ប្រមុខការទូតចិនអះអាងថា នឹងជួយកម្ពុជាសាងសង់រោងចក្រផលិតវ៉ាក់សាំងកូវីដ១៩
ប្រមុខការទូតចិន ឯកឧត្តម វ៉ាង យីបានអះអាងនៅចុងសប្ដាហ៍មុននេះថា ប្រទេសចិន នឹងបន្ដផ្ដល់ជំនួយវ៉ាក់សាំងកូវីដ១៩មកឲ្យប្រទេសកម្ពុជាតាមតម្រូវការ …
គិតមកទល់ពេលនេះ យ៉ាងហោចណាស់មាន៤០ប្រទេស និងដែនដី ដែលបានរាយការណ៍ពីករណីឆ្លងរាលដាលកូវីដ១៩បំប្លែងខ្លួនថ្មីអូមីក្រុង។ ក្នុងចំណោមប្រទេសទាំង៤០ គេសង្កេតឃើញ ការចម្លងមេរោគបំប្លែងថ្មីនេះ នៅក្នុងសហគមន៍ បានកើតឡើងក្នុងប្រទេសភាគច្រើនផងដែរ។ ទោះយ៉ាងណា អង្គការសុខភាពពិភពលោក WHO បានឲ្យដឹងកាលពីថ្ងៃសុក្រសប្តាហ៍មុនថា មិនមានករណីស្លាប់ណាមួយ ត្រូវបានគេរាយការណ៍នោះទេ ចាប់តាំងពីវត្តមានរបស់អូមីក្រុងមក។
អ្នកនាំពាក្យ និងជាមន្ត្រីជាន់ខ្ពស់មួយរូបរបស់ WHO លោកស្រី ស៊ូយ៉ា ស្វាមីណាថាន បាននិយាយថា កូវីដ១៩អូមីក្រុងទំនងនឹងអាចគ្របដណ្តប់ពាសពេញពិភពលោក ដោយសារតែសមត្ថភាពចម្លងដ៏លឿនរបស់វា។ អ្នកនាំពាក្យរូបនេះ បានប្រៀបធៀបអូមីក្រុង ទៅនឹងកូវីដ១៩ឌែលតា បានបច្ចុប្បន្នវាដំណាងឲ្យ ៩៩%នៃករណីឆ្លងទូទៅនៅទូទាំងពិភពលោក។
ទន្ទឹមនឹងការព្រួយបារម្ភ លោកស្រី ស៊ូយ៉ា បានចោទសួរថា៖ តើយើងគួរព្រួយបារម្ភពីវាកម្រិតណា? យើងគួរតែត្រៀមរៀបចំខ្លួន និងប្រុងប្រយ័ត្នចំពោះអូមីក្រុង តែមិនមានភ័យស្លន់ស្លោនោះទេ ព្រោះថាស្ថានភាពរបស់យើងនៅពេលនេះ គឺមិនដូចកាលពី១ឆ្នាំមុនឡើយ។
គួរជម្រាមថា បើតាមការអះអាងពី WHO អ្នកដែលវិជ្ជមានកូវីដ១៩អូមីក្រុង សុទ្ធតែស្ថិតក្នុងកម្រិតស្រាល ហើយមានខ្លះទៀតមិនមានបង្ហាញរោគសញ្ញាឡើយ។ ប្រការនេះត្រូវបានអ្នកជំនាញ WHO សន្និដ្ឋានថា ថ្នាំវ៉ាក់សាំងទំនងជានៅតែអាចផ្តល់ការការពារដល់សារពាង្គកាយពីការធ្លាក់ខ្លួនឈឺធ្ងន់បានដដែល។
គួរកត់សម្គាល់ថា កូវីដ១៩បំប្លែងខ្លួនថ្មីនេះកំពុងមានវត្តមាននៅ១៦ប្រទេសនៃតំបន់អឺរ៉ុប ខណៈសហរដ្ឋអាមេរិក ដែលទើបតែរកឃើញករណីដំបូងកាលពីសប្តាហ៍មុន ពេលនេះបានបន្តរកឃើញវត្តមានអូមីក្រុងជិត២៥ករណីបន្ថែមទៀត ក្នុងរដ្ឋចំនួន១២ផ្សេងៗគ្នា។
ដោយឡែក សម្រាប់ប្រទេសអាហ្វ្រិកខាងត្បូងដែលជាកន្លែងត្រូវបានគេកំណត់អត្តសញ្ញាណ កូវីដ១៩អូមីក្រុងដំបូងវិញ កំពុងកត់ត្រាពីកំណើនករណីឆ្លងយ៉ាងខ្លាំង ពោលគឺប្រមាន ១ម៉ឺន៦ពាន់នាក់ក្នុងមួយថ្ងៃ កើនឡើងជិត ៤០% ហើយដែលក្នុងចំណោមករណីវិជ្ជមានទាំងនោះ មានជាង៧០% ជាករណីអូមីក្រុង៕None
