ប្រទេសតំបន់អាស៊ីអាគ្នេយ៍ បានស្វាគមន៍កិច្ចខិតខំប្រឹងប្រែងទាំងនេះ ព្រោះវាបានផ្តល់នូវការជំរុញកាន់តែធំធែង ដល់ឧស្សាហកម្មឱសថនៅក្នុងតំបន់ និងបង្កើតការងារបានច្រើនសម្រាប់ប្រជាជន ជាជាងការដែលត្រូវរង់ចាំទទួលវ៉ាក់សាំងដែលដឹកជញ្ជូនមកស្រាប់។
គួរកត់សម្គាល់ថា បច្ចុប្បន្នមានក្រុមហ៊ុនខ្លះថែមទាំងបានចាប់ផ្តើមធ្វើតេស្តសាកល្បងវ៉ាក់សាំង នៅក្នុងតំបន់អាស៊ីអាគ្នេយ៍រួចហើយដែរ ប៉ុន្តែនៅមិនទាន់ទទួលបានការអនុញ្ញាតឲ្យប្រើប្រាស់ នៅក្នុងប្រទេសដែលពួកគេផលិត។
ជាក់ស្តែង ក្រុមហ៊ុនជីវបច្ចេកវិទ្យាឥណ្ឌូនេស៊ី ឈ្មោះ អ៊ីតាណា (Etana Biotechnologies) នឹងចាប់ផ្តើមផលិតវ៉ាក់សាំងប្រភេទ mRNA ដែលជាប្រភេទដូចគ្នាដែលបង្កើតឡើងដោយក្រុមហ៊ុន Pfizer និង Moderna។ នេះបើតាមការប្រកាសដោយអាជ្ញាធរឥណ្ឌូនេស៊ី កាលពីខែមុននេះ។
គួរបញ្ជាក់ថាក្រុមហ៊ុន ឥណ្ឌូនេស៊ីខាងលើនេះ ក៏ទទួលបានជំនួយផ្នែកបច្ចេកទេសផលិត ពីក្រុមហ៊ុនផលិតឱសថរបស់ចិនឈ្មោះ Walvax Biotechnologyផងដែរ។ បច្ចុប្បន្នក្រុមហ៊ុនឥណ្ឌូនេស៊ីកំពុងធ្វើការសាកល្បងវ៉ាក់សាំងក្នុងមន្ទីរពិសោធន៍ក្នុងដំណាក់កាលទី៣។ ក្រោយបញ្ចប់ការពិសោធ និងទទួលបានការអនុញ្ញាតឲ្យប្រើប្រាស់ ក្រុមហ៊ុនគម្រោងផលិតថ្នាំវ៉ាក់សាំងចំនួន ៧០លានដូសជារៀងរាល់ឆ្នាំ។
ដោយឡែក បើយើងសង្កេតមើលទៅឃើញថា តំបន់អាស៊ាន គឺជាបេះដូងនៃតំបន់ឥណ្ឌូប៉ាស៊ីហ្វិកទាំងមូល ហើយបច្ចុប្បន្នតំបន់នៃសមាជិកប្រទេសទាំង១០នេះ បានលេចមុខលេចមាត់ជាងគេ សម្រាប់ការអនុវត្តនយោបាយការទូតវ៉ាក់សាំង របស់មហាអំណាចចិន និងអាមេរិក។ ប្រទេសចិនបានផ្តល់វ៉ាក់សាំងសរុបប្រមាណ១៩០លានដូសហើយ ដល់ប្រទេសសមាជិកសមាគមប្រជាជាតិអាស៊ីអាគ្នេយ៍ ឬហៅកាត់ថាអាស៊ាន គិតត្រឹមពាក់កណ្តាលខែកញ្ញាឆ្នាំនេះ។
អត្ថបទគួរអាន
ស្របពេលដែលក្រុងប៉េកាំង បាននិងកំពុងបន្តផ្តល់ ទាំងបច្ចេកទេសផលិត និងទាំងថ្នាំវ៉ាក់សាំងដល់តំបន់អាស៊ានកាន់តែច្រើនឡើងៗ សហរដ្ឋអាមេរិកឯណោះវិញ ក៏បានចាប់ផ្តើមអនុវត្តនយោបាយការទូតវ៉ាក់សាំងរបស់ខ្លួនផងដែរ។
