សម្ដេចតេជោ ហ៊ុន សែន ជំរុញឲ្យមានការសិក្សាលើការចាក់វ៉ាក់សាំងសាំងដូសទី៤ សម្រាប់ក្រុមមន្រ្តីជួរមុខ

នៅក្នុងពិធីសម្ពោធដាក់ឲ្យប្រើប្រាស់ អគាររដ្ឋបាលថ្មី នៃអគ្គនាយកដ្ឋានគយ និងរដ្ឋករកម្ពុជា សម្ដេចតេជោ ហ៊ុន សែន បានណែនាំដល់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ប្រធានគណៈប្រចាំការ នៃគណ:កម្មការជាតិប្រយុទ្ធនឹងជំងឺកូវីដ-១៩ និងឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល ឲ្យមានការសិក្សាទៅលើការចាក់វ៉ាក់សាំងបង្ការជំងឺកូវីដ-១៩ ដូសទី ៤ ទៅលើក្រុមមន្ត្រីជួរមុខ។ ជាពិសេសក្រុមគ្រូពេទ្យ គឺត្រូវប្រើប្រាស់វ៉ាក់សាំងប្រភេទ Pfizer ដែលជាជំនួយរបស់ប្រទេសអូស្ត្រាលី។

យ៉ាងណាមិញសម្ដេចក៏បានមានប្រសាសន៍ បន្ថែមទៀតថា នៅពេលនេះក្រុមអង្គរក្សរបស់សម្ដេចផ្ទាល់បានទទួលការចាក់ដូសទី៤ នេះរួចរាល់ហើយ។ ដើម្បីជាការពារនៃការ ឆ្លងក៏ដូចជាបានបង្កើនអង់ទីករក្នុងខ្លួនផងដែរ។

សូមជម្រាបថា ការចាក់វ៉ាក់សាំដូសទី៤ គឺធ្វើឡើងនៅក្នុងគោលបំណងនៃទប់ស្កាត់នៃការឆ្លងនៃមេរោគកូវីដ១៩ ខណៈនៅពេលនេះ វត្តមានមេរោគបំប្លែងខ្លួនថ្មី អូមីក្រុង កំពុងតែមានវត្តមាននៅក្នុងប្រទេសកម្ពុជា ដែលត្រូវបានរកឃើញជាករណីនាំចូល ។ទន្ទឹមនឹងផែនការចាក់ដូសទី៤ កម្ពុជាក៏នៅតែបន្តយុទ្ធនាការណ៍ចាក់វ៉ាក់សាំងទាំងដូសមូលដ្ឋានក៍ដូចជាដូសទី៣ ឬដូសជំរុញជូនប្រជាពលរដ្ឋនៅទូទាំងប្រទេសផងដែរ។ ដោយយោងតាមរបាយការណ៍របស់ក្រសួងសុខាភិបាលគិតត្រឹមថ្ងៃទី ២៣ ខែធ្នូ ឆ្នាំ២០២១ នេះកម្ពុជាសម្រេចបាន នៃការចាក់វ៉ាក់សាំងដូសទី៣ ឬដូសជំរុញបានរហូតដល់ទៅជាង ៣លាន ២សែននាក់ហើយ ខណៈតួលេខនៃការចាក់វ៉ាក់សាំងជារួមវិញសម្រេចបានប្រមាណ ៨៩%ហើយ នៃចំនួនប្រជាជនសរុប ១៦លាននាក់៕

អត្ថបទ ហួន ស្រីនីត