ប្រធាននៃសាខាធនាគារកណ្ដាលប្រចាំទីក្រុង ឃ្លីវឺលេន (Cleveland) សហរដ្ឋអាមេរិក អ្នកស្រី ឡូរ៉េតា ម៉េសស្ទើ (Loretta Mester) បានថ្លែងនៅក្នុងបទសម្ភាសន៍ជាមួយសារព័ត៌មានAPថា ធនាគារកណ្ដាលនឹងដំឡើងអត្រាការប្រាក់គោលបន្ថែមទៀត គ្រាន់តែថា ចំពោះតួរលេខជាក់ស្ដែងគឺនឹងសម្រេចនៅក្នុងកិច្ចប្រជុំពិភាក្សានៅអំឡុងថ្ងៃទី៣១ខែមករា ដល់ថ្ងៃទី១ខែកុម្ភៈខាងមុខ។
ការគូសបញ្ជាក់បែបនេះ បានឆ្លុះបញ្ចាំងពីទស្សនៈរបស់អ្នកបង្កើតគោលនយោបាយផ្សេងទៀត ដែល គិតត្រឹមខែធ្នូឆ្នាំ២០២២ អ្នកបង្កើតគោលនយោបាយហិរញ្ញវត្ថុភាគច្រើនបានឯកភាពកំណត់អត្រាការប្រាក់គោលចន្លោះពី ៥%ទៅ ៥,២៥%សម្រាប់រយៈពេលប៉ុន្មានខែខាងមុខនេះ។ គួរជម្រាបថា បច្ចុប្បន្នអត្រាការប្រាក់កម្ចីគោលរបស់ធនាគារកណ្ដាលអាមេរិក បច្ចុប្បន្នស្ថិតនៅក្នុងចន្លោះគោលដៅពី ៤,២៥%ទៅ៤,៥០%។
អ្នកស្រី ឡូរ៉េតា ម៉េសស្ទើ គិតថាធនាគារកណ្ដាលគួរតែដំឡើងអត្រាការប្រាក់គោលឲ្យបានខ្ពស់ជាងនេះ ហើយរក្សាតម្លៃនោះឲ្យនៅថេរមួយរយៈសិន ដើម្បីរង់ចាំមើលថា តើវាអាចបន្ថយអតិផរណាកំរិតណា។ ដោយឡែក អ្នកវិនិយោគរំពឹងថាធនាគារកណ្ដាលនឹងដំឡើងអត្រាការប្រាក់កម្ចីចំនួន ០,២៥%បន្ថែមទៀត ប៉ុណ្ណោះ។
អត្ថបទគួរអាន
ប៉ុន្តែកត្តាមួយចំនួនដូចជាភាពយឺតយ៉ាវនៃការចំណាយរបស់ពលរដ្ឋ អតិផរណា និងការផលិត បានជំរុញឱ្យមានការរំពឹងទុកថ្មីមួយទៀតថា ក្នុងពេលឆាប់ៗនេះថា ធនាគារកណ្ដាល អាចនឹងបញ្ឈប់ការដំឡើងអត្រាការប្រាក់ត្រឹមជិត៥%នេះ។
សូមជម្រាបថា ធនាគារកណ្តាលបានចាប់ផ្តើមដំឡើងអត្រាការប្រាក់គោលតាំងពីខែមីនាឆ្នាំ២០២២ ដែលកាលនោះអត្រាការប្រាក់គោលស្ថិតនៅត្រឹមចន្លោះពី 0%ទៅ០,២៥%ប៉ុណ្ណោះ។ កម្រិតអតិផរណាកំពុងចាប់ផ្តើមកើនឡើងដល់កម្រិតខ្ពស់បំផុតក្នុងរយៈពេល៤០ឆ្នាំចុងក្រោយ ដែលវាច្រើនជាងការកំណត់ទុកត្រឹម២% របស់ធនាគារកណ្ដាលកាលពីឆ្នាំ២០២២។ ទិន្នន័យអតិផរណាអាមេរិកនៅខែធ្នូចុងឆ្នាំ២០២២ ឈរនៅកំរិត ៦,៥% ធៀបរយៈពេលដូចគ្នាកាលពីឆ្នាំ២០២១ ដែលតួលេខនេះនៅតែមានខ្ពស់ជាងគោលដៅរបស់ធនាគារកណ្តាលដដែល៕
អត្ថបទ ៖ សារៀម លក្ខិណា
