ក្រុមហ៊ុននាំចេញគ្រាប់ស្វាយចន្ទីវៀតណាម បានអះអាងថា ពួកគេអាចនឹងត្រូវបានគេបោកប្រាស់ ខណៈដែលពួកគេបានចុះកិច្ចសន្យានាំចេញគ្រាប់ស្វាយចន្ទីទៅប្រទេសអ៊ីតាលីតាមរយៈក្រុមហ៊ុនឈ្មួញកណ្តាលមួយ ដែលមានឈ្មោះថា Kim Hanh Viet One Member Co ដែលមានមូលដ្ឋាននៅទីក្រុងហូជីមិញ ដើម្បីនាំចេញគ្រាប់ស្វាយចន្ទីទៅកាន់ប្រទេសអ៊ីតាលី។ ប៉ុន្ដែ មកទល់ពេលនេះ ក្រុមហ៊ុនបញ្ជាទិញនៅក្រៅប្រទេសទាំងនោះ នៅមិនទាន់មានការទូទាត់ប្រាក់មកឲ្យក្រុមហ៊ុននាំចេញរបស់វៀតណាមនៅឡើយទេ។
អត្ថបទគួរអាន
ក្រសួងឧស្សាហកម្ម និងពាណិជ្ជកម្មវៀតណាម ក៏បានបញ្ជាឲ្យការិយាល័យពាណិជ្ជកម្មវៀតណាម នៅក្នុងប្រទេសអ៊ីតាលី ចុះតាមដានស្វែងរកការពិតទាក់ទងនឹងបញ្ហានេះ ដោយការចុះត្រួតពិនិត្យនេះ គឺនឹងធ្វើឡើងនៅកំពង់ផែ Genova និង Napoli នៃប្រទេសអ៊ីតាលី ដែលគ្រាប់ស្វាយចន្ទីវៀតណាមបានដឹកជញ្ជូនទៅដល់ទីនោះរួចរាល់ហើយ។ ការិយាយល័យពាណិជ្ជកម្មវៀតណាមនៅអ៊ីតាលី ក៏នឹងពិភាក្សាជាមួយប្រតិបត្តិករកំពង់ផែ និងអាជ្ញាធរមូលដ្ឋាននោះទីនោះ ព្រមទាំងក្រុមហ៊ុនដឹកជញ្ជូន និងធនាគារពាក់ព័ន្ធផងដែរ។ ស្របពេលជាមួយគ្នានោះ អាជ្ញាធរវៀតណាម បានស្នើឱ្យក្រុមហ៊ុនដឹកជញ្ជូនផ្អាកការបញ្ចេញទំនិញគ្រាប់ស្វាយចន្ទីដែលបានដឹកដល់កំពង់ផែនោះជាបណ្ដោះអាសន្នសិន រហូតដល់ករណីនេះត្រូវបានដោះស្រាយ។
សូមជម្រាបថា វៀតណាមក៏បានស្នើរសុំជំនួយពីស្ថានទូតអ៊ីតាលីប្រចាំនៅវៀតណាម ក៏ដូចជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរបស់អ៊ីតាលី ដើម្បីដោះស្រាយករណីនេះឲ្យបានឆាប់ ដើម្បីការពារសិទ្ធិស្របច្បាប់របស់អ្នកនាំចេញវៀតណាម និងកេរ្តិ៍ឈ្មោះរបស់ក្រុមហ៊ុនអ៊ីតាលី៕
អត្ថបទ វ៉ាន់ ស្រីរ័ត្ន
None
