នេះបើតាមសេចក្តីប្រកាសព័ត៌មានមួយច្បាប់ពីក្រសួងការពារជាតិអាមេរិក នៅក្រោយកិច្ចប្រជុំបញ្ចប់ទៅ។
បើតាមសេចក្តីប្រកាសព័ត៌មានពីភាគីក្រសួងការពារជាតិអាមេរិកដដែល នៅក្នុងជំនួបទល់មុខគ្នាលើកទីពីរជាមួយរដ្ឋមន្ត្រីក្រសួងការពារជាតិចិន ឧត្តមសេនីយ៍ Wei Fenghe ក្នុងឆ្នាំនេះ លោក Lloyd Austin ក៏បានពិភាក្សាអំពីសារៈសំខាន់នៃកិច្ចសន្ទនាសំខាន់ៗ ស្តីពីការកាត់បន្ថយហានិភ័យជាយុទ្ធសាស្ត្រ និងការលើកកម្ពស់សុវត្ថិភាពប្រតិបត្តិការផងដែរ។
សេចក្តីប្រកាសព័ត៌មានដដែលគូសបង្ហាញថា រដ្ឋមន្ត្រីការពារជាតិអាមេរិកបានលើកឡើងចំៗ ពីក្តីព្រួយបារម្ភ ទាក់ទិនអាកប្បកិរិយា ដែលអាមេរិកចាត់ទុកថា ជាសកម្មភាពដ៏គ្រោះថ្នាក់ធ្វើឡើងដោយយន្តហោះរបស់កងទ័ពរំដោះប្រជាជនចិន នៅក្នុងតំបន់ឥណ្ឌូប៉ាស៊ីហ្វិក ដែលបង្កើនហានិភ័យនៃគ្រោះថ្នាក់ក្នុងតំបន់ ស្របពេលដែលស្ថានការណ៍កំពុងតានតឹងស្រាប់។
សូមររំឭកថា ពីខែឧសភាយន្តហោះចម្បាំងចិនមួយគ្រឿងបានហោះស្ទាក់យន្តហោះស៊ើបការណ៍យោធាអូស្ត្រាលី នៅក្នុងតំបន់សមុទ្រចិនខាងត្បូង ក្នុងសកម្មភាពដែលស្ទើរតែបង្កជាគ្រោះថ្នាក់ទៅហើយ។ នេះបើតាមការអះអាងពី ក្រសួងការពារជាតិអូស្រ្តាលីកាលពីខែមិថុនា។
អត្ថបទគួរអាន
ដោយឡែក មន្ត្រីអាមេរិកម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះបានឱ្យសារព័ត៌មានរ៉យទ័រដឹងថា លោក Austin និងលោក Wei ក៏បានពិភាក្សាគ្នាពីរឿងកោះតៃវ៉ាន់ផងដែរ ហើយថែមទាំងបាននិយាយអំពីការចាប់ផ្តើមកិច្ចសន្ទនាមួយចំនួនឡើងវិញ ក្រោយត្រូវបានភាគីចិនលុបចោលបន្ទាប់ពីដំណើរទស្សនកិច្ចរបស់លោកស្រី Pelosi ទៅកាន់កោះតៃវ៉ាន់។
បើតាមការចុះផ្សាយរបស់សារព័ត៌មានរដ្ឋចិន កិច្ចប្រជុំប្រមាណ៩០នាទីនៅកម្ពុជានេះ គឺធ្វើឡើង ដោយមានការអញ្ជើញពីភាគីអាមេរិកមកកាន់ភាគីចិន ហើយវាជាជំនួបលើកដំបូងរបស់រដ្ឋមន្ត្រីការពារជាតិនៃប្រទេសមហាអំណាចទាំងពីរ បើរាប់ចាប់ពីដំណើរទស្សនកិច្ចទៅកាន់កោះតៃវ៉ាន់របស់ប្រធានសភាសហរដ្ឋអាមេរិកលោកស្រី Nancy Pelosi កាលពីខែសីហា ដែលកាលនោះបានធ្វើឲ្យចិនខឹងសម្បារ ហើយប្រកាសផ្អាកកិច្ចសន្ទនាមួយចំនួនរវាងមន្ត្រីជាន់ខ្ពស់ប្រទេសទាំងពីរ។
ជំនួបនេះទៀតសោតធ្វើឡើងនៅក្រៅកិច្ចប្រជុំរដ្ឋមន្ត្រីការពារជាតិអាស៊ាន និងអាស៊ានបូក ដែលកម្ពុជាធ្វើជាម្ចាស់ផ្ទះ ហើយវាក៏ជាជំនួបលើកទី២ផងដែរ សម្រាប់មន្ត្រីនិងមេដឹកនាំជាន់ខ្ពស់របស់មហាអំណាចទាំងពីរនៅក្នុងខែវិច្ឆិកានេះ ពោលគឺប្រធានាធិបតីចិន ស៊ី ជីនពីង ទើបជួបនិយាយជាមួយលោក ចូ បៃឌិន ប្រធានាធិបតីអាមេរិកអស់ពេល៣ម៉ោងនៅកោះបាលី ប្រទេសឥណ្ឌូនេស៊ី កាលពីសប្តាហ៍មុន។
យ៉ាងណាក៏ដោយ មិនទាន់មានសេចក្តីប្រកាសព័ត៌មានណាមួយនៅក្រោយកិច្ចប្រជុំ ពីភាគីក្រសួងការពារជាតិចិននៅឡើយទេ គិតត្រឹមរសៀលថ្ងៃអង្គារទី២២វិច្ឆិកា៕
