នៅក្នុងជំនួបជាមួយនឹងឯកឧត្តម ងិន ឆាយ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានកសិកម្ម នាពេលថ្មីៗនេះ លោក Nabeshima Katsuhito នាយកក្រុមហ៊ុន Yamato Green នៃប្រទេសជប៉ុន បានលើកឡើងថា ក្រោយពីមានការចុះ MoU ជាមួយនឹងក្រសួងកសិកម្មកម្ពុជាកាលពីពេលកន្លងទៅថ្មីៗនេះ ខាងក្រុមហ៊ុនជប៉ុន Yamato Green បានធ្វើការងារយ៉ាងជិតស្និទ្ធជាមួយនឹងរាជរដ្ឋាភិបាលកម្ពុជា។ លោក Nabeshima បន្ថែមទៀតថា បច្ចុប្បន្ន ក្រុមហ៊ុនគ្រោងនឹងសាងសង់ Green House ដើម្បីដាំដុះបន្លែ ព្រមទាំងរៀបចំការ កែច្នៃបង្កកផ្លែឈើ និងបន្លែ ដីចជាផ្លែប៊ឺ និងស្ពៃក្តោប សម្រាប់នាំចេញ។ ក្នុងនោះដែរ ខេត្តមណ្ឌលគិរី និង បាត់ដំបង គឺជាខេត្តដែលស្ថិតក្រោមការពិចារណានិងជ្រើសរើសរបស់ក្រុមហ៊ុន និងជាខេត្តដែល មានសក្តានុពលសម្រាប់ផលិតកម្មបន្លែ និងជាទីកន្លែងប្រមូលផ្តុំបន្លែដ៏សមស្របមួយ
អត្ថបទទាក់ទង!
នាយកក្រុមហ៊ុនជប៉ុនរូបនេះ បានបញ្ជាក់ទៀតថា ក្រុមហ៊ុន មានគោលបំណងបង្កើតកសិដ្ឋានបន្លែលើទីតាំងធំៗមួយចំនួនសម្រាប់ជួលដល់កសិករដើម្បីដាំដុះបន្លែ ដោយប្រើប្រាស់បច្ចេកវិទ្យាទំនើប។ លោកបានស្នើសុំការណែនាំបន្ថែម ក៏ដូចជាទស្សនៈរបស់ អគ្គនាយកដ្ឋានកសិកម្ម ចំពោះការងារនេះ។
ឯកឧត្តម ងិន ឆាយ បានបញ្ជាក់ថា ការងារដែលក្រុមហ៊ុនជប៉ុន Yamato Green បាន និងកំពុងរៀបចំគឺស្របនឹងទស្សនវិស័យ របស់អគ្គនាយកដ្ឋានកសិកម្ម ក្នុងការបង្កើតសួនផលិតកម្មបន្លែសុវត្ថិភាព ដែលការជ្រើសរើស ទីតាំងសម្រាប់អនុវត្ត គឺត្រូវពិចារណាទៅលើតំបន់ជាប់នឹងមាត់ទន្លេ និងដីកោះ ដោយសារប្រជាជននៅទីនោះភាគច្រើនជាកសិករដាំដុះបន្លែស្រាប់ ហើយក្រុមហ៊ុនអាចពិចារណាទៅ លើការផ្តល់ពូជ ការសាងសង់ Green House ផ្តល់បចេ្ចកទេសបណ្តុះកូន/ពូជបន្លែ និងប្រភេទ បន្លែដែលទីផ្សារត្រូវការ។
ឯកឧត្តម ងិន ឆាយបានឯកភាពលើការរៀបចំកសិដ្ឋានបន្លែសម្រាប់ជួល ឱ្យកសិករ ប៉ុន្តែប្រសិនលោកថា បើការងារនេះត្រូវបានអនុវត្តលើកសិករដែលមានដីស្រាប់ គឺជាការល្អ ប្រសើរ និងមានការអភិវឌ្ឍលឿនជាង។ អគ្គនាយកដ្ឋានកសិកម្ម មានទស្សនវិស័យក្នុងការបង្កើត សហគមន៍អ្នកដាំបន្លែសុវត្ថិភាព ហើយការងារនេះនឹងអាចឈានទៅដល់ការបង្កើតសហភាព សហគមន៍អ្នកដាំបន្លែសុវត្ថិភាព ដែលកសិករអាចដាំបន្លែតាមប្រតិទិនដាំដុះដើម្បីធានាបានទាំង ស្ថិរភាពក្នុងខ្សែចង្វាក់ផលិតកម្ម និងទីផ្សារបន្លែ។
ជាការសាកល្បង ក្រុមហ៊ុន Yamato Green អាចសហការជាមួយអគ្គនាយកដ្ឋានកសិកម្ម ដើម្បីរៀបចំសួនផលិតកម្មបន្លែសុវត្ថិភាពក្នុងចំនួនកំណត់ណាមួយ ហើយគម្រោងនេះ នឹងអាចប្រែក្លាយសួនផលិតកម្មបន្លែសុវត្ថិភាពទៅជាតំបន់ កសិ-ទេសចរណ៍ និងអេកូ-ទេសចរណ៍នាពេលអនាគតដ៏ខ្លី។ លោក Nabeshima Katsuhito បានទទួលយកសំណើនេះ និងបានស្នើឱ្យអគ្គនាយកដ្ឋានកសិកម្ម រៀបចំគម្រោងសំណើសុំថវិកា ដោយសហការជាមួយក្រុមហ៊ុន Yamato Greenផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
