ថ្លែងនាឱកាសចុះអនុស្សរណៈនៃការយោគយល់គ្នារវាងនិយ័តករបរធនបាលកិច្ច និងបណ្ដាក្រុមហ៊ុនក្នុងវិស័យអចលនទ្រព្យ នៅថ្ងៃទី១៦ ខែកញ្ញា ឆ្នាំ២០២២ ឯកឧត្តម ស៊ូ សុជាតិ ប្រតិភូរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បានគូសបញ្ជាក់ថា ការចូលរួមរបស់និយ័តករបរធនបាលកិច្ច ក្នុងវិស័យអចលនទ្រព្យ ជាការបើកនូវទំព័រថ្មីមួយ ក្នុងការជំរុញការអភិវឌ្ឍវិស័យពាណិជ្ជកម្ម និងសង្គមកម្ពុជា ឲ្យកាន់តែរីកចម្រើនបន្ថែមទៀត។ បើតាមឯកឧត្តម ស៊ូ សុជាតិ ភាពរីកចម្រើនរបស់សេដ្ឋកិច្ច និងសង្គមកម្ពុជា ពិតជាមិនអាចធ្វើទៅបានឡើយ បើសិនគ្រប់ភាគីពាក់ព័ន្ធ មិនរួមគ្នាជាធ្លុងមួយនោះ។ លើសពីនេះ ឯកឧត្តម ស៊ូ សុជាតិ ក៏បានបញ្ជាក់ទៀតថា តាមរយៈកិច្ចសហការគ្នារវាងស្ថាប័នរដ្ឋ និងវិស័យឯកជន នាពេលនេះ នឹងកាន់តែជំរុញឲ្យវិស័យអចលនទ្រព្យកម្ពុជា មានភាពរីកចម្រើន ក៏ដូចជា បង្កើននូវទំនុកចិត្តបន្ថែមដល់ក្រុមវិនិយោគិនពីបរទេសឲ្យចូលមកវិនិយោគនៅកម្ពុជា ផងដែរ។
ដោយឡែក ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច បានគូសបញ្ជាក់ថា ការចុះអនុស្សារណៈយោគយល់គ្នា នាពេលនេះ គឺ ដើម្បីលើកកម្ពស់ការយល់ដឹង និងផ្សព្វផ្សាយពីសក្តានុពលវិស័យមូលបត្រ និងបរធនបាលកិច្ច ទៅដល់សាធារណៈជន ពិសេសទៅដល់វិនិយោគិន និងធុរជន ក្នុងការស្វែងយល់ពីការអភិវឌ្ឍថ្មីៗ និងដើម្បីរៀបចំខ្លួនចូលរួមវិនិយោគក្នុងវិស័យបរធនបាលកិច្ច។ ឯកឧត្តម សុខ ដារ៉ា បន្តថា ការអភិវឌ្ឍវិស័យបរធនបាលកិច្ចនៅកម្ពុជា គឺជារបត់ថ្មីមួយនៃការអភិវឌ្ឍសេដ្ឋកិច្ចកម្ពុជា និងកំពុងបោះជំហានទៅមុខជាលំដាប់ដែលធ្វើឲ្យសាធារណជន ជាពិសេសវិស័យឯកជនមានការចាប់អារម្មណ៍ និងយកចិត្តទុកដាក់យ៉ាងខ្លាំងក្នុងការស្វែងយល់ ក៏ដូចជា ចូលរួមនៅក្នុងវិស័យមួយនេះ។
អត្ថបទគួរអាន
ជាមួយគ្នានោះ លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានលើកឡើងថា កិច្ចសហការនាពេលនេះ បានឆ្លុះបញ្ចាំងពីការយកចិត្តទុកយ៉ាងសំខាន់ពីស្ថាប័នរដ្ឋាភិបាល ក្នុងការជួយជ្រោមជ្រែងដល់វិស័យឯកជន ក្នុងការបង្កើតយន្តការវិនិយោគថ្មីៗ ជាពិសេសការវិនិយោគក្នុងវិស័យអចលនទ្រព្យតាមរយៈវិស័យបរធនបាលកិច្ច។ យន្តការទាំងនេះនឹងបង្កលក្ខណៈងាយស្រួល និងកាន់តែទូលំទូលាយដល់អ្នកវិនិយោគ ជាពិសេសបង្កើនភាពទាក់ទាញរំហូរវិនិយោគពីក្រៅប្រទេសកាន់តែច្រើនបន្ថែមទៀតនៅកម្ពុជា។ លោកបន្តថា វត្តមានអ្នកវិនិយោគបរទេស នឹងរួមចំណែកសំខាន់ក្នុងការជួយពន្លឿនកំណើនសេដ្ឋកិច្ចនៅកម្ពុជា ហើយរំហូរទុនវិនិយោគទាំងនេះ នឹងបង្កើតឲ្យមានតម្រូវការលើវិស័យអចលនទ្រព្យ ពិសេសទីតាំងដីសម្រាប់អភិវឌ្ឍអគារខុនដូ អគារពាណិជ្ជកម្ម និងតម្រូវការដីសម្រាប់សាងសង់រោងចក្រឧស្សាហកម្ម ជាដើម។
សូមបញ្ជាក់ថា «បរធនបាលកិច្ច» គឺជាសេវាហិរញ្ញវត្ថុមួយមិនមែនធនាគារ និងមានតួនាទីគ្រប់គ្រង មើលថែរក្សា ឬចាត់ចែកទ្រព្យសម្បត្តិរបស់បុគ្គល ឬក្រុមហ៊ុនណាមួយ សម្រាប់ជាប្រយោជន៍ដល់ក្រុមគោលដៅណាមួយ ដែលស្ថិតក្នុងអនុលោមតាមលិខិតបរធនបាលកិច្ច ឬបទប្បញ្ញត្តិជាធរមាន។ គិតមកដល់បច្ចុប្បន្ន និយ័តករបរធនបាលកិច្ច បានទទួលសំណើរនូវការស្នើសុំការចុះបញ្ជី ប្រមាណ ៦០០បរធនបាលកិច្ច។ ក្នុងនោះ បរធនបាលកិច្ចភាគច្រើនដែលបានស្នើសុំការចុះបញ្ជី គឺជាបរធនបាលកិច្ចក្នុងវិស័យអចលនទ្រព្យ។ នេះបើតាមការបញ្ជាក់របស់ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច៕
