យោងតាមសារព័ត៌មាន ទួយទ្រី របស់វៀតណាម បាតុភូតអែលនីណូ គឺជាបាតុភូតអាកាសធាតុដែលធ្វើឱ្យផ្ទៃទឹកសមុទ្រឡើងកម្ដៅខុសប្រក្រតី ដែលជះឥទ្ធិពលធ្វើឱ្យទម្រង់អាកាសធាតុសកលប្រែប្រួលខ្លាំង។ លោក ហុង ហ្វ៊ុក ឡឹម (Hoang Phuc Lam) អនុប្រធានមជ្ឈមណ្ឌលព្យាករអាកាសធាតុ បានគូសបញ្ជាក់ថា បាតុភូតអែលនីណូ នាពេលបច្ចុប្បន្ន កំពុងវិវឌ្ឍលឿនជាងធម្មតាខុសពីប្រក្រតី។ ទិន្នន័យនៃការឡើងកម្តៅ នៃផ្ទៃទឹកសមុទ្របានហក់ឡើងជាបន្តបន្ទាប់ចាប់តាំងពីខែឧសភា រហូតដល់ដើមខែមិថុនា។ ផ្អែកលើគំរូការព្យាករ បាតុភូតនេះនឹងបន្តវាយលុកកាន់តែខ្លាំងក្លារហូតដល់ចុងឆ្នាំ២០២៦ និងអូសបន្លាយទៅដល់ដើមឆ្នាំ២០២៧។
អាជ្ញាធរវៀតណាម បានព្រមានថា ប្រសិនបើសេណារីយ៉ូ ដ៏អាក្រក់នេះផ្ទុះឡើងមែន វៀតណាមនឹងត្រូវប្រឈមមុខនឹងរលកកម្ដៅដ៏ក្តៅហួតហែង បរិមាណទឹកភ្លៀងធ្លាក់ចុះខ្សោយទូទាំងប្រទេស ជាពិសេសគឺនៅតំបន់កណ្តាល តំបន់ខ្ពង់រាបកណ្តាល និងភាគខាងត្បូង។ ស្ថានភាពនេះនឹងបង្កើតជាវិបត្តិអត់ទឹក និងការជ្រៀតចូលនៃទឹកប្រៃបំផ្លាញផលដំណាំនៅចុងឆ្នាំ២០២៦ នេះ៕
អត្ថបទៈ សួន ឡង់ទី
