វិបត្តិស្មុគស្មាញនៃជំងឺរាតត្បាតកូវីដ -១៩បានធ្វើសេដ្ឋកិច្ចវៀតណាមទាំងមូលរងផលប៉ះពាល់ក៏ពិតមែនតែ ប៉ុន្ដែ បើមើលទៅលើនាំចេញផលិតផលជលផលឯណោះវិញ ក្នុងរយៈពេល៧ខែដំបូងក្នុងឆ្នាំ២០២១នេះសម្រេចបានជិត ៥ពាន់លានដុល្លារ កើនឡើង ១១ ភាគរយធៀបនឹងរយៈពេលដូចគ្នាកាលពីឆ្នាំមុន។
ក្នុងនោះ ការនាំចេញត្រីប្រាមានចំនួនប្រមាណជិត ៤៦ម៉ឺនតោនក្នុងអំឡុងរយៈពេល៧ខែក្នុងឆ្នាំ២០២១នេះ ដោយមានទំហំទឹកប្រាក់ជាង ៩៣០ លានដុល្លារកើនឡើងជាង ១៣% ហើយបើប្រៀបធៀបរយៈពេលដូចគ្នាកាលពីឆ្នាំ២០២០កើនឡើងប្រមាណ ១៨%។
នៅ៧ខែដំបូងឆ្នាំនេះ ចំណូលពីការនាំចេញផលិតផលជលផលទៅទីផ្សារអាមេរិកមានដល់ទៅជាង១ពាន់១រយលានដុល្លារស្មើនឹងប្រមាណ ២៣% នៃប្រាក់ចំណូលសរុបរបស់វៀតណាម ជាមួយនឹងកំណើន ៣៦%ធៀបនឹងរយៈពេលដូចគ្នាកាលពីឆ្នាំមុន។
ទន្ទឹមនេះទីផ្សារត្រីធូណាទៅកាន់សហរដ្ឋអាមេរិក បានកើនឡើង ១,៥ ដងផងដែរ ក្នុងនោះការនាំចេញទៅទ្វីបអាហ្វ្រិកកើនឡើងជិត១៧%។ យ៉ាងណាមិញ ក្រៅពីការនាំចេញទៅទីផ្សារអាមេរិក ផលិតផលជលផលវៀតណាមក៏នាំចេញទៅកាន់ទីផ្សារផ្សេងទៀតរួមមាន ម៉ិកស៊ិក ប្រេស៊ីល អង់គ្លេស ថៃនិងហូឡង់ក៏ទទួលបានកំណើនគួរឱ្យកត់សម្គាល់ផងដែរ។
អត្ថបទគួរអាន
សូមបញ្ជាក់ថា កំណើនការនាំចេញនេះ ជាការខិតខំប្រឹងប្រែងរបស់ក្រុមហ៊ុនក្នុងការប្រយុទ្ធប្រឆាំងនឹងកូវីដ១៩ ខណៈវិបត្តិកូវីដ១៩បាននិងកំពុងបង្កឱ្យមានការខ្វះខាតកម្លាំងពលកម្ម និងការលំបាកក្នុងការទិញសម្ភារផ្សេងៗ
យ៉ាងណាក៏ដោយចុះ បើយោងតាមសមាគមអ្នកផលិត និងនាំចេញគ្រឿងសមុទ្រវៀតណាមបានឱ្យដឹងថា ដើម្បីអាចសម្រេចគោលដៅនៃការនាំចេញជលផលក្នុងទំហំទឹកប្រាក់ចំនួន ៩ពាន់លានដុល្លារក្នុងឆ្នាំនេះ លុះត្រាតែកូវីដ-១៩ត្រូវបានគ្រប់គ្រងភ្លាមៗហើយប្រព័ន្ធដឹកជញ្ជូនចាប់ផ្តើមដំណើរការធម្មតាវិញ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
