បុគ្គលិកបុរី វិមានភ្នំពេញ និងក្រុមហ៊ុន លីហួរគ្រុប ជិត១០០នាក់ ចូលរួមបរិចាគឈាមដល់មជ្ឈមណ្ឌលជាតិផ្តល់ឈាម

កម្មវិធីនេះប្រព្រឹត្តទៅនៅសាលក្នុងអគារ​ លី ហួរ គ្រុប មានអ្នកចូលរួមប្រមាណ ១០០នាក់ ខណៈអ្នកដែលអាចបរិច្ចាគឈាមបានមានចំនួន ៧៣នាក់។ នេះមិនមែនជាមែនជាលើកទី១ ឡើយក្នុងការបង្កើតកម្មវិធីនេះឡើង ដោយក្រុមហ៊ុន លី ហួរ ឌីវេឡុបម៉ិន វិមានភ្នំពេញ ឯ.ក តែងតែប្រារព្ធពិធីនេះឡើងជារៀងរាល់ឆ្នាំ ដើម្បីចូលរួមសកម្មភាពជួយដល់សង្គម ជាពិសេសអ្នកជំងឺដែលកំពុងមានតម្រូវការចាំបាច់នៅតាមមន្ទីរពេទ្យនានា។

លោក មឿង រដ្ឋា នាយកប្រតិបត្តិ បុរី វិមានភ្នំពេញ កត់សម្គាល់ឃើញថា នៅក្នុងប្រទេសកម្ពុជា នាពេលបច្ចុប្បន្ន ការផ្ដល់ឈាមហាក់នៅមានកម្រិតនៅឡើយ ដែលជាកត្តាធ្វើឲ្យនៅតាមបណ្ដាមន្ទីរពេទ្យនានា នៅតែជួបប្រឈមការខ្វះខាតឈាមសម្រាប់ផ្គត់ផ្គង់អ្នកជំងឺ។ លោកបន្តថា ការបរិចាគឈាមរបស់បុគ្គលិក បុរី វិមានភ្នំពេញ និងក្រុមហ៊ុន លីហួរ គ្រុប ពិតជារួមចំណែកយ៉ាងសំខាន់ក្នុងការជួយសង្គ្រោះអាយុជីវិតពីក្រុមគ្រូពេទ្យទៅដល់អ្នកជំងឺដែលមានតម្រូវការឈាមជាចាំបាច់។ បើតាមនាយកប្រតិបត្តិរូបនេះ ដោយមើលឃើញនូវតម្រូវការឈាមដ៏ចាំចាប់នេះហើយ ទើបជារៀងរាល់ឆ្នាំ បុរី វិមានភ្នំពេញ និងក្រុមហ៊ុន លី ហួរ គ្រុប តែងតែប្រារព្ធនូវកម្មវិធីបរិចាគឈាម ទៅដល់មជ្ឈមណ្ឌលជាតិផ្តល់ឈាម។ ជាមួយគ្នានោះ លោក មឿង រដ្ឋា ក៏បានលើកទឹកចិត្ត និងថ្លែងអំណរគុណ ចំពោះ បុគ្គលិក បុរីវិមានភ្នំពេញ និងក្រុមហ៊ុន លី ហួរ គ្រុប គ្រប់លំដាប់ថ្នាក់ ដែលបានបរិច្ចាគឈាមជូនមជ្ឈមណ្ឌលជាតិផ្តល់ឈាម ដើម្បីជួយសង្រ្គោះដល់ជនរងគ្រោះដែលត្រូវការឈាមជាចាំបាច់។ សម្រាប់លោក មឿង រដ្ឋា ការផ្ដល់ឈាមមិនត្រឹមតែជួយសង្គ្រោះអាយុជីវិតអ្នកដទៃនោះទេ តែការបរិចាគឈាមក៏មានអត្ថប្រយោជន៍ចំពោះសុខភាពយ៉ាងច្រើនសម្រាប់អ្នកបរិចាគឈាម ផងដែរ។

