ទណ្ឌកម្មលើកទី១០នេះ ដែលប្លុកនេះត្រៀមផ្តោតគោលដៅលើ គឺមានជនជាតិរុស្ស៊ីដែល មានជាប់ពាក់ព័ន្ធនឹងការចាប់ពង្រត់ដោយខុសច្បាប់លើកុមារអ៊ុយក្រែនប្រហែល៦ពាន់នាក់។ ប្រភពពីមន្ត្រីសហភាពអឺរ៉ុបឱ្យដឹងទៀតថា កញ្ចប់ទណ្ឌកម្មចុងក្រោយនេះ នឹងមានតម្លៃស្មើនឹង ១១ពាន់លានដុល្លារ។
វាទំនងជានឹងរួមបញ្ចូលជាលើកដំបូងផងដែរ លើការហាមឃាត់ការនាំចេញទាំងស្រុងទៅកាន់អង្គភាពរបស់ប្រទេសអ៊ីរ៉ង់ចំនួន៧ ដែលត្រូវបានគេជឿថា កំពុងផលិតរបស់របបប្រើប្រាស់ផ្គត់ផ្គង់ដល់រុស្ស៊ីក្នុងសង្គ្រាមនៅអ៊ុយក្រែន។
គួរជម្រាបថា អឺរ៉ុបចង់ពន្លឿនការអនុម័តទណ្ឌកម្មកញ្ចប់ទី១០នេះ ពិសេសគឺទណ្ឌកម្មទៅលើ ការចាប់ពង្រត់កុមារដោយខុសច្បាប់ ធ្វើយ៉ាងណាឱ្យបានមុនថ្ងៃទី២៤ខែកុម្ភៈ ជាថ្ងៃគំរប់មួយឆ្នាំនៃសង្គ្រាមរុស្ស៊ីឈ្លានពានអ៊ុយក្រែន។
អត្ថបទគួរអាន
បើតាមទីភ្នាក់ងារជនភៀសខ្លួនរបស់អង្គការសហប្រជាជាតិ បាននិយាយកាលពីខែមុនថា ប្រទេសរុស្ស៊ីកំពុងផ្តល់លិខិតឆ្លងដែនរុស្ស៊ីដល់កុមារអ៊ុយក្រែនដែលខ្លួនចាប់ទៅ ហើយយកពួកគេទៅរកម្តាយឳពុកចិញ្ចឹម ដែលចង់បានកូនក្នុងប្រទេសរបស់ខ្លួន។
របាយការណ៍របស់សហរដ្ឋអាមេរិកវិញនិយាយថា រុស្ស៊ីបានឃុំឃាំងកុមារអ៊ុយក្រែនយ៉ាងតិច
៦ពាន់នាក់ នៅក្នុងទីតាំងនានានៅតំបន់គ្រីមៀក្នុងគោលបំណងចម្បង គឺអប់រំ ហ្វឹកហ្វឺនកុមារទាំងនោះឡើងវិញ នូវគំនិតនយោបាយថ្មី។ ទោះយ៉ាងណា ស្ថានទូតរុស្ស៊ីប្រចាំនៅទីក្រុងវ៉ាស៊ីនតោនបាននិយាយថា រុស្ស៊ីទទួលយកកុមារដែលភៀសខ្លួនចេញពីអ៊ុយក្រែនប៉ុណ្ណោះ មិនបានធ្វើដូចការចោទប្រកាន់ឡើយ៕
