អង្គការសុខភាពពិភពលោក បានកំណត់ដាក់ចេញនូវស្ថានភាពអាសន្នសុខភាពសាធារណៈ នៃក្ដីកង្វល់ជាអន្តរជាតិនេះ គឺត្រូវបានរចនាឡើងដើម្បីឱ្យមានការឆ្លើយតបជាអន្តរជាតិ និងការសហការគ្នាបង្កើតឡើងជាមូលនិធិ សម្រាប់ការចែករំលែកវ៉ាក់សាំង និង វិធីសាស្រ្តព្យាបាលជំងឺនេះផងដែរ។
លោក Tedros បានប្រាប់សន្និសីទសារព័ត៌មាននៅទីក្រុងហ្សឺណែវថា ទោះបីជាលោកកំពុងប្រកាសភាពអាសន្ន ផ្នែកសុខភាពសាធារណៈពីការព្រួយបារម្ភជាអន្តរជាតិពីមេរោគនេះក៏ដោយ ប៉ុន្តែ ការផ្ទុះឡើងភាគច្រើន គឺបានប្រមូលផ្តុំក្នុងចំណោមបុរសស្រឡាញ់ភេទដូចគ្នា ជាពិសេសអ្នកដែលមានដៃគូរួមភេទច្រើន។ លោកបាននិយាយថា ហានិភ័យនៃជំងឺអ៊ុតស្វា ដែលរីករាលដាលតាមរយៈការទំនាក់ទំនងជិតស្និទ្ធ និង ការរួមភេទបង្កឱ្យមានរោគសញ្ញាដូចជំងឺគ្រុនផ្តាសាយ និង ដំបៅស្បែកដែលពោរពេញដោយខ្ទុះ គឺមានកម្រិតមធ្យមនៅទូទាំងពិភពលោក លើកលែងតែនៅអឺរ៉ុប ដែលអង្គការសុខភាពពិភពលោកបានចាត់ទុកថា ជាហានិភ័យខ្ពស់។
សេតវិមានបាននិយាយថា សេចក្តីប្រកាសអំពីការដាក់ជំងឺអ៊ុតស្វាក្នុងភាពអាសន្នសុខភាពសាធារណៈនេះគឺជា ការអំពាវនាវឱ្យមានសកម្មភាពប្រុងប្រយ័ត្នសម្រាប់ពិភពលោក ដើម្បីបញ្ឈប់ការរីករាលដាលនៃមេរោគនេះ។ លោក Raj Panjabi នាយកការិយាល័យត្រៀមបង្ការជំងឺរាតត្បាតនៅសេតវិមានបាននិយាយថា ការឆ្លើយតបជាលក្ខណៈអន្តរជាតិដែលមានការសម្របសម្រួល និង ការពារ គឺចាំបាច់ខ្លាំងណាស់ ដើម្បីបញ្ឈប់ការរីករាលដាលនៃជំងឺអុតស្វានេះ។
អត្ថបទគួរអាន
គួររំលឹកថា កាលពីមុនលោក Tedros បានគាំទ្រអនុសាសន៍របស់គណៈកម្មាធិការអ្នកជំនាញ ក្នុងការមិនប្រកាសភាពអាសន្នសុខភាពសាធារណៈនៃជំងឺអ៊ុតស្វានោះទេ ប៉ុន្តែប្រភពចំនួនពីរបានប្រាប់ Reuters ថា លោក Tedros បានសម្រេចចិត្តគាំទ្រការប្រកាសអាសន្នខ្ពស់បំផុតចំពោះមេរោគអុតស្វា ក៏ដោយសារតែការព្រួយបារម្ភអំពីការកើនឡើងនៃករណី និង ការផ្គត់ផ្គង់វ៉ាក់សាំង និង ការព្យាបាលជំងឺនេះ។
គួរជម្រាបថា រហូតមកដល់ពេលនេះ មានករណីជំងឺអ៊ុតស្វាច្រើនជាង ១ ម៉ឺន ៦ ពាន់ករណីនៅក្នុងប្រទេសជាង ៧៥ ហើយមានអ្នកស្លាប់ចំនួន ៥ នាក់នៅអាហ្វ្រិក។ ជំងឺអ៊ុតស្វាបាននិងកំពុងរីករាលដាលយ៉ាងខ្លាំង ចំពោះបុរសដែលស្រឡាញ់ភេទដូចគ្នា ក្នុងចំណោមការផ្ទុះឡើងនាពេលថ្មីៗនេះ។
អ្នកជំនាញផ្នែកសុខភាពបានស្វាគមន៍ការសម្រេចចិត្តរបស់ WHO ក្នុងការចេញសេចក្តីប្រកាសពីភាពអាសន្នសុខភាពសាធារណៈ ខណៈដែលរហូតមកដល់ពេលនេះ ការប្រកាសអាសន្ននេះ ទើបតែត្រូវបានអនុវត្តចំពោះជំងឺរាតត្បាតនៃមេរោគឆ្លងកូវីដ១៩ និង ការខិតខំប្រឹងប្រែងជាបន្តបន្ទាប់ក្នុងការលុបបំបាត់ជំងឺស្វិតដៃជើងប៉ុណ្ណោះ៕
