នាឱកាសនោះ សម្តេចតេជោ ហ៊ុន សែន នឹងមានអញ្ជើញចូលរួមក្នុងកិច្ចប្រជុំ និងជំនួបជាច្រើនដូចជា ទិដ្ឋភាពយុទ្ធសាស្រ្តស្ដីពីអាស៊ាន,ការស្ដារសន្តិភាពនិងសណ្ដាប់ធ្នាប់ឡើងវិញ,ការរៀបចំរាត្រីកម្ពុជា «Cambodia Night» ដើម្បីបង្ហាញពីសក្ដានុពលសេដ្ឋកិច្ច ពាណិជ្ជកម្ម និងវប្បធម៌របស់កម្ពុជាជាដើម ដោយកម្មវិធីនេះ មានការរៀបចំឡើងដោយក្រុមហ៊ុន WorldBridge Group របស់អ្នកឧកញ៉ា សៀ ឫទ្ធី។ តើការចូលរួមរបស់កម្ពុជា នៅក្នុងវេទិការសេដ្ឋកិច្ចពិភពលោកឆ្នាំ២០២២នេះ បានដើរតួនាទីសំខាន់យ៉ាងណាខ្លះ ហើយកម្ពុជានឹងចំណេអ្វីខ្លះពីការចូលរួមនេះ?
អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាល និងអគ្គនាយកក្រុមហ៊ុន World Bridge Group បានគូសបញ្ជាក់ថា ការចូលរួមរបស់កម្ពុជា ក៏ដូចជា ក្រុមហ៊ុន WorldBridge ផ្ទាល់ នៅក្នុងវេទិកាសេដ្ឋកិច្ចពិភពលោកឆ្នាំ២០២២ ពិតជាដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចកម្ពុជា ពិសេសបង្កើនការទាក់ទាញបន្ថែមនូវវិនិយោគិនដែលជាសមាជិកនៃវេទិកាសេដ្ឋកិច្ចពិភពលោកឆ្នាំ២០២២ ឲ្យមកនិយោគនៅកម្ពុជា។ បើតាមអ្នកឧកញ៉ា សៀ ឫទ្ធី ការចូលរួមរបស់ក្រុមហ៊ុន WorldBridge Group ក្នុងការរៀបចំកម្មវិធីរាត្រីកម្ពុជា «Cambodia Night» នៅលើទឹកដីប្រទេសស្វីស គឺជាឱកាសដ៏សំខាន់ ដើម្បីឲ្យកម្ពុជា អាចចែករំលែកនូវគោលនយោបាយ និងឱកាសវិនិយោគ ដល់បណ្ដាសមាជិកនៃវេទិកាសេដ្ឋកិច្ចពិភពលោកឆ្នាំ២០២២ ខណៈកម្ពុជា នឹងកាន់តែអាចទាក់ទាញវិនិយោគិនបន្ថែម តាមរយៈវេទិកានេះ។
អ្នកឧកញ៉ា សៀ ឬទ្ធី បានសង្កត់ធ្ងន់ទៀតថា កិច្ចប្រជុំនេះ មិនត្រឹមតែជាការចែករំលែក និងពិភាក្សាក្នុងនាមកម្ពុជាប៉ុណ្ណោះទេ ប៉ុន្តែ ក៏បានបង្ហាញពីភាពជាប្រធានរបស់កម្ពុជា ក្នុងក្របខណ្ឌអាស៊ាន ពិសេសការបង្កើនទំនាក់ទំនងកាន់តែជិតស្និទ្ធរវាងអាស៊ាន និងអឺរ៉ុប ផងដែរ។ អ្នកជំនួញដ៏ល្បីឈ្មោះបោះសំឡេងនៅកម្ពុជារូបនេះ ក៏បានបន្តថា ការចូលរួមរបស់កម្ពុជា