ទោះស្ថិតក្នុងរយៈពេលមធ្យម និងវែង វិស័យកាត់ដេរនៅតែជាជន្ទល់ដ៏រឹងមាំក្នុងការរួមចំណែកជួយជំរុញកំណើនសេដ្ឋកិច្ចប្រកបដោយសន្តានុពលរបស់កម្ពុជា។ ទោះបីការឆ្លងរាតត្បាតនៃជំងឺកូវីដ-១៩ បានបង្កផលលំបាកលើច្រវ៉ាក់ផលិតកម្ម និងផ្គត់ផ្គង់ក្តី តែការនាំចេញលើផលិតផលទាំងបីខាងលើនៅតែរក្សាបានកំណើនគួរឲ្យកត់សម្គាល់។
នាពិធីប្រកាសដាក់ឲ្យអនុវត្តយុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូប ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានគូសបញ្ជាក់ថា ចក្ខុវិស័យនៃការដាក់ឲ្យអនុវត្តយុទ្ធសាស្ត្រនេះ គឺដើម្បីជំរុញ និងអភិវឌ្ឍវិស័យទាំងនេះឲ្យកាន់តែមានភាពរីកចម្រើនសំដៅលើកកម្ពស់ភាពធន់ និងធ្វើឲ្យមានភាពប្រកួតប្រជែងខ្ពស់។ ការប្រែក្លាយវិស័យទាំងនេះឲ្យក្លាយជាឧស្សាហកម្ម ដែលមានចីរភាពបរិស្ថាន និងមានតម្លៃបន្ថែមខ្ពស់ ក៏ដូចជាចូលរួមស្តារ និងជំរុញកំណើនសេដ្ឋកិច្ចកម្ពុជាឲ្យវិបត្តិកូវីដ-១៩ ក៏ជាគោលបំណងមួយផងដែរ។
កត្តាដែលជំរុញឲ្យមានការដាក់ចេញយុទ្ធសាស្ត្រនេះ គឺបន្ទាប់ពីរាជរដ្ឋាភិបាលសង្កេតឃើញជិត៣ទសវត្សរ៍កន្លងមកនេះ ហេដ្ឋារចនាសម្ព័ន្ធក្នុងវិស័យនេះ គ្មានការផ្លាស់ប្តូរឲ្យកត់សម្គាលនោះទេ ពោលគឺនៅតែជាមណ្ឌលផលិតកម្ម ដែលមានខ្សែច្រវ៉ាក់ផលិតនៅមានកម្រិត និងមានតម្លៃបន្ថែមទាបនៅឡើយ។ នេះបើតាមការបញ្ជាក់របស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ដែលបានគូសបញ្ជាក់បន្ថែមថា ក្នុងរយៈពេលមធ្យម និងវែងវិស័យកាត់ដេរនៅតែជាជន្ទល់ដ៏រឹងមាំក្នុងការរួមចំណែកជួយជំរុញកំណើនសេដ្ឋកិច្ចប្រកបដោយសក្តានុពលរបស់កម្ពុជា។
អត្ថបទគួរអាន
ពាក់ព័ន្ធបញ្ហានេះឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានបង្ហាញការគាំទ្រយ៉ាងពេញចំពោះការដាក់ឲ្យអនុវត្តយុទ្ធសាស្ត្រខាងលើ ដ្បិតវាជាយុទ្ធសាស្ត្រគួបផ្សំនិងបំពេញបន្ថែមឲ្យគ្នាទៅវិញទៅមកជាមួយយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មីសម្រាប់ឆ្នាំ២០២១-២០២៣ ដែលបានដាក់ចេញកាលពីអំឡុងខែធ្នូ ឆ្នាំ២០២១កន្លងទៅ។ ទន្ទឹមនឹងនេះ ឯកឧត្តម អះអាងថា ក្រសួងពាណិជ្ជកម្មបានត្រៀមខ្លួនរួចជាស្រេចក្នុងការចូលរួមសហការអនុវត្តយុទ្ធសាស្ត្រនេះឲ្យមានប្រសិទ្ធភាពខ្ពស់ សំដៅជំរុញការវិនិយោគក្នុងស្រុក និងលើកកម្ពស់វិស័យទាំងបីដើម្បីអាចបូកតម្លៃបន្ថែមក្នុងខ្សែច្រវ៉ាក់តម្លៃក្នុងតំបន់ឱ្យបានកាន់តែច្រើន។
ឯកឧត្តម ប៉ាន សូរស័ក្តិ បានគូសបញ្ជាក់ថា ទោះបីជំងឺកូវីដ-១៩ បានបង្កផលលំបាកធ្ងន់ធ្ងរលើច្រវ៉ាក់ផលិតកម្ម និងការផ្គត់ផ្គង់ក្តី ក៏ការនាំចេញផលិតផលក្នុងវិស័យទាំងបីនេះកាលពីឆ្នាំ២០២១ មានការកើនឡើងគួរឱ្យកត់សម្គាល់ ក្នុងនោះសម្លៀកបំពាក់កើនឡើង៨%, ស្បែកជើងកើនឡើង២៥% និងសម្ភារៈធ្វើដំណើរកើនឡើង៥៥% បើធៀបនឹងឆ្នាំ២០២០។ សញ្ញាណងើបឡើងវិញនេះ បានបង្ហាញយ៉ាងច្បាស់ថា វិស័យកាត់ដេរ ស្បែកជើង និងកាបូបនៅកម្ពុជា ពិតជាមានភាពធន់ខ្ពស់ និងបានរួមចំណែកសំខាន់ក្នុងការទ្រទ្រង់កំណើនសេដ្ឋកិច្ចជាតិ បន្ទាប់ពីទទួលបានការជួយគាំទ្រពីរាជរដ្ឋាភិបាល៕
None
