នៅក្នុងរយៈពេលពីខែ មករា ដល់ កុម្ភៈតម្លៃអង្ករវៀតណាមនៅលើទីផ្សារអន្តរជាតិបានឡើងថ្លៃដល់ជិត ៥៣០ ដុល្លារនៅក្នុងមួយតោន ពោលគឺកើនឡើងជិត ១០% ប៉ុន្តែបរិមាណនាំចេញគឺមានតែចំនួនប្រមាណ៧៩ម៉ឺនតោនប៉ុណ្ណោះ ធ្លាក់ចុះជិត១៩% ខណៈដែលតម្លៃនាំចេញអង្ករនៅ២ខែមកនេះ គិតជាប្រាក់គឺ មានចំនួន ៤១៧ លានដុល្លារធ្លាក់ចុះជាង ១០% បើធៀបនឹងរយៈពេលដូចគ្នាកាលពីឆ្នាំមុន។
ប្រភពដដែលបានឲ្យដឹងថា ប្រទេសហ្វីលីពីនជាប្រទេសនាំចូលអង្ករវៀតណាមច្រើនជាងគេ ដោយនៅពីរខែដំបូងឆ្នាំនេះ មានបរិមាណជិត ១៣ម៉ឺនតោន ដោយមានតម្លៃប្រមាណ ៦៥ លានដុល្លារ ពោលគឺ ស្មើនឹងជាង ៣៤% នៃការនាំចេញអង្ករសរុប។
អត្ថបទគួរអាន
ទោះបីជាបរិមាណនៃការនាំអង្ករចេញធ្លាក់ចុះ ប៉ុន្តែអ្នកនាំចេញអង្ករវៀតណាមនៅតែមានសុទិដ្ឋិនិយមខ្ពស់ នឹងកំណើននៃការនាំចេញនៅក្នុងឆ្នាំ២០២៣ នេះ ដោយសារតែ ប្រទេសជាច្រើនដូចជាសហរដ្ឋអាមេរិក ចិន និងប្រទេសនៅអឺរ៉ុបកំពុងរងផលប៉ះពាល់ដោយការប្រែប្រួលអាកាសធាតុ គ្រោះរាំងស្ងួត និង ផលប៉ះពាល់នៃសង្រ្គាមនៅអ៊ុយក្រែន ដែលបណ្តាលឱ្យមានការខ្វះខាតការផ្គត់ផ្គង់ស្បៀង។
ជាងនេះទៅទៀត ប្រទេសឥណ្ឌា ដែលជាប្រទេសនាំចេញអង្ករធំជាងគេមួយនៅលើពិភពលោក ក៏បានដាក់គំនាបលើការនាំចេញអង្ករខ្លះៗរបស់ខ្លួនផងដែរ ។
មកដល់ពេលនេះប្រទេសដែលនាំចេញអង្ករច្រើនជាងគេគឺ ឥណ្ឌាស្ថិតនៅលំដាប់ទីមួយ ក្នុងបរិមាណប្រមាណជា ជិត ១៩ លានតោន, វៀតណាម និងថៃ ឈរនៅលំដាប់ទីពីរដូចគ្នា ក្នុងបរិមាណប្រមាណ ៦លាន៥សែនតោន និងលំដាប់ទី៤ គឺប៉ាគីស្ថាន នាំចេញ ៤ លានតោន ទី៥ គឺអាមេរិកនាំចេញ ២លាន៨សែនតោន ។
នៅក្នុងឆ្នាំ២០២៣នេះ វៀតណាមមានគោលដៅនាំចេញអង្ករចន្លោះពី ៦លាន៥សែនតោន ទៅ៧លានតោន៕
អត្តបទ ៖ សរ សុជាតិ
