យ៉ាងនេះក្តី សន្តិសុខ និងឯករាជ្យភាពលើវិស័យថាមពល នៅតែជាគោលដៅរបស់កម្ពុជានាពេលបច្ចុប្បន្ននឹងទៅអនាគត ព្រោះកម្ពុជាមិនចង់ឲ្យគេខ្ទប់ការអភិវឌ្ឍដោយសារវិស័យថាមពលនោះទេ។ ថ្នាក់ដឹកនាំអគ្គិសនីរូបនេះ កត់សម្គាល់ឃើញថា នៅលើសកលលោកមានប្រទេសតិចតួចប៉ុណ្ណោះ ដែលអាចផលិតថាមពលប្រើប្រាស់គ្រប់គ្រាន់ដោយខ្លួន ដោយមិនចាំបាច់ទិញពីប្រទេសជិតខាង។ យ៉ាងណាក៏ដោយថ្នាក់ដឹកនាំអគ្គិសនីកម្ពុជាបានបញ្ជាក់ប្រាប់ថា កម្ពុជាមិនស្លាប់នោះទេ ទោះបីគ្មានការផ្តត់ផ្គង់ថាមពលពីប្រទេសជិតខាង។
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជាបានលើកឡើងថា ការទិញថាមពលអគ្គិសនីពីប្រទេសក្បែរខាង ដើម្បីបំពេញតម្រូវការប្រើប្រាស់ក្នុងស្រុកវាមិនមែនជារឿង ដែលពលរដ្ឋត្រូវព្រួយបារម្ភនោះទេ ព្រោះវាជាការធ្វើពាណិជ្ជកម្មក្នុងវិស័យថាមពល។ សម្រាប់ឯកឧត្តម នៅក្នុងវិស័យថាមពលការទិញលក់ថាមពលឆ្លងប្រទេសជាការធ្វើពាណិជ្ជកម្មដើម្បីផលចំណេញទៅវិញទៅមក។ ក្រៅពីផលចំណេញ ការទិញថាមពលពីក្រៅប្រទេសទៀតសោត វាក៏អាចជួយរក្សាតម្លៃអគ្គិសនីប្រើប្រាស់ក្នុងស្រុកឲ្យមានភាពល្អប្រសើរផងដែរ។
ឯកឧត្តមបានគូសបញ្ជាក់បន្ថែមថា ទោះបីកម្ពុជាបានទិញថាមពលមួយចំនួនពីប្រទេសវៀតណាម ឡាវ និងថៃ ដើម្បីបំពេញតម្រូវការប្រើប្រាស់ប្រចាំថ្ងៃក៏ដោយ តែវាមិនបានគំរាមកំហែងដល់សន្តិសុខវិស័យថាមពលអគ្គិសនីកម្ពុជានោះទេ ពោលគឺកម្ពុជានៅតែមានសន្តិសុខគ្រប់គ្រាន់លើវិស័យថាមពល។ ត្រង់ចំណុចនេះឯកឧត្តមអះអាងថា កម្ពុជាមិនស្លាប់នោះទេទោះគ្មានការផ្តត់ផ្គង់ថាមពលពីប្រទេសជិតខាង។ តែយ៉ាងណាឯកឧត្តមសង្កត់ធ្ងន់ថា កម្ពុជាមិនចង់ឲ្យការអភិវឌ្ឍ ត្រូវបានគេបិទខ្ទប់ដោយសារថាមពលអគ្គិសនីនោះទេ ដូច្នេះសន្តិសុខថាមពល និងភាពឯករាជ្យលើវិស័យថាមពលនៅតែជាគោលដៅសម្រាប់កម្ពុជានាពេលបច្ចុប្បន្ន និងទៅអនាគត។
អត្ថបទគួរអាន
អគ្គនាយកអគ្គិសនីរូបនេះ បានបន្ថែមទៀតថា មិនមែនមានតែកម្ពុជានោះទេ ដែលទិញថាមពលបរទេសមកបំពេញតម្រូវការប្រើប្រាស់ក្នុងស្រុក សូម្បីប្រទេសជឿនលឿនមួយចំនួនលើពិភពលោកក៏ទិញភ្លើងពីក្រៅប្រទេសមកបំពេញតម្រូវការប្រើប្រាស់ក្នុងស្រុកផងដែរ។ ឯកឧត្តមអះអាងថា នៅលើសកលលោកមានប្រទេសតិចតួចប៉ុណ្ណោះ ដែលអាចផលិតថាមពលប្រើប្រាស់គ្រប់គ្រាន់ដោយខ្លួនឯង ដោយមិនទិញពីប្រទេសជិតខាង។
ថ្នាក់ដឹកនាំអគ្គិសនីកម្ពុជា បានអះអាងថា បច្ចុប្បន្នកម្ពុជាមានថាមពលអគ្គិសនីគ្រប់គ្រាន់ក្នុងការផ្តត់ផ្គង់តម្រូវការប្រើប្រាស់លើវិស័យឧស្សាហកម្ម ពាណិជ្ជកម្មនិងសិប្បកម្ម ក៏ដូចជាការប្រើប្រាស់ប្រចាំថ្ងៃរបស់ប្រជាពលរដ្ឋ ទោះបីវិស័យថាមពលអគ្គិសនីកម្ពុជាបានរងឥទ្ធិពលពីវិបត្តិថាមពលសកលក៏ដោយ។ ថាមពលអគ្គិសនីដែលប្រើប្រាស់នៅកម្ពុជាបច្ចុប្បន្ន ភាគច្រើនផលិតនៅក្នុងស្រុក និងនាំចូលពីប្រទេសវៀតណាម ថៃ និងឡាវ។
បើយើងតាមរបាយការរបស់ក្រសួងរ៉ែ និងថាមពលនៅឆ្នាំ២០២០ កម្ពុជាអាចផលិតកកើតឡើងវិញ និងមិនកកើតឡើងបានជិត៣ពាន់មេហ្គាវ៉ាត់ម៉ោង និងនាំចូលពីក្រៅប្រទេសជិត១ពាន់មេហ្គាវ៉ាត់ម៉ោង។ នៅឆ្នាំ២០២១ រោងចក្រនៅកម្ពុជាអាចផលិតថាមពលបានចំនួនជាង៣ពាន់មេកាវ៉ាត់ និងគ្រោងនាំចូលពីក្រៅប្រទេសជិត១ពាន់មេហ្គាវ៉ាត់ម៉ោង៕
None
