ប្រធានអង្គការសុខភាពពិភពលោក (WHO) លោក Tedros Ghebreyesus បានផ្ញើររបាយការណ៍ស្តីពីស្ថានភាពមនុស្សធម៌ ទៅកាន់ក្រុមប្រឹក្សាប្រតិបត្តិ WHO ដែលមានរុស្ស៊ី និងអាមេរិកជាសមាជិក។ របាយការណ៍គ្រប់ដណ្តប់រយៈពេលប្រាំបួនខែដំបូងនៃឆ្នាំ២០២២ បន្ទាប់ពីរុស្ស៊ីបានចូលឈ្លានពានប្រទេសអ៊ុយក្រែនកាលពីថ្ងៃទី២៤កុម្ភៈ ដែលបង្ហាញថា ស្ថានភាពផ្នែកសុខាភិបាលនៃប្រជាជនអ៊ុយក្រែនកំពុងស្ថិតក្នុងភាពអាសន្នបំផុត និងក្នុងចំណោម៨ប្រទេសផ្សេងទៀត។
ក្នុងនោះ របាយការណ៍បានគូសបញ្ជាក់ពីចំនួននៃជនរងក្រោះស៊ីវិលជាង ១៤,០០០ នាក់ និងប្រជាជនអ៊ុយក្រែនជាង ១៧លាននាក់ទៀតកំពុងត្រូវការជំនួយមនុស្សធម៌ ព្រមទាំងប្រជាជន ៧,៥ នាក់ផ្សេងទៀតបាននិងកំពុងផ្លាស់ប្តូរទីលំនៅបណ្តោះអាសន្នទៅប្រទេសផ្សេងៗទូទាំងទ្វីបអឺរ៉ុប។ បើតាមរបាយការណ៍ដដែលបានឱ្យដឹងថា ក្នុងចំណោមការវាយប្រហារ ៤៧១ ដងដោយប្រើអាវុធធុនធ្ងន់លើកន្លែងថែទាំសុខភាពនៅទូទាំងពិភពលោក មាន ៤៤៨ ដងបានកើតឡើងក្នុងប្រទេសអ៊ុយក្រែន។
អត្ថបទគួរអាន
យ៉ាណាក៏ដោយ មន្ត្រីតំណាងប្រទេសរុស្ស៊ីប្រចាំក្រុមប្រឹក្សាភិបាល WHO បានហៅរបាយការណ៍នេះថា ជារឿងនយោបាយនិងមានភាពលម្អៀង ដោយបន្ថែមថាជាការចោទប្រកាន់ដែលគ្មានមូលដ្ឋាន។ គួរជម្របថា កាលពីពេលកន្លងទៅ ទីក្រុងម៉ូស្គូតែងអះអាងខ្លួនឯងថា មិនបានកំណត់គោលដៅលើជនស៊ីវិលក្នុងប្រទេសអ៊ុយក្រែន និងថាទង្វើរបស់ខ្លួនជា «ប្រតិបត្តិការយោធាពិសេស» ដែលពិភពលោកមើលឃើញថាជាការឈ្លានពានដោយប្រើកម្លាំងយោធា។
ដោយឡែក លោកស្រី Sheba Crocker តំណាងសហរដ្ឋអាមេរិកប្រចាំអង្គការសហប្រជាជាតិវិញ បានអំពាវនាវឱ្យមានរបាយការណ៍ថ្មីមួយ ដើម្បីចងក្រងឯកសារឧប្បត្តិហេតុនៅអ៊ុយក្រែនតាំងពីខែកញ្ញាមក។ បើយោងតាមសេចក្តីថ្លែងការណ៍ពីការិយាល័យរបស់លោកស្រីបាននិយាយថា សង្គ្រាមរបស់រុស្ស៊ីក្នុងប្រទេសអ៊ុយក្រែនបានធ្វើឱ្យបាត់បង់ជីវិតមនុស្សជាច្រើន និងក្រុមមនុស្សដែលងាយរងក្រោះដូចជាកុមារ មនុស្សចាស់ សុទ្ធតែទទួលហានិភ័យធ្ងន់ធ្ងរផ្នែកថែទាំសុខភាព៕
