អ្នកនាំពាក្យសេតវិមានអាមេរិកបាននិយាយថា ប្រធានាធិបតីអាមេរិក លោកលោកចូ បៃឌិនទន្ទឹងរង់ចាំស្វាគមន៍មេដឹកនាំអាស៊ានទាំងអស់មកកាន់ទីក្រុងវ៉ាស៊ីនតោន ដើម្បីជួបពិភាក្សាគ្នាដោយផ្ទាល់តែម្តង។ ដូច្នេះហើយកិច្ចប្រជុំត្រូវលើកពេលសិន ព្រោះអាមេរិកចង់ឲ្យមេដឹកនាំអាស៊ានបានជួបប្រជុំគ្រប់ៗគ្នា។
អ្នកនាំពាក្យដដែលបានបន្ថែមថា៖ ដើម្បីធានាថាមេដឹកនាំអាស៊ាន ដែលបានអញ្ជើញទាំងអស់អាចចូលរួមបាន អាមេរិកកំពុងធ្វើការយ៉ាងជិតស្និទ្ធជាមួយដៃគូអាស៊ាន ដើម្បីកំណត់កាលបរិច្ឆេទសមស្របថ្មីមួយសម្រាប់កិច្ចប្រជុំពិសេសនេះ។
ឯកឧត្តម ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានលើកឡើងកាលពីសប្តាហ៍មុនថា កិច្ចប្រជុំពិសេសអាស៊ាន-អាមេរិក ដែលគ្រោងនឹងធ្វើឡើង នៅចុងខែមីនានេះ ត្រូវលើកទៅពេលក្រោយសិន ដោយសារតែមេដឹកនាំអាស៊ានខ្លះ មិនអាចចូលរួមប្រជុំតាមពេលវេលាដែលបានស្នើឡើង នាពេលកន្លងមក។
អត្ថបទគួរអាន
កិច្ចប្រជុំកំពូលដែលផ្តួចផ្តើមឡើងដោយអាមេរិកនេះ ត្រូវបានគេមើលឃើញថា ជាផ្នែកមួយនៃកិច្ចខិតខំប្រឹងប្រែងរបស់វ៉ាស៊ីនតោន ក្នុងការបង្កើនការចូលរួមជាមួយប្លុកប្រទេសទាំង១០ ដែលអាមេរិកផ្តើមសម្លឹងឃើញថា មានសារៈសំខាន់ សម្រាប់ប្រកួតនឹងឥទ្ធិពលដែលកំពុងកើនឡើងរបស់ប្រទេសចិន។
មន្ត្រីសេតវិមានឲ្យដឹងថា អាមេរិកចាត់ទុកកិច្ចប្រជុំកំពូលនេះថាជា អាទិភាពចំបង ដោយវាជាការអបអររំលឹកខួប ៤៥ឆ្នាំនៃទំនាក់ទំនងអាមេរិក-អាស៊ានផងដែរ។
សូមបញ្ជាក់ថា កន្លងទៅនេះមន្ត្រីជាន់ខ្ពស់អាមេរិកបានអះអាងថា មេដឹកនាំប្រទេសអាស៊ានតែ៩ប៉ុណ្ណោះ ដែលនឹងត្រូវអញ្ជើញឲ្យចូលរួម ខណៈដែលមេដឹកនាំប្រទេសមីយ៉ាន់ម៉ា មិនត្រូវបានអញ្ជើញនោះទេ ប៉ុន្ដែ អនុញ្ញាតឲ្យអ្នកតំណាងដែលមិនមែនជាអ្នកនយោបាយចូលរួមជំនួសវិញ។
គួររំឭកដែរថា អាស៊ានខ្លួនឯងក៏បានរារាំងរបបយោធាមីយ៉ាន់ម៉ាពីកិច្ចប្រជុំសំខាន់ៗជាច្រើនដែរចាប់តាំងពីឆ្នាំមុនមក ដោយសារតែមីយ៉ាន់ម៉ាខកខានក្នុងការគោរពតាមកិច្ចព្រមព្រៀង ដើម្បីបញ្ចប់ភាពវឹកវរនៅក្នុងប្រទេស ដែលបានសម្លាប់អាយុជីវិតជនស៊ីវិលរាប់ពាន់នាក់ និងរាប់សិបម៉ឺននាក់ផ្សេងទៀតបានរត់ភៀសខ្លួន៕
None
