រដ្ឋមន្ត្រីក្រសួងសុខាភិបាលវៀតណាម លោក ង្វៀន ថាញ់ឡុង បានឲ្យដឹងថា វៀតណាមបានរកឃើញមេរោគកូវីដ១៩បំប្លែងខ្លួនថ្មីសន្លាងមួយប្រភេទទៀត ដែលបើតាមមន្ទីរពិសោធន៍ក្នុងប្រទេសវៀតណាម មេរោគថ្មីនេះទំនងជាបានកើតឡើងពីការលាយបញ្ចូលគ្នានូវមេរោគកូវីដ១៩បំប្លែងខ្លួនពីរប្រភេទដែលមានស្រាប់ គឺមេរោគដែលរកឃើញនៅអង់គ្លេស និងនៅឥណ្ឌា។
លោក ង្វៀន ថាញ់ឡុង បានសង្កត់ធ្ងន់ថា មេរោគនេះមានកំរិតគ្រោះថ្នាក់ខ្ពស់ខ្លាំង ដោយវាបានបំប្លែង, បំបែកខ្លួន, និងបានធ្វើការចម្លងយ៉ាងលឿនរហ័ស ដោយគេបានដាក់ការសង្ស័យថា វាអាចចម្លងតាមខ្យល់បានទៀតផង។
អាជ្ញាធរវៀតណាម បានសន្និដ្ឋានជំហានដំបូងថា កំណើននៃការឆ្លងរាលដាលកូវីដ-១៩ក្នុងសហគមន៍នៅប្រទេសវៀតណាមពេលនេះ ទំនងជាបង្កឡើងដោយមេរោគបំប្លែងថ្មីកូនកាត់នេះតែម្តង។
អត្ថបទទាក់ទង!
គួររំឭកថា វៀតណាមជាប្រទេសដែលត្រូវបានគេកោតសសើរថា បានចាត់ចែង និងទប់ស្កាត់ការចម្លងកូវីដ១៩បានល្អជាងគេមួយដែរ ពោលបើគេរាប់ពីពេលមានកូវីដ១៩ដំបូងកាលពីឆ្នាំមុនមកដល់ចុងខែមេសាឆ្នាំនេះ វៀតណាមមានអ្នកឆ្លងកូវីដ១៩តែជាង ៣ពាន់នាក់ប៉ុណ្ណោះ។
ប៉ុន្តែក្រោយមក នៅពេញមួយខែឧសភានេះ វៀតណាមបានស្គាល់ពីកំណើនយ៉ាងលឿនរហ័ស ពោលគឺកើនឡើងជាង ៣.៥០០ករណី ដែលធ្វើឲ្យចំនួនអ្នកឆ្លងសរុបពេលនេះ មានដល់ជិត ៧ពាន់នាក់ហើយ ក្នុននោះស្លាប់បាត់បង់ជីវិត៤៧នាក់។ បច្ចុប្បន្នកូវីដ១៩បាននិងកំពុងឆ្លងរាលដាលទៅជាង ៣០ខេត្ត-ក្រុង រួចហើយក្នុងចំណោមខេត្តទាំង ៦៣របស់វៀតណាម។
ដោយឡែក មេរោគកូវីដ១៩បំប្លែងខ្លួនថ្មីកូនកាត់នេះ ទើបតែរកឃើញដំបូងដោយអាជ្ញាធរក្នុងវៀតណាមប៉ុណ្ណោះ ពុំទាន់មានទិន្នន័យពីការរកឃើញក្នុងប្រទេសផ្សេងទៀតនោះទេ។
ប៉ុន្តែបើគេនិយាយពី មេរោគកូវីដ១៩បំប្លែងខ្លួនដែលបានរកឃើញកន្លងមក នៅប្រទេសឥណ្ឌានិងអង់គ្លេសវិញ មេរោគទាំងពីរប្រភេទនេះត្រូវបានអង្គការសុខភាពពិភពលោកអះអាងថា បានឆ្លងរាលដាលទៅជាង ៥០ប្រទេសក្នុងសកលលោករួចហើយ ខណៈវាត្រូវបាន WHO ដាក់បញ្ចូលជាប្រភេទមេរោគបំប្លែងខ្លួនដែលកំពុងបង្កការគម្រាមកំហែងនិងគួរឲ្យព្រួយបារម្ភ ដោយសារតែកម្រិតឆ្លងរបស់វាគឺលឿនរហ័ស និងកាចសាហាវផងដែរ៕
None