ជាបន្តបន្ទាប់ ដូចជា កិច្ចប្រជុំអាស៊ាន-អាមេរិក ដែលទើបតែបញ្ចប់ទៅថ្មីៗ និងវេទិកាសេដ្ឋកិច្ចពិភពលោកឆ្នាំ២០២២ ដែលកំពុងធ្វើឡើងនេះ មិនត្រឹមតែជាឱកាសសម្រាប់កម្ពុជា ក្នុងការជំរុញវិស័យនយោបាយការទូត ប៉ុណ្ណោះទេ ថែមទាំងជាផ្នែកមួយជំរុញនូវកំណើនសេដ្ឋកិច្ចកម្ពុជា តាមរយៈទាក់ទាញអ្នកវិនិយោគបរទេស ផងដែរ។
អត្ថបទគួរអាន
បើតាមក្រសួងការបរទេសនិងសហប្រតិបត្តិការអន្តរជាតិ នាឱកាសចូលរួមក្នុងវេទិកាសេដ្ឋកិច្ចពិភពលោកឆ្នាំ២០២២នេះ សម្តេចតេជោ ហ៊ុន សែន នឹងអញ្ជើញថ្លែងសុន្ទរកថាផងដែរ នៅក្នុងពិធីបិទកិច្ចពិភាក្សាជាមួយភាគីពាក់ព័ន្ធក្រោមប្រធានបទ «ទស្សនវិស័យយុទ្ធសាស្ត្រលើអាស៊ាន» និងនៅក្នុងកម្មវិធីអាហារការងារថ្ងៃត្រង់ក្រៅផ្លូវការជាមួយ ថ្នាក់ដឹកនាំសេដ្ឋកិច្ចពិភពលោក ក្រោមប្រធានបទ «ការស្តារសន្តិភាព និងសណ្តាប់ធ្នាប់ឡើងវិញ»។
ក្រៅពីអញ្ជើញចូលរួមក្នុងវេទិកាខាងលើ នាយករដ្ឋមន្ត្រីនៃកម្ពុជា សម្តេចតេជោ ហ៊ុន សែន ក៏រំពឹងថា នឹងមានជំនួបពិភាក្សាការងារជាមួយថ្នាក់ដឹកនាំនៃប្រទេសមួយចំនួន ក៏ដូចជា ទទួលការចូលជួបសម្តែង ការគួរសមពីសំណាក់ឥស្សរជននយោបាយ និងធុរជនពិភពលោកផងដែរ។ នាថ្ងៃទី២១ ខែឧសភា ឆ្នាំ២០២២ មុនការចាប់ផ្ដើមវេទិកាខាងលើមួយថ្ងៃ សម្ដេច ហ៊ុន សែន ក៏ជួបសំណេះសំណាលជាមួយបងប្អូនប្រជាពលរដ្ឋខ្មែរ ដែលរស់នៅសហគមន៍អឺរ៉ុប នាទីក្រុងZurich ប្រទេសស្វីស ប្រមាណជាង២ពាន់នាក់ ផងដែរ ។
សូមបញ្ជាក់ថា វេទិកាសេដ្ឋកិច្ចពិភពលោកឆ្នាំ២០២២ មានការអញ្ជើញចូលរួមពីថ្នាក់ដឹកនាំប្រមាណជាង ២ពាន់នាក់ នៅជុំវិញពិភពលោក មកពីវិស័យនយោបាយ ធុរកិច្ច សង្គមស៊ីវិល និងប្រព័ន្ធផ្សព្វផ្សាយជាដើម។ កិច្ចប្រជុំនេះទៀតសោត ផ្តោតសំខាន់លើកិច្ចពិភាក្សាជុំវិញមូលបទ ប្រវត្តិសាស្ត្រនៅចំណុចរបត់,គោលនយោបាយរបស់រដ្ឋាភិបាល និងយុទ្ធសាស្ត្រធុរកិច្ច ដើម្បីធ្វើឲ្យពិភពលោកកាន់តែប្រសើរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
