ប្រធានអង្គការសុខភាពពិភពលោក (WHO) លោក Tedros បាននិយាយថា ជំងឺកូវីដដែលបានផ្ទុះឡើងនៅប្រទេសចិននៅចុងឆ្នាំ២០១៩នោះ បានសម្លាប់មនុស្សរាប់លាននាក់មកហើយមកទល់នឹងពេលនេះ ក៏ប៉ុន្តែកាលពីសប្ដាហ៍មុននេះ ករណីឆ្លងថ្មីនៃជំងឺកូវីដ១៩នេះត្រូវគេរាយការណ៍ថាបានធ្លាក់ចុះដល់កម្រិតទាបបំផុតមិនធ្លាប់មានចាប់តាំងពីខែមីនា ឆ្នាំ២០២០មក។
លោក តេដ្រូស បានប្រាប់អ្នកយកព័ត៌មានក្នុងទីក្រុងហ្សឺណែវប្រទេសស្វីសថា ស្ថានភាពរីករាតត្បាតកូវីដ១៩ មិនដែលបានស្ថិតក្នុងទីតាំងដ៏ប្រសើរមួយបែបនេះទេ ក្នុងការបញ្ចប់ជំងឺរាតត្បាតនេះ។ បើទោះជាពួកគេមិនទាន់បញ្ចប់វានៅឡើយក៏ពិតមែន ក៏ប៉ុន្តែពេលនេះ ពិភពលោកដូចជាមើលឃើញពន្លឺនៃការបញ្ចប់ជំងឺនេះហើយ ដូច្នេះហើយពិភពលោកចាំបាច់ត្រូវតែបង្កើនល្បឿនដើម្បីចាប់យកឱកាសដ៏ល្អនេះឱ្យបាន។
ប្រធានអង្គការសុខភាពពិភពលោកនេះបានសង្កត់ធ្ងន់ថា ប្រសិនបើពិភពលោកមិនអាចចាប់យកឱកាសនេះបានក្នុងពេលឥឡូវនេះទេ ពិភពលោកអាចប្រឈមនឹងហានិភ័យនៃមេរោគបំប្លែងថ្មីកាន់តែច្រើន ការស្លាប់កាន់តែច្រើន ការរំខានកាន់តែច្រើន និងភាពមិនច្បាស់លាស់ក៏កាន់តែច្រើនផងដែរ។
អត្ថបទគួរអាន
យោងតាមរបាយការណ៍ស្ដីពីជំងឺកូវីត១៩ចុងក្រោយបង្អស់របស់អង្គការសុខភាពពិភពលោកបានឱ្យដឹងថា ចំនួនករណីឆ្លងថ្មីនៃជំងឺកូវីដ១៩ត្រូវគេរាយការណ៍ថាបានធ្លាក់ចុះ ២៨% មកនៅត្រឹម ៣ លាន១ សែននាក់ក្នុងអំឡុងសប្តាហ៍ដែលបញ្ចប់ទៅកាលថ្ងៃទី១១ ខែកញ្ញា បន្ទាប់ពីមានការធ្លាក់ចុះ ១២% កាលពីសប្តាហ៍មុន។
ប៉ុន្តែទីភ្នាក់ងារនេះបានព្រមានថា ការថយចុះនៃចំនួនករណីឆ្លងដែលគេបានរាយការណ៍នេះ គឺជាការតួលេខមិនជាក់លាក់នោះឡើយ ដោយសារតែប្រទេសជាច្រើនបានកាត់បន្ថយការធ្វើតេស្តិ៍រកជំងឺកូវីដ១៩ ហើយក៏ប្រហែលជារកមិនឃើញពីករណីឆ្លងដែលមានស្ថានភាពធ្ងន់ធ្ងរនោះឡើយ។
លោកស្រី Maria Van Kerkhove អ្នកដឹកនាំបច្ចេកទេសរបស់អង្គការសុខភាពពិភពលោកស្តីពីជំងឺកូវីដ១៩បានប្រាប់អ្នកយកព័ត៌មានថា ករណីដែលកំពុងត្រូវបានរាយការណ៍ទៅអង្គការសុខភាពពិភពលោកដែលពួកគេបានដឹង គឺជាការប៉ាន់ស្មានមិនគ្រប់គ្រាន់។ អ្នកជំនាញរូបនេះ បន្ថែមថា មានករណីឆ្លងច្រើនជាងអ្វី ដែលគេបានរាយការណ៍ប្រាប់ទៅទីភ្នាក់ងារនេះ ហើយបានព្រមានថា មេរោគនេះកំពុងតែចរាចរក្នុងកម្រិតមួយខ្លាំងនៅជុំវិញពិភពលោកនៅពេលបច្ចុប្បន្ននេះ។
សូមរំលឹកថា ចាប់តាំងពីមានការផ្ទុះឡើងនៃជំងឺរាតត្បាតនេះមក អង្គការ WHO បានបូកសរុបចំនួនអ្នកឆ្លងដល់ជាង ៦០៥ លាននាក់ និងមានអ្នកស្លាប់ប្រហែល ៦ លាន ៤ សែននាក់បើទោះជាចំនួនទាំងពីរនេះត្រូវបានគេជឿថា មានច្រើនជាងនេះក៏ដោយ។
ការសិក្សារបស់អង្គការសុខភាពពិភពលោកដែលបានចេញផ្សាយនៅក្នុងខែឧសភា ផ្អែកលើការស្លាប់ដ៏លើសលប់នៅតាមប្រទេសផ្សេងៗក្នុងអំឡុងពេលជំងឺរាតត្បាតនេះ បានប៉ាន់ប្រមាណថា មនុស្សរហូតដល់ ១៧ លាននាក់អាចបានស្លាប់ដោយសារជំងឺកូវីត១៩ក្នុងឆ្នាំ២០២០ និង២០២១៕
