ឯកអង្គរដ្ឋទូតចិនប្រចាំនៅសហរដ្ឋអាមេរិក លោក ឈីន កាំង បានថ្លែងថា ទំនាក់ទំនងពាណិជ្ជកម្មត្រូវតែបន្តលូតលាស់ និងរីកចម្រើនទៅមុខ ស្របពេលដែលយើងខិតខំដោះស្រាយការខ្វែងគំនិតគ្នាក្នុងផ្លូវនយោបាយ។ លោកឈីន កាំង ថ្លែងដូចនេះ នៅអំឡុងពេលកិច្ចប្រជុំតាមប្រព័ន្ធអនឡាញ ជាមួយនាយកប្រតិបត្តិនៃក្រុមហ៊ុនធំៗរបស់អាមេរិក ដែលបម្រើការ និងជាសមាជិកក្រុមប្រឹក្សាភិបាល នៃក្រុមប្រឹក្សាពាណិជ្ជកម្មអាមេរិក-ចិន។
ការចេញមកថ្លែងដូចនេះរបស់ប្រមុខការទូតចិន ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីប្រធានាធិបតីអាមេរិក លោក ចូ បៃឌិន និងប្រធានាធិបតីចិន លោកស៊ី ជីងពីង បានជជែកគ្នាតាមទូរស័ព្ទជាលើកទី២ អស់រយៈពេល១ម៉ោងកន្លះឯណោះ ដើម្បីជជែកពិភាក្សាគ្នា ក្នុងការបញ្ចៀសកុំឲ្យ ការប្រកួតប្រជែងរវាងប្រទេសទាំងពីរ ក្លាយទៅជាជម្លោះរីករាលដាលកាន់តែធំៗទៅ។
គួរជម្រាបថា ឯកអង្គរដ្ឋទូតថ្មីរបស់ក្រុងប៉េកាំងប្រចាំនៅអាមេរិក លោក ឈីន កាំង ទោះទើបចូលកាន់ដំណែងពីចុងខែកក្កដាក្តី ប៉ុន្តែប្រមុខកាទូតរូបនេះ ហាក់បង្ហាញពីការដើរតួនាទីសំខាន់ ជាស្ពានតភ្ជាប់ ការឆ្លងឆ្លើយរវាងចិននិងអាមេរិក។ ជាក់ស្តែង បុរសដែលមានបទពិសោធន៍យូរឆ្នាំក្នុងវិស័យការទូតរូបនេះ ជារឿយៗរមែងពន្លយពាក្យធ្ងន់ៗផង និងពេលខ្លះផ្អែមល្ហែមផងទៅកាន់រដ្ឋបាលក្រុងវ៉ាស៊ីនតោន។
អត្ថបទគួរអាន
មុនមានការអំពាវឲ្យរក្សាស្ថិរភាពក្នុងផ្លូវពាណិជ្ជកម្មដូចនេះ គេនៅចាំថា កាលពីដើមខែកញ្ញា លោក កាំង បានពន្លះអាមេរិកថា កុំឲ្យចាត់ទុកចិនជាអតីតសហភាពសូវៀត ដែលចង់ផ្តួលរលំបានស្រេចនឹងចិត្តនោះ។
ក្នុងបញ្ហាជម្លោះពាណិជ្ជកម្មរវាងភាគីទាំងពីរ ក្រុមហ៊ុនអាមេរិក ដែលរកស៊ីជាមួយចិន កំពុងមានការខកចិត្តយ៉ាងខ្លាំងដោយសាររដ្ឋបាល លោកចូ បៃឌិន មានភាពយឺតយ៉ាវខ្លាំងមែនទែន ក្នុងការពិនិត្យឡើងវិញលើគោលនយោបាយពាណិជ្ជកម្មចិន និងការបន្តវិធានការណ៍ពន្ធគយ លើទំនិញរាប់រយពាន់លានដុល្លារ រវាងប្រទេសទាំងពីរ។
សូមជម្រាបថា នៅក្នុងកិច្ចព្រមព្រៀងពាណិជ្ជកម្មដំណាក់កាលទី១រវាងអាមេរិក និងចិន ដែលផុតកំណត់នៅចុងឆ្នាំនេះ គឺមានស្នើឲ្យចិនជំរុញការទិញផលិតផលពីអាមេរិកក្នុងតម្លៃ២០០ពាន់លានដុល្លារអាមេរិកក្នុងរយៈពេល ២ឆ្នាំ ប៉ុន្ដែ ក្រុងប៉េកាំង ហាក់មិនបានខ្វាយខ្វល់នឹងគោលដៅនៃកិច្ចព្រមព្រៀងនេះនោះទេ ដោយលើកហេតុផលថា ដោយសារតែមានការរំខានដោយជំងឺរាតត្បាតកូវីដ-១៩៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
