ការសម្រេចរបស់អង្គការពាណិជ្ជកម្មពិភពលោកនេះ ធ្វើឡើងក្រោយពីជាង២ឆ្នាំមុន ក្រោមអតីតរដ្ឋបាលលោកដូណាល់ត្រាំ អាមេរិកសុំឱ្យកំណត់ទំនិញពីហុងកុងត្រូវផ្លាស់ប្តូរមកជាទំនិញដែលមានប្រភពដើមពីប្រទេសចិនវិញ មុនអាចនាំចូលកំពង់ផែរបស់អាមេរិកបាន។ ការស្នើដូចនេះ ដោយសារតែក្រុងវ៉ាស៊ីនតោនគិតថា ក្រុងហុងកុងលែងឯករាជ្យដូចមុនទៀតហើយ ក្រោយការបង្ក្រាបលើកម្លាំងប្រជាធិបតេយ្យ និងច្បាប់សន្តិសុខជាតិដែលទីក្រុងប៉េកាំងបានដាក់មកលើហុងកុងនាពេលកន្លងមក។ Story: ទោះយ៉ាងណា ក្រុមគណៈកម្មការរបស់អង្គការពាណិជ្ជកម្មពិភពលោក បានរកឃើញថា ការស្នើសុំបែបនេះរបស់អាមេរិក គឺខុសទៅនឹងច្បាប់ពាណិជ្ជកម្មអន្តរជាតិត្រង់មាត្រាទី៩ ដែលចែងពីកិច្ចព្រមព្រៀងទូទៅស្តីពីទំនិញ និងពន្ធ ដែលតម្រូវឱ្យសមាជិក WTO ត្រូវតែធានាថា ទោះមានការផ្លាស់ប្តូរស្លាកសម្គាល់ប្រភពដើមនៃទំនិញ ប៉ុន្ដែមិនត្រូវធ្វើឱ្យក្រុមហ៊ុន ឬប្រទេសដែលជាសមាជិក WTO ផ្សេងទៀត ខាតបង់ប្រយោជន៍នោះទេ។
ប៉ុន្តែភាគីអាមេរិកអះអាងថា ការទាមទាររបស់ពួកគេក៏ដើម្បីការពារសុវត្ថិភាព និងផលប្រយោជន៍ពាណិជ្ជកម្មរបស់អាមេរិកដូចគ្នា ដោយហេតុថាទំនិញពី ហុងកុង និងចិន គឺទទួលបានការលើកលែងខុសគ្នាពីអាមេរិកពេលធ្វើពាណិជ្ជកម្ម ដូចនេះនៅពេលដែលហុងកុងលែងឯករាជ្យដូចមុន អាមេរិកជឿថា វាគ្រាន់តែជាក្រុងមួយទៀតរបស់ចិន ដែលត្រូវតែអនុវត្តដូចទំនិញដែលផលិតក្នុងប្រទេសចិនដែរ។
យ៉ាងណាមិញ សម្រាប់រដ្ឋបាលក្រុងហុងកុងវិញបានសាទរយ៉ាងខ្លាំងចំពោះសេចក្តីសម្រេចរបស់ WTO ដែលបង្ហាញពីការទទួលស្គាល់ថា ហុងកុងជាទីតាំងធ្វើពាណិជ្ជកម្មមួយ ដែលនៅដោយឡែក និងឯករាជ្យ។
សូមជម្រាបថា កាលពីឆ្នាំ២០២០ អាមេរិកមិនត្រឹមតែប្តឹងហុងកុងមក WTO ឡើយ តែថែមទាំងបានដកសិទ្ធិធ្វើពាណិជ្ជកម្មពិសេសលក្ខណៈទ្វេភាគីទៀតផង បន្ទាប់ពីប្រទេសចិនបានបង្កើនឥទ្ធិពលមកលើទីក្រុងនេះ។ ទោះយ៉ាងណា នៅពេលអាមេរិកនៅតែមានសិទ្ធិប្តឹងឧទ្ធរណ៍លើការសម្រេចរបស់ WTO គ្រាន់តែអាមេរិកសម្រេចិត្តយ៉ាងណា គេនៅមិនទាន់ដឹងឡើយទេ៕
