និងអ្នកដែលបានតេស្ដលទ្ធផលអវិជ្ជមានកូវីដ-១៩ នឹងអាចចូលមកកាន់ប្រទេសវៀតណាម ដោយតម្រូវឲ្យធ្វើចត្តាឡីស័កត្រឹមតែរយៈពេល៧ថ្ងៃប៉ុណ្ណោះ។ នេះបើតាមការរាយការណ៍ដោយភ្នាក់ងារព័ត៌មានវៀតណាម។ តើវៀតណាមរៀបចំផែនការនេះ យ៉ាងដូចម្ដេចខ្លះ?
ការកាត់បន្ថយរយៈពេលនៃការធ្វើចត្តាឡីស័កពីចំនួន ២១ថ្ងៃ មកនៅត្រឹម៧ថ្ងៃនេះ គឺអាចអនុវត្តបានសម្រាប់តែអ្នកដំណើរណា ដែលបានចាក់វ៉ាក់សាំងរួចរាល់ មានលិខិតបញ្ជាក់ ដោយអង្គការសុខភាពពិភពលោក, មជ្ឈមណ្ឌលគ្រប់គ្រងជំងឺឆ្លងរបស់អាមេរិក, ភ្នាក់ងារឱសថអឺរ៉ុប ឬបញ្ជាក់ដោយអាជ្ញាធរវៀតណាមតែប៉ុណ្ណោះ។ មួយវិញទៀត ការចាក់វ៉ាក់សាំងដូសទី២ នៃអ្នកដំណើរទាំងនោះ ត្រូវតែធ្វើឡើងនៅរយៈពេលមិនតិចជាង១៤ថ្ងៃ ឬមិនលើស១២ខែ ឬ១ឆ្នាំនោះទេ។
លើសពីនេះទៀត អ្នកដែលបានជាសះស្បើយពីជំងឺកូវីដ-១៩ ក៏ត្រូវបានអនុញ្ញាតឲ្យចូលប្រទេសវៀតណាមដោយត្រូវធ្វើចត្តាឡីស័កចំនួន៧ថ្ងៃដែរ ដោយពួកគេទាំងនោះ ត្រូវតែមានលិខិតបញ្ជាក់ថា បានជាសះស្បើយ និងបានចេញពីមន្ទីរពេទ្យមិនលើសរយៈពេល១២ខែ ហើយឯកសារស្ដីពីការចាក់វ៉ាក់សាំង និងការជាសះស្បើយពីកូវីដ-១៩ទាំងអស់នោះ ត្រូវតែធ្វើឡើងជាភាសាអង់គ្លេស។
អត្ថបទគួរអាន
អ្វីដែលសំខាន់មួយទៀតនោះ គឺទាំងអ្នកដែលបានចាក់វ៉ាក់សាំងរួច និងអ្នកដែលបានជាសះស្បើយពីកូវីដ-១៩ ត្រូវតែបានធ្វើតេស្ដបង្ហាញពីលទ្ធផលអវិជ្ជមាននៅមុនពេលចូលមកប្រទេសវៀតណាម ហើយពួកគេត្រូវបន្ដធ្វើតេស្ដបន្តទៀតនៅថ្ងៃទី១ នៃ ថ្ងៃធ្វើចត្តាឡីស័ក ហើយថ្ងៃទី៦ នឹងត្រូវតេស្ដរកកូវីដ-១៩ម្ដងទៀត។ អ្នកដំណើរក៏អាចបន្ដធ្វើចត្តាឡីស័ក៧ថ្ងៃទៀតនៅលំនៅដ្ឋានរបស់ពួកគេ ដើម្បីតាមដានសុខភាពបន្ដផងដែរ។
ដោយឡែក សម្រាប់អ្នកដំណើរដែលចូលមកប្រទេសវៀតណាម ដែលមានរយៈពេលតិចជាង១៤ថ្ងៃ គឺមិនបានទទួលការអនុញ្ញាតឲ្យអនុវត្តគម្រោងសាកល្បងកាត់បន្ថយរយៈពេលធ្វើចត្តាឡីស័កនេះទេ។
សូមបញ្ជាក់ថា ករណីឆ្លងកូវីដ-១៩ប្រចាំថ្ងៃនៅវៀតណាមនៅតែមានខ្ពស់នៅឡើយទេ ដោយក្នុងមួយថ្ងៃរកឃើញអ្នកឆ្លងថ្មីជាង៣០០នាក់ ហើយបើសរុបចំនួនអ្នកឆ្លងមកទល់ពេលនេះមានជាង១ម៉ឺន៦ពាន់នាក់ និងអ្នកស្លាប់មាន ៧៨នាក់ហើយ។
នាពេលថ្មីៗនេះដែរ វៀតណាមក៏ទើបតែដាក់ឲ្យដំណើរការនូវមូលនិធិវ៉ាក់សាំងកូវីដ-១៩ ដើម្បីប្រមូលថវិកាទិញវ៉ាក់សាំងសម្រាប់ចាក់ជូនពលរដ្ឋរបស់ខ្លួន ដោយគិតមកទល់ពេលនេះ មូលនិធិនេះ ប្រមូលបានប្រមាណ ៣៤០លានដុល្លារអាមេរិកហើយ ដោយតាមផែនការរដ្ឋាភិបាលគ្រោងប្រមូលឲ្យបាន១ពាន់លានដុល្លារ ដើម្បីទិញវ៉ាក់សាំង១៥០លានដូសចាក់ជូនពលរដ្ឋឲ្យបាន៧៥លាននាក់៕
None
