តាមប្រភពរដ្ឋាភិបាលជប៉ុនបានឱ្យដឹងថា នៅក្នុងកិច្ចប្រជុំនៅទីក្រុងតូក្យូ មន្ត្រីក្រសួងការបរទេស និងមន្ត្រីការពារជាតិនៃប្រទេសទាំងពីរទំនងជាយល់ព្រមបន្តធ្វើការងាររួមគ្នា ដើម្បីកសាងទំនាក់ទំនងទ្វេភាគីប្រកបដោយការស្ថាបនា និងស្ថិរភាព។
នៅដើមដំបូងនៃកិច្ចពិភាក្សា អនុរដ្ឋមន្ត្រីការបរទេសជាន់ខ្ពស់របស់ប្រទេសជប៉ុន លោក Shigeo Yamada បានសម្តែងការព្រួយបារម្ភអំពីបាឡុងចិន ដែលត្រូវបានសង្ស័យថា យោធាចិនជាអ្នកបញ្ជានៅពីក្រោយ ក៏ដូចជាការសហការផ្នែកយោធារវាងទីក្រុងប៉េកាំង និងម៉ូស្គូជាដើម។
ដោយឡែក អនុរដ្ឋមន្ត្រីការបរទេសចិនវិញគឺ លោក Sun Weidong បានព្រមានប្រឆាំងនឹងវិធានការដែលប៉េកាំងហៅថាជា រឿងអវិជ្ជមានរបស់ទីក្រុងតូក្យូទាក់ទងនឹងកោះតៃវ៉ាន់នៅក្នុងការឃុបឃិតជាមួយមហាអំណាចនៅក្រៅតំបន់។ ការព្រមានដូចនេះរបស់មន្ត្រីចិន ទំនងជាដោយសារតែប៉េកាំងមើលឃើញពីការបង្កើនថវិកាយោធាថ្មីរបស់ជប៉ុន និងពង្រីកកិច្ចសហប្រតិបត្តិការជាមួយអាមេរិក។
អត្ថបទគួរអាន
មួយវិញទៀត អនុរដ្ឋមន្ត្រីការបរទេសចិន លោក Sun Weidong បាននិយាយថា៖ «ស្ថានភាពសន្តិសុខអន្តរជាតិបានឆ្លងកាត់ការផ្លាស់ប្តូរយ៉ាងធំធេង ហើយយើងកំពុងមើលឃើញការវិលត្រឡប់នៃទំនោរឯកតោភាគីនិយម ការគាំពារនិយម និងគំនិតនៃសង្រ្គាមត្រជាក់របស់រដ្ឋនានា។
មែនទែនទៅ កិច្ចពិភាក្សាដែលមានគោលបំណងបន្ធូរបន្ថយភាពតានតឹងរវាងប្រទេស ដែលមានសេដ្ឋកិច្ចធំជាងគេទីពីរ និងទីបីរបស់ពិភពលោកនេះ បានកើតឡើងនៅពេល ដែលទីក្រុងតូក្យូព្រួយបារម្ភថា ទីក្រុងប៉េកាំងនឹងងាកទៅរកការប្រើកម្លាំង ដោយបង្ខំលើកោះតៃវ៉ាន់ បន្ទាប់ពីមើលឃើញពីឧទាហរណ៍ជាក់ស្តែងនៃការឈ្លានពានរបស់រុស្ស៊ីទៅលើប្រទេសអ៊ុយក្រែន។
បើទោះបីជាបែបនេះក្តី ប្រទេសចិន គឺជាដៃគូពាណិជ្ជកម្មដ៏ធំបំផុតរបស់ប្រទេសជប៉ុន ដែលមានទំហំប្រហែលមួយភាគប្រាំនៃការនាំចេញរបស់ជប៉ុនសរុប និងស្ទើរតែមួយភាគបួននៃការនាំចូលរបស់ប្រទេសជប៉ុនផងដែរ ហើយចិនក៏ជាមូលដ្ឋានផលិតកម្មដ៏សំខាន់សម្រាប់ក្រុមហ៊ុនជប៉ុនជាច្រើនដូចគ្នា៕
