បើទោះបីជា កម្រិតឥណទានមិនដំណើរការកើនឡើងជាងឆ្នាំ២០២០បន្ដិចក៏ដោយ ប៉ុន្ដែ អ្នកជំនាញនៅក្នុងវិស័យហិរញ្ញវត្ថុអះអាងថា កម្រិតប៉ុណ្ណឹង គឺស្ថិតក្នុងភាពអាចគ្រប់គ្រងបាន ហើយបើធៀបនឹងប្រទេសផ្សេងទៀតក្នុងតំបន់កម្ពុជាធ្វើបានល្អជាងគេថែមទៀតផង។
របាយការណ៍ពីធនាគារជាតិបង្ហាញថា នៅឆ្នាំ២០២១នេះ វិស័យធនាគារ និងមីក្រូហិរញ្ញវត្ថុនៅតែរក្សាបាននូវមានភាពធន់ខ្លួននឹងវិបត្តិកូវីដ១៩។ តួយ៉ាង ប្រាក់បញ្ញើអតិថិជននៅក្នុងវិស័យធនាគារ និងហិរញ្ញវត្ថុ មានដល់ទៅ ជាង៣៨ពាន់លានដុល្លារ កើនឡើងជាង១៥% និងដើមទុនមានកំណើន១៨% ដល់ប្រមាណ ជាង៧ពាន់លានដុល្លារ។ រីឯ ប្រាក់កម្ចី ឬឥណទានអតិថិជនវិញមានជិត ៤៦ពាន់លានដុល្លារ កើនឡើងជាង២១%។
ក៏ប៉ុន្ដែ បើមើលលើកម្រិតឥណទានមិនដំណើរការ មានក្នុងអត្រា ២,៤% ខណៈដែលកាលពីឆ្នាំ២០២០មាន ២,១% និងឆ្នាំ២០១៩មានត្រឹមតែ ១,៨%ប៉ុណ្ណោះ។
នាយកប្រតិបត្តិសមាគមមីក្រូហិរញ្ញវត្ថុកម្ពុជា លោក ផល វ៉ាន់ឌី យល់ឃើញថា កម្រិតឥណទានមិនដំណើរការ២,៤% នៅឆ្នាំ២០២១នេះ គឺជាកម្រិតមួយអាចគ្រប់គ្រងបាន ហើយបើធៀបនឹងប្រទេសនៅក្នុងតំបន់ កម្ពុជាធ្វើបានល្អជាងគេទៅទៀត ដោយសារតែកន្លងមក រាជរដ្ឋាភិបាល ក៏ដូចជាធនាគារជាតិនៃកម្ពុជា មានគោលនយោបាយត្រឹមត្រូវ ច្បាសលាស់ ជួយអន្តរាគមន៍បានទាន់ពេលវេលាដល់វិស័យធនាគារ និងហិរញ្ញវត្ថុ រួមទាំងអ្នកប្រើប្រាស់ផងដែរ នៅក្នុងអំឡុងពេលនៃវិបត្តិកូវីដ១៩។
អត្ថបទគួរអាន
អ្នកជំនួញដ៏ល្បីល្បាញនៅក្នុងវិស័យអចលនទ្រព្យ
និងហិរញ្ញវត្ថុ អ្នកឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុន លី ហួរ
គ្រុប បានអះអាងថា បើទោះបីជា ២ឆ្នាំមកនេះ សេដ្ឋកិច្ចពិភពលោក រួមទាំងកម្ពុជាជួបប្រឈមនឹងវិបត្តិកូវីដ១៩ក៏ដោយ
ប៉ុន្ដែ វិស័យធនាគារ និងហិរញ្ញវត្ថុ នៅតែបន្ដកំណើនរឹងមាំ
និងបានចូលរួមជួយស្ដារ និងជំរុញកំណើនសេដ្ឋកិច្ចប្រទេស
តាមរយៈការផ្ដល់ប្រាក់កម្ចីជួយដល់អាជីវកម្ម និងបុគ្គល
ដែលកំពុងមានតម្រូវការដើមទុនសម្រាប់គាំទ្រប្រតិបត្តិអាជីវកម្មនានា។
គួរបញ្ជាក់ថា គិតចាប់ពីខែវិច្ឆិកាឆ្នាំ២០២០ ដល់ខែវិច្ឆិកាឆ្នាំ២០២១ ការរៀបចំឥណទានឡើងវិញនៅក្នុងវិស័យធនាគារ និងហិរញ្ញវត្ថុ មានដល់ទៅជិត៣៣ម៉ឺនគណនី ស្មើនឹងទំហំទឹកប្រាក់ជាង៥ពាន់លានដុល្លារអាមេរិក។
អ្នកជំនាញក្នុងវិស័យហិរញ្ញវត្ថុអះអាង ការរក្សាបាននូវភាពធន់នៃវិស័យធនាគារ និងវិស័យមីក្រូហិរញ្ញវត្ថុ ដែលជាវិស័យឆ្អឹងខ្នងដ៏សំខាន់នៃសេដ្ឋកិច្ច វាក៏បានជួយគាំទ្រដល់វិស័យសំខាន់ៗជាច្រើនផ្សេងទៀតឲ្យមានការរីកចម្រើនផងដែរ ស្របពេលដែលបច្ចុប្បន្ន ប្រទេសកម្ពុជាបាននិងកំពុងបើកដំណើរការប្រទេសឡើងវិញលើគ្រប់វិស័យ៕
_
