អ្នកវិនិយោគរំពឹងថា គម្លាតអត្រាការប្រាក់រវាងប្រទេសជប៉ុន និងសហរដ្ឋអាមេរិកនឹងរីកកាន់តែធំ នៅពេលដែលធនាគារកណ្តាលជប៉ុននៅតែបន្តអនុវត្តគោលនយោបាយរូបិយវត្ថុដដែល ខណៈដែលធនាគារកណ្តាលអាមេរិកបានដំឡើងអត្រាការប្រាក់បន្ថែមទៀតដល់ទៅ៤-៥ដងរួចទៅហើយ។
លុយយ៉េនរបស់ជប៉ុនបានចាប់ផ្តើមធ្លាក់ថ្លៃចាប់ពីខែមករាដើមឆ្នាំនេះមក ដោយមួយដុល្លារអាមេរិកប្តូរបានជាង ១១៥យ៉េន ប៉ុន្តែក្នុងពេល៨ខែចុងក្រោយនេះ លុយយ៉េនជប៉ុនធ្លាក់ថ្លៃ២៥យ៉េនបន្ថែមទៀត ធ្វើឱ្យបច្ចុប្បន្ន១ដុល្លារអាមេរិក ស្មើនឹងជាង ១៤០យ៉េនជប៉ុន ជាចំនួនមិនធ្លាប់មានតាំងតែទសវត្សន៍ឆ្នាំ៩៨។
ប្រាក់យ៉េនខ្សោយធ្លាប់ជាទីពេញចិត្តរបស់អ្នកវិនិយោគបរទេស ដែលមកបណ្តាក់ទុនក្នុងប្រទេសជប៉ុន។ ប៉ុន្តែពេលនេះវាលែងជារឿងល្អទៀតហើយ ក្រោយអ្នកវិនិយោគជាច្រើនផ្តើមចេញទៅបណ្តាក់ទុននៅទៅផ្សារប្រទេសផ្សេងដែលមានកម្លាំងពលកម្មថោកជាង។
អត្ថបទគួរអាន
ប្រាកយ៉េនជប៉ុនបន្តចុះខ្សោយ និងធ្លាក់ថ្លៃខ្លាំងមកដល់ពេលនេះក៏ទំនងជាដោយសារ តែការមិនព្រមផ្លាស់ប្តូរគោលនយោបាយហិរញ្ញវត្ថុរបស់ទីក្រុងតូក្យូ។ ជាមួយនឹងការលុកលុយរបស់រុស្ស៊ីលើអ៊ុយក្រែនដែលជំរុញឱ្យមានការកើនឡើងនៃតម្លៃថាមពល ធនាគារកណ្តាលអាមេរិក និងធនាគារកណ្តាលផ្សេងទៀតបានបង្ហាញពីការឆ្លើយតបជាច្រើន ចំពោះអតិផរណា។ ជាក់ស្តែងធនាគារកណ្តាលអាមេរិកបានដំឡើងអត្រាការប្រាក់គោលរបស់ខ្លួនដល់ទៅ ៤-៥ លើករួចទៅហើយគិតមកទល់ពេលនេះ។
ដោយឡែក ធនាគារកណ្តាលរបស់ជប៉ុនវិញ បានរក្សាជំហររបស់ខ្លួន ដោយជឿជាក់ថាការកើនឡើងតម្លៃនានា នឹងកើនឡើងក្នុងពេលបណ្តោះអាសន្នមួយប៉ុណ្ណោះ។
គួរបញ្ជាក់ថា នៅមួយរយៈចុងក្រោយឱនភាពពាណិជ្ជកម្មរបស់ប្រទេសជប៉ុនកាន់តែរីកធំ ពិសេសលើការនាំចូលថាមពល និងធនធានផ្សេងទៀត ដែលវាបានរុញច្រានផងដែរ ដល់ការធ្លាក់ចុះនៃប្រាក់យ៉េន។ អ្នកនាំចូលក្នុងស្រុក ត្រូវបង្ខំចិត្តលក់ចេញប្រាក់យ៉េនបន្ថែមទៀត រួចទិញចូលប្រាក់ដុល្លារដើម្បីចំណាយលើការផ្គត់ផ្គង់នាំចូលទាំងនេះ។
សូមបញ្ជាក់ថា ចំពេលដែលប្រាក់យ៉េនជប៉ុនធ្លាក់ថ្លៃខ្លាំង ប្រាក់ដុល្លារអាមេរិកបច្ចុប្បន្នកំពុងហក់ឡើងខ្ពស់ដល់កម្រិតមិនធ្លាប់មានក្នុងរយៈពេលជាង២០ឆ្នាំមកនេះ ក្រោយពេលដែលប្រធានធនាគារកណ្ដាលអាមេរិកប្រកាសឡើងអំពីសញ្ញានៃការបង្កើនអត្រាការប្រាក់ក្នុងរយៈពេលវែង ដើម្បីទប់ទល់នឹងអតិផរណាដែលកំពុងកើនខ្ពស់៕