ជាក់ស្តែងកាលពីសប្តាហ៍មុន ក្រុមហ៊ុន Dynavax Technologies ដែលមានមូលដ្ឋាននៅសហរដ្ឋអាមេរិក បានចុះហត្ថលេខាលើអនុស្សរណៈនៃការយោគយល់គ្នាស្តីពីការអភិវឌ្ឍវ៉ាក់សាំងជាមួយក្រុមហ៊ុន Bio Farma ដែលគ្រប់គ្រងដោយរដ្ឋឥណ្ឌូនេស៊ី។
គួរជម្រាបថា មិនមែនតែឥណ្ឌូនេស៊ីមួយទេដែលជាគោលដៅក្នុងការផ្តល់បច្ចេកទេស និងសហការផលិតវ៉ាក់សាំងកូវីដ១៩នេះ ប៉ុន្តែគេសង្កេតឃើញក្រុមហ៊ុនអាមេរិកដទៃទៀតបាននិងកំពុងសហការជាមួយក្រុមហ៊ុន Vingroup របស់វៀតណាមដើម្បីផលិតវ៉ាក់សាំងនៅក្នុងស្រុកដូចគ្នា ហើយដែលបច្ចុប្បន្នបានដំណើរការសាកល្បងដល់ដំណាក់កាលទី២ហើយ។
Vingroup មានបំណងចាប់ផ្តើមផលិតវ៉ាក់សាំងនៅរោងចក្រថ្មីមួយក្នុងទីក្រុងហាណូយនៅដើមឆ្នាំ ២០២២ខាងមុខ ដែលនឹងអាចផលិតបានដល់ ២០០លានដូសក្នុងមួយឆ្នាំ។
សូមជម្រាបថា ក្នុងចំណោមប្រទេសទាំងអស់ដែលទទួលបានកិច្ចសហការផលិតវ៉ាក់សាំង មានតែប្រទេសថៃមួយទេ ដែលបច្ចុប្បន្នបានផលិតចេញជារូបរាងជាស្ថាពរ និងបានដាក់ឲ្យប្រើប្រាស់ហើយដែរ។ នោះគឺវ៉ាក់សាំង AstraZeneca ដែលទទួលបានសិទ្ធិផលិតក្នុងប្រទេសថៃ ដោយក្រុមហ៊ុន ស្យាមបាយអូសាយអ៊ិន (Siam Bioscience)។
អត្ថបទគួរចាប់អារម្មណ៏
សូមរំឭកបន្ដិចថា បុរសរដ្ឋខ្លាំងរបស់ចិន លោកស៊ី ជីនពីង ក៏ធ្លាប់បានអះអាងក្ដែងៗនាពេលថ្មីៗនេះដែរថា ប្រទេសចិននឹងពុះពារធ្វើយ៉ាងណាជំរុញការបរិច្ចាគវ៉ាក់សាំងកូវីដ១៩ ឲ្យបានដល់ចំនួន ២ ពាន់លានដូស ទៅឲ្យប្រទេសនានា ខណៈដែលប្រធានាធិបតីចិនរូបនេះ ក៏ធ្លាប់បានប្រកាសនឹងចូលរួមបរិច្ចាកគទឹកប្រាក់ ១០០លានដុល្លារ ទៅឲ្យកម្មវិធីកូវ៉ាក់ របស់អង្គការសុខភាពពិភពលោកផងដែរ។ នេះបើតាមការរាយការណ៍ដោយទូរទស្សន៍រដ្ឋរបស់ចិន CCTV។
ដោយឡែក សហរដ្ឋអាមេរិកវិញ ក៏មិនឲ្យចាញ់ចិនប៉ុន្មានដែរ ដោយប្រធានាធិបតីអាមេរិកថ្មីៗនេះ ក៏បានប្រកាសថា នឹងទិញវ៉ាក់សាំង Pfizer/BioNtech ចំនួន ៥០០លានដូសបន្ថែមទៀត ដើម្បីបរិច្ចាគទៅឲ្យប្រទេសក្រីក្រ តាមរយៈយន្ដការកូវ៉ាក់ ហើយបើគិតមកទល់ថ្ងៃទី ២២ ខែកញ្ញាអាមេរិកបានសន្យានឹងផ្ដល់វ៉ាក់សាំងជាង ១១០០លានដូសហើយ៕
None
