សម្តេចតេជោ ហ៊ុន សែន បន្ថែមថា ការទទួលបានកម្ចីពីជប៉ុនថ្មីៗបន្ថែមនេះ គឺអាចធ្វើទៅបានទាល់តែកម្ពុជាបានដោះបំណុលចាស់ពីមុនរួចរាល់ ហើយកន្លងមកកម្ពុជាមានវិធីសាស្ត្រល្អសម្រាប់ការទូទាត់សងបំណុលទៅកាន់ប្រទេសជប៉ុន។ តើកម្ពុជាប្រើវិធីសាស្ត្របែបណាដើម្បីដោះបំណុលជាមួយរាជរដ្ឋាភិបាលជប៉ុន?
ថ្លែងនាឱកាសអញ្ជើញសម្ពោធសមិទ្ធផលនានា ក្នុងគម្រោងការពារទឹកជំនន់ និងកែលម្អប្រព័ន្ធប្រឡាយ-លូ ក្នុងរាជធានីភ្នំពេញ ជំហានទី៤ នៅថ្ងៃទី២០ ខែមេសា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ដូច្នេះ តាមពិតទៅ បំណុលដែលកម្ពុជា បានជំពាក់រាជរដ្ឋាភិបាលជប៉ុន មានតាំងជំនាន់រដ្ឋាភិបាលដែលគ្រប់គ្រងដោយរបបលន់ណុល រហូតមកដល់បច្ចុប្បន្ន។ សម្ដេច ហ៊ុន សែន បានពន្យល់ថា ដើម្បីឲ្យកម្ពុជា អាចខ្ចីលុយពីរដ្ឋាភិបាលជប៉ុនបានបន្តទាល់តែកម្ពុជា ដោះបំណុលដែលកម្ពុជា ជំពាក់នាពេលអតីតកាលរួចសិន ដោយសម្ដេចបន្តថា ការដោះបំណុលនេះ គឺធ្វើឡើងតាមរយៈភាគីជប៉ុន ផ្ដល់នូវសម្ភារៈមួយចំនួនមកដល់កម្ពុជា ដើម្បីលក់ ក៏ប៉ុន្តែ ទឹកប្រាក់ដែលបានពីការលក់សម្ភារៈទាំងនោះ ភាគីជប៉ុន ទុកសម្រាប់ជួយអភិវឌ្ឍនៅកម្ពុជា ដដែល។
បើតាមសម្ដេច ហ៊ុន សែន ក៏បានគូសបញ្ជាក់ទៀតថា រហូតមកដល់ឆ្នាំ២០០១ ទើបកម្ពុជា អាចដោះបំណុលដែលជំពាក់តាំងពីអតីកាល និងអាចបន្តខ្ចីលុយពីប្រទេសជប៉ុនបន្ត ដើម្បីយកមកអភិវឌ្ឍន៍ហេដ្ឋារចនាសម្ព័ន្ធនៅកម្ពុជា ជាបន្តបន្ទាប់។
អត្ថបទគួរអាន
បើយោងតាមរបាយការណ៍សង្ខេបស្ដីពីស្ថានភាពបំណុលសាធារណៈកម្ពុជា របស់ក្រសួងសេដ្ឋកិច្ចនិងហិរញ្ញវត្ថុ បង្ហាញថា គិតត្រឹមដំណាច់ឆ្នាំ២០២១ កម្ពុជា បានជំពាក់បំណុលរាជរដ្ឋាភិបាលប្រទេសជប៉ុនប្រមាណ ៨៧០លានដុល្លារអាមេរិក នៃសន្និបំណុលសរុបប្រមាណ ៩ពាន់៥រយលានដុល្លារអាមេរិក។ ប្រទេសជប៉ុន គឺជាប្រទេសម្ចាស់បំណុលធំបំផុតទី២ របស់កម្ពុជា បន្ទាប់ពីប្រទេសចិន ដោយកម្ពុជាមានជំពាក់បំណុលចិនជាង៤ពាន់លានដុល្លារ ខណៈដែលកម្ពុជាជំពាក់កូរ៉េខាងត្បូងមានប្រមាណ៥០០លានដុល្លារ និងជំពាក់បារាំងមានជិត៤៨០លានដុល្លារ។
តាមរបាយការណ៍ដដែល បានគូសបញ្ជាក់ទៀតថា គិតចាប់ពីឆ្នាំ១៩៩៣ រហូតដល់ឆ្នាំ២០២១ រាជរដ្ឋាភិបាលកម្ពុជា បានចុះកិច្ចព្រមព្រៀងខ្ចីឥណទានសម្បទានជាមួយដៃគូអភិវឌ្ឍន៍នានា សរុប ១៥ពាន់លានដុល្លារ ដើម្បីអភិវឌ្ឍលើវិស័យហេដ្ឋារចនាសម្ព័ន្ធ និងវិស័យអាទិភាពផ្សេងៗ។ បើតាមការអះអាងរបស់ក្រសួងសេដ្ឋកិច្ចនិងហិរញ្ញវត្ថុ គោលដៅនៃការខ្ចីឥណទានសម្បទានទាំងនេះ សុទ្ធតែសម្រាប់ហិរញ្ញប្បទានលើគម្រោងនិយោគសាធារណៈ ក្នុងវិស័យអាទិភាពរបស់រាជរដ្ឋាភិបាល សំដៅរួមចំណែក ទ្រទ្រង់ចីរភាពនៃកំណើនរយៈពេលវែង និងបង្កើនផលិតភាព សេដ្ឋកិច្ច ឬ ផលិតភាពផលិតកម្ម។ ក្នុងនោះ វិស័យហេដ្ឋារចនាសម្ព័ន្ធរូបវន្ត គ្របដណ្តប់ប្រមាណ ៧២% និង វិស័យអាទិភាពចំពោះមុខផ្សេងទៀតប្រមាណ ២៨%៕
អត្ថបទ៖ ខន ណារី
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
