យោងតាមការប្រកាសដោយសេតវិមាន មេដឹកនាំសហរដ្ឋអាម៉េរិក និងឥណ្ឌូនេស៊ីបានយល់ព្រមធ្វើឱ្យប្រសើរឡើងនូវទំនាក់ទំនងទ្វេភាគី ឱ្យក្លាយជាភាពជាដៃគូយុទ្ធសាស្ត្រទូលំទូលាយ។
តាមមន្ត្រីជាន់ខ្ពស់អាម៉េរិកម្នាក់បានប្រាប់អ្នកកាសែតនៅមុនជំនួបថា កិច្ចពិភាក្សាទ្វេភាគីនេះនឹងផ្តោតសំខាន់ភាគច្រើនលើធនធានកម្រ។ យ៉ាងណាក៏ដោយ មន្ត្រីរូបនោះសង្កត់ធ្ងន់ថា វាស្ថិតក្នុងដំណាក់កាលពិភាក្សាដំបូងប៉ុណ្ណោះ មិនទាន់អាចកំណត់ថា ជាកិច្ចព្រមព្រៀងពាណិជ្ជកម្មសេរីរវាងអាម៉េរិក និងឥណ្ឌូនេស៊ីទេ។
មុនជួបលោក ចូ បៃដិន នៅសេតវិមាន លោក ចូកូ វីដូដូ បាននិយាយនៅក្នុងសុន្ទរកថាមួយនៅឯសាកលវិទ្យាល័យ Georgetown ក្នុងទីក្រុងវ៉ាស៊ីនតោនថា ក្នុងនាមជាប្រទេស ដែលសម្បូរទៅដោយសារធាតុរ៉ែសំខាន់ៗ និងសក្តានុពលថាមពលបៃតង ឥណ្ឌូនេស៊ីអាចក្លាយជាដៃគូដ៏សំខាន់សម្រាប់សហរដ្ឋអាម៉េរិក។
លោកបន្ថែមថា ឥណ្ឌូណេស៊ីមានរ៉ែនីកែលធំជាងគេរបស់ពិភពលោក និងសក្តានុពលថាមពលបៃតងមានដល់ទៅ៣៦០០ជីហ្គាវ៉ាត់។ ហើយនេះជាសក្ដានុពលដ៏អស្ចារ្យមួយដែលអាម៉េរិក និងឥណ្ឌូនេស៊ី អាចអភិវឌ្ឍរួមគ្នាបាន។
យ៉ាងណាមិញ បន្ទាប់ពីកិច្ចពិភាក្សានៅសេតវិមាន សេចក្តីថ្លែងការណ៍រួមមួយបាននិយាយថា មេដឹកនាំទាំងពីរបានយល់ព្រមបង្កើតផែនការសកម្មភាពរ៉ែសំខាន់ៗ ដែលអាចបង្កើតឱ្យមានការវិនិយោគស្តង់ដារខ្ពស់នៅក្នុងវិស័យរ៉ែសំខាន់ៗនៅក្នុងប្រទេសទាំងពីរ។
ហើយលោក បៃដិន នឹងប្រកាសអំពីអនុស្សរណៈនៃការយោគយល់គ្នារវាងក្រសួងការបរទេស និងក្រសួងថាមពល និងធនធានរ៉ែរបស់ប្រទេសឥណ្ឌូនេស៊ី ស្តីពីការអភិវឌ្ឍន៍ថាមពល និងរ៉ែប្រកបដោយនិរន្តរភាព។
អត្ថបទគួរអាន
មែនទែនទៅ អាម៉េរិក ក្រោមរដ្ឋបាលលោក ចូ បៃដិន បានព្យាយាមពង្រីកពាណិជ្ជកម្មរ៉ែ ជាមួយប្រជាជាតិអាស៊ីអាគ្នេយ៍មួយចំនួនដូចជាឥណ្ឌូនេស៊ីជាដើម ដើម្បីកាត់បន្ថយការពឹងផ្អែកលើប្រទេសចិន។
បើការចុះហត្ថលេខាលើកិច្ចព្រមព្រៀងពាណិជ្ជកម្មសេរីរវាងអាម៉េរិក និងឥណ្ឌូនេស៊ី ចេញជារូបរាងមែននោះ វានឹងអនុញ្ញាតឱ្យរថយន្តអគ្គិសនីអាម៉េរិកផលិតឡើង ដោយប្រើរ៉ែនីកែលឥណ្ឌូនេស៊ីជំនួសពីចិន។ ប៉ុន្តែ ទោះជាយ៉ាងណា មន្ត្រីជាន់ខ្ពស់អាម៉េរិកបានសង្កត់ធ្ងន់ថា ប្រទេសទាំងពីរ គឺនៅដំណាក់កាលដំបូងបំផុតនៃកិច្ចពិភាក្សាស្តីពីរ៉ែនីកែលនេះ។
យ៉ាងណាមិញ សមាជិកព្រឹទ្ធសភាអាម៉េរិកមួយក្រុមបានប្រឆាំងនឹងចំណាត់ការបែបនេះជាមួយប្រទេសឥណ្ឌូនេស៊ី ដោយអះអាងថា ស្តង់ដាររបស់ប្រទេសឥណ្ឌូនេស៊ី លើសិទ្ធិការងារ ការការពារបរិស្ថាន សុវត្ថិភាព និងសិទ្ធិមនុស្សកំពុងមានភាពសង្ស័យ។ នៅក្នុងលិខិតមួយទៅកាន់រដ្ឋាភិបាលសហរដ្ឋអាម៉េ រិក សមាជិកព្រឹទ្ធសភាទាំងនោះ បានគូសបញ្ជាក់ថា ក្រុមហ៊ុនចិនកំពុងត្រួតត្រានៅក្នុងការរុករករ៉ែ និងការចម្រាញ់រ៉ែក្នុងប្រទេសឥណ្ឌូនេស៊ី ដោយកត់សម្គាល់ថា ការវិនិយោគពីប្រទេសចិនទៅក្នុងវិស័យរ៉ែនីកែលរបស់ប្រទេសនេះបានកើនឡើងដល់ទៅជិត៤ពាន់លានដុល្លា រនៅក្នុងឆមាសទីមួយនៃឆ្នាំ២០២២។
ដូចនេះ កិច្ចព្រមព្រៀងពាណិជ្ជកម្មសេរីជាមួយឥណ្ឌូនេស៊ីនឹងមិនឱ្យអាម៉េរិកអាចទប់ស្កាត់ការពឹងផ្អែកលើរ៉ែនីកែលចិនប៉ុណ្ណោះទេ ថែមទាំងធ្វើឱ្យក្រុមហ៊ុនចិនទាំងនោះទទួលបានប្រយោជន៍ថែមទៀត៕
None
