ធនាគារកណ្ដាលវៀតណាមថា មាន២ភាគ៣នៃពលរដ្ឋវៀតណាម គឺមានប្រើប្រាស់គណនីធនាគារ

លោក លី អាញ ឌុង អនុប្រធាននាយកដ្ឋានទូទាត់នៃធនាគារជាតិរបស់វៀតណាម បានឲ្យដឹងថា ប្រទេសវៀតណាមបានបង្ហាញពីសញ្ញាណដ៏សំខាន់មួយ ដែលសម្រេចបាននៅក្នុងការប្រើប្រាស់សេវាធនាគារ ជាមួយនឹងការចាយវាយ ដោយមិនចាំបាច់ប្រើប្រាស់ក្រដាសប្រាក់។

ក្នុងនោះដែរ ពលរដ្ឋវៀតណាម ដែលមានគណនីធនាគារ ភាគច្រើន គឺមានវ័យ២៥ ទៅ៣៤ឆ្នាំ ហើយចំនួនអ្នកមានគណនីធនាគារនេះ បានកើនឡើងដល់ទៅប្រមាណ២ភាគ៣នៃពលរដ្ឋសរុបរបស់វៀតណាម។ ក្នុងនោះដែរ មានការប្រតិបត្តិការសេវាធនាគារដល់ទៅ ៩០% គឺធ្វើឡើងតាមរយៈប្រព័ន្ធអនឡាញ និងប្រតិបត្តិការសេវាធនាគារតាមទូរស័ព្ទចល័តបានកើនឡើង ៩០%ផងដែរ។ នេះបើតាមទិន្នន័យពីធនាគារកណ្ដាលវៀតណាម។

ឧស្សាហកម្មធនាគារត្រូវបានគេគិតគូរ ជំរុញឲ្យមានការប្រើប្រាស់បច្ចេកវិទ្យាឌីជីថល សម្រាប់គ្រប់សេវាកម្មទាំងអស់ រួមទាំងកម្ចីខ្នាតតូចផងដែរ។ យ៉ាងណាមិញ សម្រាប់សមាមាត្រនៃការចំណាយទៅលើប្រាក់ចំណូលសម្រាប់ធនាគារនៅវៀតណាម គឺជាមធ្យមមាន៣០% ដែលស្ថិត នៅក្នុង កម្រិតខ្ពស់ នៅក្នុង តំបន់។

ធនាគារកណ្ដាលវៀតណាមក៏បានសហការ ជាមួយក្រសួងសន្ដិសុខសាធារណៈ ដើម្បីបង្កើតកម្លាំងប្រតិកម្មរហ័ស ដើម្បីឆ្លើយតបទៅនឹងការបំពានលើសន្ដិសុខនៅក្នុងប្រព័ន្ធធនាគារផងដែរ។ បន្ថែមពីនេះ

ធនាគារពាណិជ្ជនានានៅវៀតណាម ក៏មានការតម្រូវឲ្យមានការវិនិយោគរបស់ពួកគេ១៥% ទៅលើផ្នែក IT និង វាក៏ត្រូវការត្រួតពិនិត្យយ៉ាងទៀងទាត់ដោយធនាគារកណ្ដាលរបស់វៀតណាមផងដែរ៕