កោះតៃវ៉ាន់ ដែលប្រទេសចិនតែងតែប្រកាសក្ដែងៗថា ជាទឹកដីរបស់ខ្លួននោះ បានរិះគន់យ៉ាងចាស់ដៃចំពោះទង្វើរបស់ទីក្រុងប៉េកាំងនៅ២ឆ្នាំកន្លងមកនេះ បន្ទាប់ពីមហាអំណាចសេដ្ឋកិច្ចពិភពលោកទី២មួយនេះ បានសម្រេចបិទខ្ទប់លើការនាំចូលផលិតផលពីកោះតៃវ៉ាន់មួយចំនួនដូចជា ទំនិញកសិកម្ម ជលផល រួមទាំងផ្លែម្នាស់ ត្រីក្រៀមជាដើម។ វិធានការបិទខ្ទប់ការនាំចូលរបស់ចិននេះ ត្រូវបានគេមើលឃើញថា គឺជាការដាក់សម្ពាធបន្ថែមទៀតទៅលើទីក្រុងតៃប៉ិ ដ្បិតថាថ្មីៗនេះ កោះមួយនេះហាក់មានទំនាក់ទំនងចេញមុខចេញមាត់កាន់តែខ្លាំងឡើងជាមួយនឹងសហរដ្ឋអាមេរិក ពោលគឺចាប់តាំងមានដំណើរទស្សនកិច្ចរបស់ប្រធានសភាអាមេរិក លោកស្រី ណានស៊ី ផេឡូស៊ី ទៅកាន់កោះនេះ កាលពីខែសីហាកន្លងទៅ។
ជារឿយៗ ចិនតែងតែបានព្រមានប្រាប់អាមេរិកម្ដងហើយម្ដងទៀតថា កុំឲ្យប្រលែងនឹងភ្លើងឲ្យសោះជុំវិញបញ្ហាដ៏រសើបនៅកោះតៃវ៉ាន់នេះ ហើយចិនក៏មិនដែលគិតថា បោះបង់ការប្រើកម្លាំងដើម្បីយកកោះតៃវ៉ាន់មកគ្រប់គ្រងនោះដែរ។
អត្ថបទគួរអាន
យ៉ាងណាមិញ សម្រាប់បម្រាមនាំចូលផលិតផលពីតៃវ៉ាន់ចុងក្រោយនេះ មានគ្របដណ្ដប់លើផលិតផលជលផលជាច្រើនទៀត ពិសេសគឺមឹកតែម្ដង រួមទាំងផលិតផលស្រា និងស្រាបៀរមួយចំនួនទៀត ដោយប្រទេសចិនបានចោទប្រកាន់ថា ក្រុមហ៊ុនតៃវ៉ាន់ទាំងនោះ មិនបានបំពេញឯកសារពាក់ព័ន្ធបានត្រឹមត្រូវសម្រាប់ការនាំចូលទៅកាន់ប្រទេសចិនឡើយ។
ថ្នាក់ដឹកនាំជាន់ខ្ពស់របស់កោះតៃវ៉ាន់លោក Su Tseng-chang បាននិយាយថា ចិនបានប្រើប្រាស់កិច្ចការរដ្ឋបាល ដើម្បីជ្រៀតជ្រែកក្នុងកិច្ចការពាណិជ្ជកម្មទូទៅ ដែលវាមិនសមស្របតាមបទដ្ឋានរបស់អង្គការពាណិជ្ជកម្មពិភពលោកទាល់តែសោះ។ លោកបន្ថែមថា អាជ្ញាធរកោះតៃវ៉ាន់ នឹងទំនាក់ទំនាក់ជាមួយនឹងនាយកដ្ឋានរបស់ចិនដែលពាក់ព័ន្ធទាំងអស់ ដើម្បីស្វែងរកដំណោះស្រាយជុំវិញរឿងនេះ។
ថ្នាក់ដឹកនាំជាន់ខ្ពស់របស់កោះតៃវ៉ាន់រូបនេះ បានសង្កត់ធ្ងន់ថា ប្រសិនបើមិនមានការអនុលោមតាមបទដ្ឋានពាក់ព័ន្ធរបស់អង្គការ WTO ទេនោះ តៃវ៉ាន់នឹងអនុវត្តតាមបណ្ដាញពាក់ព័ន្ធដើម្បីដាក់ពាក្យប្ដឹងទៅកាន់ WTO បន្ដទៀត។
សូមបញ្ជាក់ថា តៃវ៉ាន់ និងចិន ទាំងពីរនាក់ គឺជាសមាជិករបស់អង្គការពាណិជ្ជកម្មពិភពលោកដូចគ្នា៕
