ការនាំចេញទុរេនរបស់វៀតណាម ទៅចិន ដាំក្បាលចុះយ៉ាងគំហុក ក្រោយចិន រឹតបន្តឹងការត្រួតពិនិត្យរកសារធាតុគីមី

សារព័ត៌មាន Vietnam Plus បានចុះផ្សាយថា ការនាំចេញទុរេនរបស់វៀតណាម ទៅកាន់ប្រទេសចិន សម្រេចបានត្រឹមតែ៣៥ម៉ឺនតោន ជាមួយប្រាក់ចំណូល១៣០លានដុល្លារ តែប៉ុណ្ណោះ នៅ៤ខែឆ្នាំនេះ មានការធ្លាក់ចុះជាង៣០០លានដុល្លារ បើធៀបនឹងទំហំនាំចេញក្នុងរយៈពេលដូចគ្នាកាលពីឆ្នាំ២០២៤ ដែលមានរហូតដល់៥០០លានដុល្លារ។

រដ្ឋមន្ត្រីក្រសួងកសិកម្ម និងបរិស្ថានវៀតណាម លោក ដូ ឌឹកឌុយ (Do Duc Duy) រួមជាមួយក្រសួងស្ថាប័នពាក់ព័ន្ធកំពុងខិតខំប្រឹងប្រែងសម្របសម្រួលជាមួយគយចិន ដើម្បីដោះស្រាយបញ្ហាប្រឈមផ្នែកបច្ចេកទេស ដែលកំពុងរារាំងយ៉ាងខ្លាំងដល់ការនាំចេញទុរេនរបស់វៀតណាម បន្ទាប់ពីបរិមាណដឹកជញ្ជូនធ្លាក់ចុះយ៉ាងខ្លាំងនៅដើមឆ្នាំ២០២៥។ ក្រសួងបានចាត់ទុកការដាំក្បាលចុះលើការនាំចេញទុរេនទៅកាន់ប្រទេសចិន ដោយសារកង្វះក្របខណ្ឌច្បាប់ច្បាស់លាស់ នីតិវិធីនៃការដាក់ចត្តាឡីស័ក និងការគ្រប់គ្រងគុណភាព ពាក់ព័ន្ធនឹងការចេញលេខកូដទំនិញនាំចេញ បរិក្ខារវេចខ្ចប់ និងមន្ទីរពិសោធន៍ ដែលមិនទាន់ឆ្លើយតបទៅនឹងតម្រូវការដ៏តឹងរ៉ឹងរបស់ប្រទេសចិន។

លោក ឌុយ បាននិយាយថា ការសម្របសម្រួលជាមួយអាជ្ញាធរគយចិន ធ្វើឡើងក្នុងគោលបំណងដើម្បីដោះស្រាយឧបសគ្គបច្ចេកទេស ដែលរារាំងការនាំចេញ ហើយក្រៅពីនោះប្រព័ន្ធច្បាប់គ្រប់គ្រងការនាំចេញកសិផលរបស់វៀតណាម ត្រូវតែធ្វើឱ្យប្រសើរឡើង រួមជាមួយនឹងស្តង់ដា​បច្ចេកទេសទាក់ទងនឹងខ្សែច្រវាក់ផ្គត់ផ្គង់ទាំងមូល ចាប់ពីការដាំដុះ និងការប្រមូលផល រហូតដល់ការកែច្នៃ និងនាំចេញ។

លោកបានសង្កត់ធ្ងន់ថា ការរៀបចំរចនាសម្ព័ន្ធឧស្សាហកម្មទុរេនឡើងវិញឆ្ពោះទៅរកនិរន្តរភាពជាតម្រូវការចាំបាច់សម្រាប់វៀតណាម ហើយ​លោក បានលើកទឹកចិត្តដល់ការអភិវឌ្ឍ​ផលិតផលទុរេនដែលមានតម្លៃបន្ថែមខ្ពស់ ជាពិសេសទុរេនកក ដើម្បីបង្កើនតម្លៃ និងកាត់បន្ថយការពឹងផ្អែកលើការនាំចេញទុរេនស្រស់។

បច្ចុប្បន្នតម្លៃទុរេននៅលើទីផ្សារវៀតណាម ត្រូវបានលក់ចេញចន្លោះពី៥ពាន់រៀល ទៅ៦ពាន់រៀលក្នុងមួយគីឡូក្រាម តែប៉ុណ្ណោះ ស្មើនឹង១ភាគ៣នៃតម្លៃទុរេន ដែលកសិករវៀតណាមទទួលបានកាលពីឆ្នាំទៅ។ ទន្ទឹមនឹងជួបបញ្ហាទុរេនចាល់នៅលើទីផ្សារ វៀតណាម ក៏កំពុងជួបបញ្ហាការហូរចូលទុរេនមានផ្ទុកសារធាតុគីមីពីប្រទេសថៃ ដែលមានតម្លៃជិត៤លានដុល្លារផងដែរ។ នៅពេលនេះជនសង្ស័យ២នាក់ កំពុងស្ថិតក្នុងការស៊ើបអង្កេតដោយម្នាក់ត្រូវចាប់ខ្លួន និងម្នាក់ត្រូវបានឃុំឃាំងនៅផ្ទះ៕

ដោយៈ សរ សុជាតិ