ឆ្លើយតបទៅនឹងសំនួររបស់អ្នកសារព័ត៌មាន ថាតើ ក្រសួងសុខាភិបាលអាចប៉ានស្មានបានទេ ពេលណាទើប អាចកាត់ផ្តាច់ឆ្លងរីករាលដាលជំងឺកូវីដ-១៩? លោកជំទាវ ឱ វណ្ណឌីន បានមានប្រសាសន៍ថា ការកាត់ផ្តាច់ការឆ្លងរីករាលាល នឹងមិនអាចទៅរួចនោះទេ បើសិនប្រជាពលរដ្ឋនៅតែមិនខ្វល់ ហើយបន្តការជួបជុំគ្នាដដែលនោះ។
លោកជំទាវ បានបន្ថែមថា៖«បច្ចុប្បន្នេះ វីរុសកូវីដ-១៩ដែលបំប្លែងថ្មី មានការចរាចរយ៉ាងសកម្មនៅក្នុងប្រទេសកម្ពុជា ដូច្នេះ ចំនួនអ្នកឆ្លងនៅតែបន្តកើនឡើងដោយសារអី ដោយសារតែអ្នកចល័តពីខេត្តមួយទៅខេត្តមួយនៅតែមាន ហើយយើងទើបតែស្ងាត់ម្សិលមិញនេះទេ ដោយសារមានបុរសម្នាក់បានស្លាប់ អ៊ីចឹងបើក្នុងរយៈពេល២សប្តាហ៍នេះ បើសិនជាអនុវត្តឲ្យបានម៉ត់ចត់ រំពឹងថា ករណីឆ្លងនឹងថយចុះ នឹងឈានចូលដល់ការបញ្ចប់ តែបើពលរដ្ឋនៅតែមិនស្តាប់ មិនខ្វល់ទេ នោះវាពិតជាពិបាកក្នុងការវាយតម្លៃណាស់»។
អត្ថបទទាក់ទង!
យ៉ាងណាមិញ ចំពោះការដាក់ឲ្យ ច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ត្រូវបានឯកឧត្តម កើត រិទ្ធិ រដ្ឋមន្រ្តីក្រសួងយុត្តិធម៌ បញ្ជាក់ថា ជាចាំបាច់ណាស់ក្នុងដំណាក់កាលនេះ ហើយការចូលរួមអនុវត្តច្បាប់របស់ប្រជាពលរដ្ឋ គឺជាកត្តាសំខាន់ណាស់ ដែលជាជំរុញឲ្យមានការបិទបញ្ចប់ករណីឆ្លងរីករាលដាលក្នុងសហគមន៍នេះ។
ឯកឧត្តមបានបញ្ជាក់ថា៖ «នៅក្នុងច្បាប់នេះ រាជរដ្ឋាភិបាលបានកំណត់ច្បាស់ណាស់ គឺចង់ឲ្យប្រជាពលរដ្ឋចូលរួម ដើម្បីទប់ស្កាត់ការឆ្លងរីករាលដាលជំងឺមួយនេះ ហើយគ្មានអ្វីដែលសំខាន់ជាងនេះទៀតទេ ធ្វើច្បាប់មិនមែនគោលដៅដាក់ទោសប្រជាពលរដ្ឋទេ គឺចង់ឲ្យប្រជាពលរដ្ឋចូលរួម»។
សូមជម្រាបថា ច្បាប់និងអនុក្រឹត្យស្តីពី វិធានការទប់ស្កាត់ការឆ្លងរីករាលដាលនៃជំងឺកូវីដ-១៩ បានចូលជាធរមានកាលពីថ្ងៃទី១២ ខែមីនា ឆ្នាំ២០២១ ដើម្បីពិន័យ និងដាក់ទោសចំពោះបុគ្គល ដែលប្រព្រឹត្តល្មើសនឹងវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវផ្សេងទៀត។ ការដាក់ចេញវិធានការបន្ទាន់របស់ប្រមុខដឹកនាំរាជរដ្ឋាភិបាលធ្វើឡើងស្របពេលប្រទេសកម្ពុជាកំពុងជួបវិបត្តិឆ្លងជំងឺកូវីដ-១៩ ក្នុងសហគមន៍៕
None