លោកស្រីវេជ្ជបណ្ឌិត មើក សាមាន អនុប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា សព្វថ្ងៃនេះ កម្ពុជាមិនទាន់មានឈាម ដែលមានប្រភពពីអ្នកស្ម័គ្រចិត្ត គ្រប់គ្រាន់សម្រាប់ជួយសង្គ្រោះជីវិតមនុស្ស ដែលត្រូវការឈាមបន្ទាន់នៅឡើយទេ។ ដ្បិតថា បច្ចុប្បន្នសកម្មភាពបរិច្ចាគឈាមដោយស្ម័គ្រចិត្តរបស់ក្រសួង ស្ថាប័ន ក្រុមហ៊ុន និងប្រជាពលរដ្ឋនៅក្នុងប្រទេសកម្ពុជា មានការកើនឡើងគួរឲ្យកត់សម្គាល់ ក៏ប៉ុន្តែ បើតាមលោកស្រីវេជ្ជបណ្ឌិត មើក សាមាន បច្ចុប្បន្នកម្ពុជានៅតែជួបប្រឈមនឹងការខ្វះខាតឈាមនៅឡើយនៅតាមមន្ទីរពេទ្យនានា។ បើតាមវេជ្ជបណ្ឌិតរូបនេះ កន្លងមក ការស្ម័គ្រចិត្តផ្ដល់ឈាមមានចំនួន១៥% នៃការផ្ដល់ឈាមស្ម័គ្រចិត្ត ខណៈ៨៥% គឺជាការផ្ដល់ឈាមសម្រាប់ប្ដូរនៅពេលអ្នកជំងឺត្រូវការឈាម ដែលធ្វើឲ្យការផ្ដល់ឈាមនៅមានកម្រិតនៅឡើយ។ លោកស្រីវេជ្ជបណ្ឌិត បានថ្លែងបញ្ជាក់ថា បើសិនជាគ្មានការចូលរួមចំណែក ពីសប្បុរសជនស្ម័គ្រចិត្តទាំងឡាយនោះទេ មជ្ឈមណ្ឌលជាតិផ្តល់ឈាម និងមន្ទីរពេទ្យ ទាំងអស់ ព្រមទាំងគ្រួសារអ្នកជំងឺ ពិតជាមានការលំបាកដោយសារឈាមមានប្រភពពីក្នុងចំណោមប្រជាជនយើង ដូច្នេះ ការចូលរួមរបស់បងប្អូនពិតជាមានសារៈសំខាន់យ៉ាងខ្លាំងណាស់។ លោកស្រីវេជ្ជបណ្ឌិត ក៏បានថ្លែងអំណរគុណយ៉ាងជ្រាលជ្រៅ ចំពោះថ្នាក់ដឹកនាំ និងបុគ្គលិក បុរីវិមានភ្នំពេញ និងក្រុមហ៊ុន លី ហួរ គ្រុប គ្រប់លំដាប់ថ្នាក់ ដែលបានបរិច្ចាគឈាមជូនមជ្ឈមណ្ឌលជាតិផ្តល់ឈាម ដើម្បីជួយសង្រ្គោះដល់ជនរងគ្រោះដែលត្រូវការឈាមជាចាំបាច់។

សូមបញ្ជាក់ថា បើតាមការអះអាងរបស់លោកស្រីវេជ្ជបណ្ឌិត មើក សាមាន នាពេលកន្លងមក ក្នុងមួយថ្ងៃគ្រាន់តែនៅរាជធានីភ្នំពេញ ត្រូវការឈាមប្រមាណ ១៥០ប្លោក សម្រាប់ជួយសង្គ្រោះជនរងគ្រោះនិងអ្នកជំងឺ ហើយនៅទូទាំងប្រទេសត្រូវការឈាមប្រមាណ ២០០ប្លោក ជារៀងរាល់ថ្ងៃ ដូចនេះ យើងត្រូវការឈាមបន្ថែមទៀត ដើម្បីសង្គ្រោះជីវិតមនុស្សបន្ទាន់។ បើតាមលោកស្រីវេជ្ជបណ្ឌិតរូបនេះ សកម្មភាពបរិច្ចាគឈាមដោយស្ម័គ្រចិត្តរបស់ក្រសួង ស្ថាប័ន ក្រុមហ៊ុន និងប្រជាពលរដ្ឋ បានចាប់ផ្តើមផុលផុសឡើងវិញ បន្ទាប់ពីស្ថានភាពជំងឺកូវីដ-១៩ បានធូរស្រាល។ យ៉ាងណាក៏ដោយ លោកស្រីវេជ្ជបណ្ឌិត នៅតែជំរុញនិងអំពាវនាវទៅកាន់ប្រជាពលរដ្ឋខ្មែរទូទាំងប្រទេស ជាពិសេសក្រុមយុវជន ចូលរួមបរិច្ចាគឈាម ដើម្បីយកទៅជួយជនរងគ្រោះ ដែលត្រូវការឈាមជាចាំបាច់ ហើយសកម្មភាពទាំងនេះ ពិតជាបានចូលរួមចំណែកយ៉ាងខ្លាំង លើការជួយសង្រ្គោះជីវិតមនុស្ស៕