តម្លៃមាសហក់ឡើងខ្ពស់ បន្ទាប់ពី លោក Jerome Powell ប្រធានធនាគារកណ្ដាលអាមេរិក បានប្រកាសកាលពីថ្ងៃចន្ទ ទី១៥ ខែកក្កដាថា ធនាគារកណ្ដាលអាមេរិក នឹងមិនរង់ចាំដល់អតិផរណាធ្លាក់ចុះមកនៅ ២% តាមគោលដៅកំណត់ ទើបធ្វើការកាត់បន្ថយអត្រាការប្រាក់នោះទេ។
ក្នុងន័យនេះ គឺធនាគារកណ្ដាលអាមេរិក ទំនងជានឹងអាចកាត់បន្ថយអត្រាកប្រាក់នៅមុនគោលដៅកំណត់ទៅទៀត។ កត្តានេះ បានធ្វើឲ្យអ្នកវិនិយោគជាច្រើន បានងាកមកវិនិយោគលើមាសជំនួសវិញ ដោយបារម្ភថា ប្រាក់ដុល្លារនឹងមានការធ្លាក់ថ្លៃ នៅពេលខាងមុខ។
បើតាមស្ថាប័នជំនាញផ្នែកទីផ្សារបានឲ្យដឹងថា ធនាគារកណ្ដាលអាមេរិក អាចនឹងកាត់បន្ថយអត្រាការប្រាក់នៅខែកញ្ញាខាងមុខនេះ។ នៅគ្រានោះ មាសនឹងមាននិន្នាការក្លាយជាទ្រព្យដ៏ទាក់ទាញសម្រាប់ការវិនិយោគ បើធៀបនឹងទ្រព្យវិនិយោគផ្សេងទៀត ដូចជាមូលបត្របំណុលជាដើម។
អ្នកវិភាគស្រាវជ្រាវ របស់ស្ថាប័ន Commonwealth Bank of Australia បានអះអាងនៅក្នុងសារព័ត៌មាន CNBC ថា តម្លៃមាសអាចនឹងកើនលើសការព្យាករ ២ ៥០០ ដុល្លារក្នុងមួយអោន នៅត្រឹមចុងឆ្នាំ២០២៤នេះ៕
