ក្រសួងឧស្សាហកម្ម និងពាណិជ្ជកម្មវៀតណាម បាននិយាយថា អត្រាពន្ធគយជិត ៣៤% នឹងត្រូវដាក់លើទំនិញស្ករសរបស់ថៃ ប៉ុន្ដែ ការដាក់នៅពេលណា នឹងចូលជាធរមាននៅពេលណានោះ មិនទាន់ត្រូវបានបញ្ជាក់នៅឡើយទេ។ ប្រទេសវៀតណាម បានដកចេញនូវពន្ធនាំចូលលើស្ករសពីប្រទេសនៅតំបន់អាស៊ីអាគ្នេយ៍នៅក្នុងឆ្នាំ២០២០ ដោយគោរពទៅតាមកិច្ចព្រមព្រៀងពាណិជ្ជកម្មទំនិញអាស៊ាន។ ទោះយ៉ាងណា បទប្បញ្ញត្តិក៏អនុញ្ញាតឲ្យបណ្ដាប្រទេសអាស៊ានដាក់ពន្ធនាំចូលផងដែរ ដើម្បីការពារសិទ្ធិ និងផលប្រយោជន៍សម្រាប់ឧស្សាហកម្មទំនិញក្នុងស្រុក ប្រឆាំងនឹងការប្រកួតប្រជែងមិនត្រឹមត្រូវ។
អត្ថបទគួរអាន
តាមការសើបអង្កេតរបស់រដ្ឋាភិបាលវៀតណាម បានរកឃើញថា ស្ករស ដែលមានការឧបត្ថម្ភធន និងការលក់បង្ខូចថ្លៃពីប្រទេសថៃ ដែលបាននាំចូលមកលក់នៅវៀតណាម បានកើនឡើងដល់ ១លាន៣សែនតោន នៅឆ្នាំ២០២០ ដោយបានកើនដល់ទៅជាង ៣៣០% ធៀបនឹងឆ្នាំ២០១៩។
រដ្ឋាភិបាលវៀតណាម បានលើកឡើងទៀតថា ដោយសារតែបញ្ហានេះ បានធ្វើឲ្យរោងចក្រផលិតស្ករសក្នុងស្រុករបស់ខ្លួនជាបន្តបន្ទាប់បានបិទទ្វារ និងបានប៉ះពាល់ការងារបុគ្គលិកដល់ទៅ ៣ពាន់៣រយនាក់ ព្រមទាំងបានជះឥទ្ធិពលអាក្រក់ដល់គ្រួសារកសិករជាង ៩ម៉ឺនគ្រួសារផងដែរ៕
None
