ក្រោយរងការបង្ក្រាបយ៉ាងចាស់ដៃនៅកម្ពុជា និងបណ្តាប្រទេសនានា ក្រុមឆបោកអនឡាញបានរត់ទៅបោះមូលដ្ឋានថ្មីនៅប្រទេសស្រីលង្កា

អាជ្ញាធរស្រីលង្កា បានបង្កើតអង្គភាពប្រឆាំង​ឧក្រិដ្ឋកម្ម​តាមប្រព័ន្ធ​អនឡាញ​ថ្មីមួយ និងបានចាប់​ខ្លួនមនុស្សជាង ១,០០០នាក់ នៅឆ្នាំ២០២៦ ​នេះ ដែល​ភាគច្រើននៅតំបន់ទេសចរណ៍​មាត់ឆ្នេរ និង រដ្ឋធានីកូឡុំបូ។ ​នៅក្នុងការឆ្មក់​បង្ក្រាបមួយ ប៉ូលិសបានរកឃើញជនបរទេសជាង ១៥០នាក់ដែលត្រូវបានចោទប្រកាន់ថា កំពុងដំណើរការមជ្ឈមណ្ឌលឆបោក ខណៈដែលប្រតិបត្តិការឆ្មក់​បង្ក្រាប​មួយទៀតបាននាំឱ្យមានការចាប់ខ្លួនជនសង្ស័យចំនួន១២០នាក់​ផ្សេង​ទៀត។

ក្រុម​អ្នកជំនាញព្រមានថា បណ្តាញឧក្រិដ្ឋជនឆបោកកំពុងសម្របខ្លួនយ៉ាងឆាប់រហ័ស។ ជំនួសឱ្យការប្រើប្រាស់សំណង់អគារ ឬប្លុក​អគារធំៗធ្វើជាមជ្ឈមណ្ឌលឆបោក ក្រុម​ឧក្រិដ្ឋជនកំពុងផ្លាស់ទៅ​ជ្រកលាក់ខ្លួ​ននៅ​តាម​​សណ្ឋាគារ អាផាតម៉ិន និងអគារការិយាល័យដែល​ងាយស្រួលជួល និងងាយស្រួលបោះបង់ចោល ពោលគឺងាយស្រួលគេចខ្លួនពីកន្លែង​មួយ​ទៅកន្លែង​មួយ ដែលធ្វើឱ្យសមត្ថកិច្ចពិបាក​នឹង​រក​ពួកគេឃើញ។
របាយការណ៍ឆ្នាំ២០២៥ របស់សភាអាម៉េរិកបានព្រមានថា ក្រុមឧក្រិដ្ឋជនឆបោកកំពុងផ្លាស់ប្តូរទៅកាន់ប្រទេសដែលមានការអនុវត្តច្បាប់ធូររលុង ប៉ុន្តែ​មានហេដ្ឋារចនាសម្ព័ន្ធឌីជីថលរឹងមាំ។ មេខ្លោងឆបោកមួយចំនួននៅក្នុងប្រទេសស្រីលង្កា អាចជាអតីត​អ្នកធ្លាប់ធ្វើការ​នៅតាមមជ្ឈមណ្ឌលឆបោក​តាម​ប្រព័ន្ធអនឡាញ​ដែលរត់ទៅពីអាស៊ីអាគ្នេយ៍។ និន្នាការនេះបានឆ្លុះបញ្ចាំងពីការពង្រីកបណ្តាញឆបោកទូទាំងពិភពលោកកាន់តែទូលំទូលាយ ដែលឥឡូវនេះកំពុងលេចឡើងនៅប្រទេស​អេមីរ៉ាតអារ៉ាប់រួម ទីម័រខាងកើត ហ្វីជី និង ផ្នែកខ្លះនៃទ្វីបអាហ្វ្រិក។
ក្រុមអ្នកវិភាគបានលើកឡើងថា ស្រីលង្កាបានជួបបញ្ហាប្រឈមដោយសារតែច្បាប់ទិដ្ឋាការធូររលុង ការទទួល​បាន​ស៊ីមកាត​យ៉ាងងាយស្រួល ច្បាប់ប្រឆាំង​ឧក្រិដ្ឋកម្មតាមប្រព័ន្ធអនឡាញមានកម្រិត និងប្រព័ន្ធផ្ទេរប្រាក់ក្រៅផ្លូវការ ដែលអាចជួយឧក្រិដ្ឋជនឆបោក​​ផ្ទេរប្រាក់លើសពីការត្រួតពិនិត្យ​ដោយ​និយ័តករ។

ស្របពេលអាជ្ញាធរស្រីលង្ការកំពុង​ពង្រឹងការអនុវត្តច្បាប់ ​ក្រុម​អ្នកជំនាញព្រមានថា ស្រីលង្កាមានពេល​វេលា​តិចតួចណាស់ ដើម្បីការពារខ្លួនពីការក្លាយជាមជ្ឈមណ្ឌលក្នុងតំបន់ដ៏សំខាន់សម្រាប់​បណ្ដាញ​ឧក្រិដ្ឋជនឆបោកតាម​ប្រព័ន្ធអនឡាញ​។ កិច្ចសហប្រតិបត្តិការអន្តរជាតិកាន់តែប្រសើរ និងការចែករំលែកព័ត៌មាន នឹងមានសារៈសំខាន់ណាស់ក្នុងការបញ្ឈប់ការរីករាលដាលយ៉ាងឆាប់រហ័សនៃបណ្តាញឧក្រិដ្ឋជនទាំងនេះ៕

ដោយ: តែម សុខុម