ក្រុមហ៊ុនផលិតរថយន្តដ៏ល្បីល្បាញ Volkswagen គ្រោងបិទរោងចក្រមួយចំនួននៅអាល្លឺម៉ង់ ខណៈវិបត្តិរថយន្តកាន់តែយ៉ាប់យ៉ឺន

ផែនការរបស់ក្រុមហ៊ុន Volkswagen ដើម្បីជួសជុលម៉ាកយីហោ VW របស់ខ្លួនឡើងវិញនោះ បានបង្ហាញពីការធ្លាក់ចុះមិនធ្លាប់មានពីមុនមក និងបានគូសបញ្ជាក់អំពីវិសាលភាពនៃវិបត្តិដែលក្រុមហ៊ុននេះកំពុងជួបប្រទះ។ បញ្ហាដែលកំពុងកើតឡើងនេះ បានជំរុញក្រុមហ៊ុននេះគ្រោងកាត់បន្ថយប្រាក់ឈ្នួល១០% ដែលអាចប៉ះពាល់ដល់កម្មកររហូតដល់១៤ម៉ឺននាក់។

លោកស្រី ដានីឡា សាវ៉ាឡូ (Daniela Cavallo) ប្រធានក្រុមប្រឹក្សាការងារដ៏មានឥទ្ធិពលរបស់ក្រុមហ៊ុន Volkswagen បានប្រកាសថា ផែនការរបស់ក្រុមហ៊ុនក្នុងការកាត់បន្ថយពលកម្មនៅតាមរោងចក្រផលិតរថយន្តនេះ គឺដើម្បីពង្រឹងភាពរឹងមាំរបស់ខ្លួន ហើយឥឡូវនេះក្រុមហ៊ុនបានបន្តចរចាអស់រយៈពេលជាច្រើនសប្តាហ៍មកហើយជាមួយកម្មករជុំវិញផែនការនេះ ហើយនៅមិនទាន់សម្រេចច្បាស់លាស់នៅឡើយទេ។

លោកស្រី សាវ៉ាឡូ បានចាត់ទុកស្ថានការណ៍នេះ គឺជាការសម្រេចដ៏លំបាកមួយរបស់ក្រុមហ៊ុន ហើយផែនការរបស់ក្រុមហ៊ុន VW នេះក៏បានគំរាមកំហែងដល់ការងាររាប់ម៉ឺននាក់នៅប្រទេសអាល្លឺម៉ង់ផងដែរ​៕

អត្ថបទ៖ សុខ មង្គល