ប្រទេសចិន គឺជាទីផ្សារនាំចេញដែកធំបំផុតរបស់វៀតណាម ដោយមានប្រមាណជាង ២២%នៃទំហំនាំចេញដែកថែបសរុបនៅ៥ខែដំបូងឆ្នាំនេះ។
ទីផ្សារនាំចេញដែកថែបសំខាន់ៗរបស់វៀតណាម ក្រៅតែពីទីផ្សារចិនដែលជាទីផ្សារធំជាងហើយនោះ វៀតណាមក៏មាននាំចេញដែកទៅ សហភាពអឺរ៉ុប ម៉ិកស៊ីកូ រួមទាំងកម្ពុជាយើងផងដែរ។ ក្នុងនោះ ការនាំចេញដែកថែបទៅអឺរ៉ុបនៅ៥ខែដើមឆ្នាំនេះ មានកំណើនយ៉ាងគំហុកដល់ទៅ ជាង៧០ម៉ឺនតោន កើន៥ដង ធៀបនឹងរយៈពេលដូចគ្នាកាលពីឆ្នាំមុន។ ការនាំចេញដែកទៅម៉ិកស៊ីកូវិញក៏កើនឡើងជាង២ដងដែរ ដោយមានបរិមាណជិត៣០ម៉ឺនតោន។ ប៉ុន្ដែ ការនាំចេញដែកមកកាន់កម្ពុជាវិញមានជាង ៥៨ម៉ឺនតោន ធ្លាក់ចុះ១,៥%។
តាមការរាយការណ៍ដោយក្រសួងឧស្សាហកម្ម និងពាណិជ្ជកម្មវៀតណាម បានឲ្យដឹងថា តម្លៃដែកថែបនៅវៀតណាមក៏មានការកើនឡើងប្រមាណ៤០ ទៅ៥០ភាគរយដែរ គិតតាំងពីដើមឆ្នាំ២០២១មក។ តម្លៃដែកឡើងថ្លៃ ក៏បានធ្វើឲ្យអ្នកម៉ៅការសំណង់មានការលំបាកណាស់ដែរ ដោយវាបានបង្ខំឲ្យពួកគេ ត្រូវលុបចោលកិច្ចសន្យាសាងសង់មួយចំនួន ដោយសារតែតម្លៃដែកឡើងថ្លៃ ធ្វើឲ្យមានការចំណាយកើនឡើងប្រមាណ១០ ទៅ៣០ភាគរយនៃគម្រោងសាងសង់។
អត្ថបទគួរចាប់អារម្មណ៏
អនុនាយករដ្ឋមន្ត្រីវៀតណាម លោក LY Minh Khai បានស្នើដល់ក្រសួងឧស្សហកម្ម និងពាណិជ្ជកម្មឲ្យជំរុញបង្កើនផលិតកម្មដែកថែបក្នុងស្រុកថែមទៀត ដើម្បីធានាបានស្ថិរភាពតម្លៃ។ លោកបន្ថែមថា វៀតណាមក៏គួរតែបន្ថយការនាំចេញដែកខ្លះដែរ ដើម្បីឲ្យប្រាកដថា ការផ្គត់ផ្គង់ក្នុងស្រុកមានគ្រប់គ្រាន់តាមតម្រូវការ។
ទន្ទឹមនឹងការនាំចេញដែក វៀតណាមក៏មានការនាំចូលដែក និងដែកថែប សរុបប្រមាណ៦លានតោនកើនឡើងជាង៩% នៅ៥ខែដំបូងឆ្នាំ២០២១ និងមានទំហំទឹកប្រាក់នាំចេញសរុបជាង៤ពាន់៦រយលានដុល្លារ កើនឡើងប្រមាណ៣៨% ធៀបនឹង៥ខែដំបូងនៅឆ្នាំ២០២០៕
